قاراعاندى وبلىسىندا «ارسەلور ميتتال تەمىرتاۋ» كومپانياسىنا قاراستى شاحتادا تاعى دا اپات بولدى دەپ حابارلايدى 31.kz
جەر استىنداعى توبە جابىندىسى وپىرىلىپ ءتۇسىپ، كەنشىلەر ءۇيىندىنىڭ استىندا قالىپ قويعان. بىزگە جەتكەن اقپارات بويىنشا 3 ادامنىڭ ءمايىتى تابىلىپ، تاعى بەس ادام اۋرۋحاناعا جەتكىزىلگەن.
ساران شاحتاسىنداعى توتەنشە جاعداي تۇسكى ساعات 14.35-تە بولعان. الدىن الا بولجام بويىنشا، 700 مەتر تەرەڭدىكتەگى اسپالى جول قيراپ، كەسىرىنەن بارلىعى 8 ادام زارداپ شەككەن. 3 جۇمىسشى وقيعا ورنىندا جان تاپسىرسا، تاعى 5 ادام اۋرۋحاناعا جەتكىزىلدى.
سەرگەي مۋستيۆكو، ساران شاحتاسىنىڭ ديرەكتورى:
- ءۇش جۇمىسشى قازا تاپتى، بەسەۋى اۋرۋحاناعا جەتكىزىلدى، ىشىندەگى بىرەۋى تىم اۋىر حالدە جاتىر.
اپاتتىڭ شىعۋ سەبەبىن ارنايى كوميسسيا مۇشەلەرى انىقتاپ جاتىر. تەكسەرىس ءبىر اپتاعا دەيىن جالعاسادى دەپ كۇتىلۋدە. ال قازا بولعان 3 ادامنىڭ قاراعاندى قالاسىنىڭ تۇرعىندارى ەكەنى بەلگىلى. ساران شاحتاسىنىڭ وكىلدەرى 3 جۇمىسشىنىڭ وتباسىلارىنا سۋىق حاباردى جەتكىزگەندەرىن ايتادى.
مارات ميرگويازوۆ، «قورعاۋ» كاسىپوداعىنىڭ ءتوراعاسى:
- بۇل جاعدايعا بايلانىستى استانا قالاسىنان ارنايى شاقىرتىپ، كوميسسيا تاعايىندالادى جانە دە تەرگەۋ جۇمىستارى جايلى سىزدەردى حاباردار ەتىپ وتىرامىز
اۋرۋحاناعا جەتكىزىلگەن بەس ادامنىڭ جاعدايى ورتاشا دەڭگەيدە. دارىگەرلەر ولاردىڭ باس پەن جانباس سۇيەكتەرى قاتتى زاقىمدانعاندارىن ايتادى. ال قايتىس بولعانداردىڭ ەڭ جاسى 25-تە بولسا، ۇلكەنى 55 جاستا ەكەن. بارلىعى وتباسىلى ازاماتتار بولعان. «ارسەللور ميتتالتەمىرتاۋ» اق-نا تيەسىلى ساران باسشىلارى جۇمىس ورنىندا قازا بولعان ادامداردىڭ جاقىندارىنا قاجەتتى كومەك كورسەتەمىز دەپ وتىر.
پىكىر قالدىرۋ