اقتوبە وبلىسى قىلمىستىق ىستەر جونىندە مامانداندىرىلعان اۋدانارالىق سوت سۋدياسى احمەتقالي مولداعالييەۆ اقتوبەدە 5ء-شى ماۋسىمدا بولعان تەراكت تۋرالى بۇرىن ايتىلماعان دەرەكتەردى مالىمدەدى دەپ جازادى www.nur.kz.

"نەگىزگى تۇلعا اقتوبە قالاسىنىڭ تۇرعىنى دميتريي تاڭاتاروۆ بولعان. شامامەن 2009 جىلدان باستاپ تاڭاتاروۆ راديكالدى ءدىني اعىم سالافي-دجيحادي جولىنا تۇسكەن. تاڭاتاروۆ پەن ونىڭ سىبايلاستارى سيريا اۋماعىنا بارىپ، تەررورلىق ارەكەتتەرگە قاتىسا الماعان كەزدە، شەتەلدىك سالافي-دجيحادي ۇستانۋشىسىنىڭ ۋاعىزىن تىڭداپ، تاڭاتاروۆ پەن سىبايلاستارى اقتوبە قالاسىندا تەراكتى جاساۋ ارقىلى جوسپارلارىن جۇزەگە اسىرۋعا بەل بۋعان"، — دەپ اتاپ ءوتتى مولداعالييەۆ.

سۋديانىڭ بەرگەن مالىمەتىنشە، تاڭاتاروۆتى 25 ادام قولداپ، قارۋلى دجيحاد جاساۋعا شىعىپ، ونى تەررورلىق توپتىڭ ءامىرى ەتىپ سايلاعان. سودان كەيىن مولداعالييەۆ بولعان وقيعالاردى ءتىز قاتار اڭگىمەلەپ بەردى.

ەسكە سالا كەتسەك، 2016 جىلى 5 ماۋسىمدا ءبىر توپ ادام ەكى قارۋ-جاراق دۇكەنى مەن اقتوبە اسكەري بولىمشەسىنە قارۋلى شابۋىل جاسادى. شابۋىل ناتيجەسىندە سەگىز ادام قازا تاپتى، ولاردىڭ ۇشەۋى اسكەري قىزمەتكەرلەر بولاتىن. قارۋلى كۇشتەر شابۋىل جاساعان 18 ادامدى توقتاتىپ، توعىز ادامدى ۇستادى. اقتوبەدە تەراكتى جاساعاندار "سالافيزم" ءدىني اعىمىنىڭ ۇستانۋشىلارى دەپ اتالدى.

تەرروريستتەرگە 28 قاراشا كۇنى ۇكىم شىعارىلدى: جەتى سوتتالۋشى ءومىر بويىنا باس بوستاندىعىنان ايىرىلدى، تاعى ەكەۋى جازاسىن 20 جانە 22 جىل بويى كولونيادا وتەيتىن بولادى.