بيىل قازاقستاننىڭ تاۋەلسىزدىك العانىنا 25 جىل. ايتۋلى داتاعا وراي ق ر پرەزيدەنتى نۇرسۇلتان نازاربايەۆ راقىمشىلىق جاريالاۋ تۋرالى زاڭ جوباسىن ۇسىنىپ، مەملەكەتتىك قىزمەتكەرلەرگە قارجىلىق سىياقى بەرۋگە تاپسىرما بەردى. بۇدان بولەك، ەل كولەمىندە ءتۇرلى ءىس-شارالار، مەرەكەلىك كونسەرتتەر وتكىزىلۋدە. ال قازاقستاندىقتار تاۋەلسىزدىك كۇنىن قالاي اتاپ وتەتىنىن ءبىلۋ ءۇشىن «قامشى» پورتالى بىرنەشە مادەني ورتالىققا حابارلاسىپ، قازاقستاندىقتاردىڭ اراسىندا ساۋالناما جۇرگىزگەن بولاتىن.

يۋليا پاك، زەينەتكەر: «مەن كوپ قاباتتى ۇيدە تۇرامىن. وسى جىلى تاۋەلسىزدىك كۇنىنە وراي ادەتتەگىدەي اۋلادا داستارحان جايامىز. بۇل ءبىزدىڭ ءۇيدىڭ اقساقالدارى ءۇشىن جىلداعى داستۇرگە اينالعان. بارلىعىن ءوزىم ۇيىمداستىرىپ جاتىرمىن. اقشا جينامايمىز. كىم نە الىپ كەلە الادى، سونى ۇستەلگە قويامىز. 16 جەلتوقساندا قايتىس بولعانداردىڭ قۇرمەتىنە بىر-ەكى ستاقان ءىشىپ قوياتىنىمىز دا بار. ءبىر جاعىنان باس قوسۋعا تاعى ءبىر سەبەپ».

ۆاسيليي،  مەنەدجەر: «تاۋەلسىزدىك كۇنىنە وراي ءتورت كۇن دەمالىس بەرىلەدى. وسى دەمالىستى ەشتەڭە ىستەمەي، ۇيدە جاتامىن. سوڭعى ءبىر ايدا جۇمىس قاربالاس بولعاندىقتان ۇيقىنى قاندىرىپ، دەمالۋعا تاماشا مۇمكىندىك تۋىنداپ تۇر».

تامارا، زەينەتكەر: «مەن ءۇشىن 16 جەلتوقساننىڭ باسقا كۇندەردەن ەش ايىرماشىلىعى جوق. زەينەتكەر بولعاندىقتان كوپ ۋاقىتىم ۇيدە وتەدى. تاۋەلسىزدىك مەرەكەسىندە دە ۇيدە بولامىن. ادەتتەگى داستارحان، ادەتتەگى كۇن».

رومان، ستۋدەنت: «مەن جاتاقحانادا تۇرامىن. سوندىقتان، دەمالىس بولسا قۋانا-قۋانا ۇيگە بارامىن. ۇيدە وتكىزگەن ءاربىر كۇنىم مەن ءۇشىن مەيرام».

گۋزەليا، ەسەپشى: ايەل ادام ءۇشىن ايتۋلى مەيرامداردىڭ قۇرمەتىنە بەرىلەتىن دەمالىس – دەمالۋعا ەمەس، ۇيدەگى جينالىپ قالعان شارۋالاردى اياقتاۋ ءۇشىن قاجەت سەكىلدى. سوندىقتان، تاۋەلسىزدىك كۇنىن ەرەكشە اتاپ وتەمىن دەپ ايتا المايمىن. 4 كۇن دەمالىستا ءۇي شارۋاسىمەن اينالىسامىن. ال جۇمىس باستان اسادى».

            تۇرسىناي يسمايلوۆا، يسلام مەملەكەتى يراننىڭ قازاقستانداعى وكىلدىگىنىڭ قىزمەتكەرى: «تاۋەلسىزدىك كۇنىنە وراي ءبىزدى بىرنەشە كونفەرەنسيالارعا شاقىردى. ماسەلەن، جاقىندا ءال-فارابي اتىنداعى قازۇۋ تاۋەلسىزدىك كۇنىنە وراي ۇيىمداستىرىلعان كونفەرەنسياسىنا باردىق. ستۋدەنت جاستاردى مەرەكەمەن قۇتتىقتاپ قايتتىق. ەندى اباي اتىنداعى قازۇپۋ-دا دا وتپەك. سوعان بارامىز. ال ورتالىق ەشتەڭكە ۇيىمداستىرمادى. جىلدا ەرەكشە ءىس-شارا جاسايمىز دەپ ايتا المايمىن».

گولدبەرگ مايسەي، «الەف» ەۆرەي مادەني ورتالىعىنىڭ ءتوراعاسى: «ءبىزدىڭ ورتالىق تاۋەلسىزدىك كۇنىنە وراي استانانىڭ شالعاي اۋداندارىندا كونسەرت وتكىزدى. قالا ورتالىقتارىنا كەلۋگە كوبىنە مۇمكىندىكتەرى بولا بەرمەيتىن اۋداندارعا مادەني دەمالىس ۇيىمداستىرىپ بەردىك».

ليليا ستاروۆا: «مەن ءوزىمنىڭ نەگىزگى جۇمىسىمنان بولەك، ۋاقىتىم بولعاندا جەلىلىك ماركەتينگپەن اينالىسامىن. تاۋەلسىزدىك كۇنىنە وراي بەرىلەتىن 4 كۇندى ماكسيمالدى تۇردە پايدالانعىم كەلەدى. الماتىداعى ءىرى ساۋدا ورتالىقتارىنداعى بۋتيكتەردى ارالاپ، تاۋار ۇسىنامىن. مەنىمەن ارىپتەس بولۋعا ۇگىتتەيمىن. جەلىلىك ماركەتينگپەن اينالىساتىندار مەنى تۇسىنەدى. سوندىقتان مەيرامدا دەمالمايمىن».

يگور، ستۋدەنت: «مەنىڭ ويىمشا، قازاقستاندا تاۋەلسىزدىك مەرەكەسىن كوپ ەشكىم تويلامايدى. بۇل ارينە ۇلكەن مەرەكە. دەسەك تە، ول جاڭا جىلدىڭ تاساسىندا قالىپ قالادى. ماسەلەن مەن جاڭا جىلعا دايىندىعىمدى باستاپ كەتتىم. قايدا، كىممەن وتكىزەتىنىمدى كازىردەن باستاپ ويلاپ ءجۇرمىن. ال 16 جەلتوقسان مەن ءۇشىن ادەتتەگى دەمالىس».