قازاقستاندىق كاسىپقوي بوكسشى گەنناديي گولوۆكين بۇكىلالەمدىك بوكس كەڭەسىنىڭ (WBC) گولليۆۋدتا ءوتىپ جاتقان 54ء-شى كونۆەنسياسىندا ارنايى سىيمەن ماراپاتتالدى دەپ حابارلايدى baq.kz.
ورتا سالماقتا WBA (Super)، IBO، WBC جانە IBF نۇسقالارى بويىنشا الەم چەمپيونى اتاعىنا يە وتانداسىمىز الەمدەگى مەرەيى ۇستەم بوكسشى رەتىندە تانىلىپ وتىر. «WBC» ارنايى سىيى وسىنداي قۇرمەتكە يە بوكسشىعا بەرىلەدى. مارتەبەلى ماراپاتتى ايگىلى امەريكالىق بوكسشى مارۆين حاگلەر تابىستادى.
گەنناديي گولوۆكين «WBC» ۇيىمىنىڭ جۇمىسىنا تابىس پەن ساتتىلىك تىلەدى. اتالعان ۇيىمنىڭ چەمپيونى اتانۋ ۇلكەن قۇرمەت ەكەنىن دە تىلگە تيەك ەتتى.
ايتا كەتەيىك، GGG «WBC» ۇيىمىنىڭ جىل قورىتىندىسى بويىنشا ەڭ ۇزدىك بوكسشىسى اتاعىنا دا ۇسىنىلعان بولاتىن. داۋىس بەرۋ ۇيىمنىڭ رەسمي سايتىندا وتكىزىلۋدە.
