قازاقستان پرەزيدەنتىنىڭ بۇرىنعى كۇيەۋ بالاسى، بىلتىر اقپاندا ۆەنا تۇرمەسىندە ءولى كۇيىندە تابىلعان راحات الييەۆ كىسى قولىنان قازا تاپقان. اۆستريالىق اقپارات قۇرالدارىنىڭ حابارلاۋىنشا، بۇل تۋرالى 12 جەلتوقساندا ۆەنادا وتكەن باسپا ءسوز كونفەرەنسياسىندا نەمىس پروفەسسورى، بۋىندىرۋ جانە اسىپ ءولتىرۋ ىستەرى بويىنشا مامان بەرند برينكمانن مالىمدەدى. ول رەسمي سوت-مەديسينالىق ساراپتاماسىنىڭ "الييەۆ ءوزى اسىلىپ ءولدى" دەگەن تۇجىرىمىن قاتە دەپ اتادى. برينكمانن الييەۆتىڭ مايىتىنە جاسالعان پاتالوگواناتوميالىق زەرتتەۋلەردەن سوڭ مارقۇمدى دەنەسىندە زورلىق ىزدەرى اسا بىلىنبەيتىندەي دەڭگەيدە بۋىندىرىپ ولتىرگەن دەگەن قورىتىندى جاساعانىن ايتتى. بۇل تۋرالى ازاتتىق راديوسى حابارلادى.

باسپا ءسوز جيىنىندا الييەۆتىڭ جەسىرىنىڭ ادۆوكاتتارى ءقازىر تەرگەۋدى قايتا جۇرگىزدىرتۋگە تالپىنىپ جاتقانىن ايتتى.

ءبىر كەزدەرى قازاقستاننىڭ اۆسترياداعى ەلشىسى، قازاقستان ۇلتتىق قاۋىپسىزدىك كوميتەتى ءتوراعاسىنىڭ ورىنباسارى بولعان راحات الييەۆ كەيىن نۇرسۇلتان نازاربايەۆتى سىناپ شىققان. ال 2007 جىلى وعان قازاقستاندىق ەكى بانكيردى ولتىرۋگە تاپسىرىس بەردى دەگەن ايىپ تاعىلعان. الييەۆ ايىپتى موينىداماي، ونىڭ ساياسي استارى بار دەپ مالىمدەگەن. الييەۆ قۋعىنعا ۇشىراعان سوڭ ايەلى، نۇرسۇلتان نازاربايەۆتىڭ ۇلكەن قىزى داريعا نازاربايەۆامەن اجىراسىپ، كەيىن باسقا ادامعا ۇيلەنگەن.

ۆەنا تۇرمەسىندە 2014 جىلدىڭ ماۋسىمىنان بەرى قاماۋدا وتىرعان راحات الييەۆكە اۆستريا پروكۋراتۋراسى جارتى جىلدان كەيىن «نۇربانكتىڭ» ەكى توپ-مەنەدجەرى - جولداس تەمىرالييەۆ پەن ايبار حاسەنوۆتىڭ ولىمىنە قاتىسى بار دەپ ايىپ تاققان. قازاقستان بيلىگى ونى «ەكى ادامدى ۇرلاپ اكەتىپ ءولتىردى ءارى مەملەكەتتىك توڭكەرىس ازىرلەدى» دەگەن ايىپپەن سىرتتاي 40 جىلعا سوتتاعان. ال 2015 جىلعى اقپاننىڭ 24ء-ى كۇنى ونىڭ تۇرمەدەن ءولى كۇيىندە تابىلعانى حابارلانعان.