WBA (Super)، IBO، WBC جانە IBF بويىنشا ورتا سالماقتاعى الەم چەمپيونى گەنناديي گولوۆكيننىڭ ەسىمى گيننەستىڭ رەكوردتار كىتابىنا جازىلدى دەپ حابارلايدى www.inform.kz ءتىلشىسى.

گولوۆكين وسى ماراپاتقا ەڭ ۇزدىك نوكاۋتەر رەتىندە يە بولىپ وتىر. وسى ۋاقىتقا دەيىن گەنناديي 36 جەكپە-جەك وتكىزىپ، 33 كەزدەسۋدى نوكاۋتپەن اياقتاعان. وسىلايشا، قازاقستاندىق بوكسشىعا تيەسىلى نوكاۋتتاردىڭ سانى جالپى جەكپە-جەكتەردىڭ 91،6 پايىزىن قۇراپ وتىر. بۇل ورتا سالماقتاعى چەمپيونداردىڭ اراسىنداعى ەڭ ۇزدىك كورسەتكىش بولىپ سانالادى. وسىعان وراي، گولليۆۋدتا ءوتىپ جاتقان بۇكىلالەمدىك بوكس كەڭەسىنىڭ (WBC) كەزەكتى كونۆەنسياسىندا گەنناديي گولوۆكينگە گيننەستىڭ رەكوردتار كىتابىنىنىڭ ءتيىستى كۋالىگى تابىستادى.

بۇدان بولەك، گولوۆكين WBC تۇجىرىمى بويىنشا كەلل برۋكپەن وتكىزگەن جەكپە-جەگى ءۇشىن ارنايى سىيلىققا يە بولىپ، ەڭ دومينانتتى بوكسشى رەتىندە تانىلدى.    

«بۇكىلالەمدىك بوكس كەڭەسىنىڭ (WBC) ءبىر بولىگى بولۋ - مەن ءۇشىن ۇلكەن ابىروي. مەن سىزدەردىڭ قولداۋلارىڭىزدى جوعارى باعالايمىن»،- دەپ جازدى گ.گولوۆكين ينستاگرام جەلىسىندەگى پاراقشاسىندا.