الماتىدا تاعى دا الاپات ءورت بولدى. كۇندىز-تۇنى قوناق ارىلماي، تاۋلىك بويى بويى جۇمىس ىستەيتىن "اسپانديار" اسحاناسى ساۋ-تامتىعى قالماي وتقا ورانىپ، ارتىنشا جارىلىس بولدى. توتەنشە جاعداي كەزىندە ءىرى اسحانانىڭ ءىشى كەلۋشىلەرگە لىق تولى بولعان دەپ حابارلايدى 31.kz
ءۇزىلىسسىز قىزمەت كورسەتەتىن "اسپانديار" حالال اسحاناسى اپ-ساتتە قىزىل جالىننىڭ قۇرساۋىندا كەتتى. عيمارات اۋماعى دا كولەمدى، بىرنەشە بولىكتەن تۇرادى. جالپى كولەمى 1700 شارشى مەتر. كۋاگەرلەردىڭ ايتۋىنشا، اسحانانىڭ اس دايارلاۋ بولمەسىندە ءبىر زات جارىلىپ، ارتىنشا ءورت شىققان. وسى ساتتە قوناقتار مەن قىزمەتكەرلەر جاپاتارماعاي سىرتقا ۇمتىلادى.
ماقسات، كۋاگەر:
- بارلىق حالىق، تومەن جاقتا وتىرعاندار كوشەگە شىعىپ، ماشينالار، كەپتەلىس بولىپ ادامدار قاۋمالاپ كەتتى. سودان 2 مينۋت وتپەدى عوي دەيمىن، تاعى دا وت جوعارى لاۋلادى.
- 10 مەتردەي جۇرسەم، ءۇيدىڭ توبەسىنەن وت لاۋلاپ جاتتى. ىشتەن گاز باللوندارىن شىعارىپ جاتىر.
ءورت سوندىرۋشىلەر كەلگەن ۋاقىتتا تاعى ءبىر جويقىن جارىلىس بولادى. جالىنمەن وتىزعا جۋىق تەحنيكا مەن 130-دان استام جەكە قۇرام ساربازى ءبىر ساعات بويى الىستى.
ءقازىر ءورت اۋىزدىقتالعانمەن، ماڭاي قويۋ تۇتىننەن ءالى سەيىلەر ەمەس. وقيعا ورنىندا ءورت سوندىرۋشىلەر مەن بىرنەشە تەحنيكا قىزۋ جۇمىس جۇرگىزىپ جاتىر. عيماراتتىڭ ءبىر قاپتالىندا بىرنەشە دونەر، شاۋرما ساتاتىن دۇڭگىرشەكتەر دە بولعانىن بايقاۋعا بولادى.
قۇتقارۋشىلار اسحانا اۋماعىنان وتتەگى تولتىرىلعان 4 باللونمەن بىرگە 4 گاز باللونىن الىپ شىققان. توتەنشە جاعدايلار دەپارتامەنتى ءورت تۋرالى حابارلاما دەر ۋاقىتىندا تۇسپەگەنىن ايتادى.
ساندۋعاش بايمۇحامبەتوۆا، الماتى ق. تجد باسپا ءسوز قىزمەتىنىڭ جەتەكشىسى:
- ءورت ءسوندىرۋ قىزمەتكەرلەرى شاقىرىلعان جەرگە كەلگەن كەزدە ءورتتىڭ ۇلكەن اۋماققا اۋىسىپ، جانە دە جانىندا ورنالاسقان جەكە تۇرعىن ۇيلەر مەن ۇلكەن عيماراتتارعا ءورتتىڭ اۋىسۋ ءقاۋپى بولدى.
ورتتەن ازىرگە جاپا شەككەندەر جايلى اقپارات جوق. ال بۇل جازعى ماۋسىم قارساڭىندا الماتىدا بولعان جالعىز وقيعا ەمەس. بۇعان دەيىن "يۋبيلەينىي" سۋپەرماركەتى، "اراگوستا" تۇنگى كلۋبى تولىقتاي ورتەنىپ كەتكەن ەدى. الماتى اكىمى باۋىرجان بايبەك جازعى كافە، اسحانالارعا باقىلاۋدى كۇشەيتكەنمەن، قالاداعى ءورت جاعدايلارى سيرەمەي وتىر.
