فيليپپين پرەزيدەنتى رودريگو دۋتەرتە داۆاو قالاسىنىڭ مەرى بولعان كەزدە ەسىرتكى ساتتى دەگەن كۇدىكتىلەردى ءوزى ولتىرگەنىن مالىمدەدى.

tengrinews.kz حابارلاعانداي، مامىر ايىندا پرەزيدەنت بولىپ سايلانعان رودريگو دۋتەرتە ەسىرتكىگە تاۋەلدى ادامدارمەن، سونداي-اق، ەسىرتكى ساتاتىندارمەن كۇرەسىپ كەلەدى. پوليسەيلەردىڭ سوڭعى مالىمەتتەرى بويىنشا، دۋتەرتە بيلىككە كەلگەلى بەرى ەلدە ەسىرتكى ساۋداسىنا قاتىسى بار شامامەن 3 مىڭ ادام ولتىرىلگەن.

«مەن داۆاو قالاسىندا ولاردى ءوزىم ولتىرگەنمىن. مۇنى ىستەي الاتىنىمدى سول جىگىتتەرگە كورسەتكىم كەلدى»، — دەپ مالىمدەدى فيليپپين پرەزيدەنتى.

«داۆاودا موتوسيكلمەن ءجۇرىپ، كوشەلەردە كۇزەتتە ءجۇردىم. مەن راسىندا دا بىرەۋدى ءولتىرۋ ءۇشىن ۇرىس-قاعىس بولىپ جاتقان اۋماقتاردى ىزدەدىم»، — دەدى رودريگو دۋتەرتە بۇل ارەكەتىن ءالى دە جالعاستىرا بەرەتىنىن ايتا وتىرىپ.

ايتا كەتەيىك، دۇنيەجۇزىلىك قوعامداستىقتىڭ وكىلدەرى ەلدەگى ەسىرتكى ساۋداسىنىڭ بۇل تۇرىمەن كۇرەسۋ ءادىسىن سىنعا العان بولاتىن. ادام قۇقىقتارى جونىندەگى بۇۇ ساراپشىلارى دا فيليپپين بيلىگىندەگىلەردىڭ بۇل ارەكەتىن ايىپتادى. ساراپشىلار ولاردى ادامداردى ولتىرۋگە بوگەت جاساۋلارىن جانە كۇدىكتىلەردى ءولىم جازاسىنا كەسۋدەن باس تارتۋىن سۇرادى.