ق ر يدم جەر قويناۋىن پايدالانۋ دەپارتامەنتىنىڭ وكىلدەرى «جەر قويناۋى جانە جەر قويناۋىن پايدالانۋ تۋرالى» ق ر كودەكس جوباسىنىڭ نەگىزگى اسپەكتىلەرىن ءتۇسىندىردى. بۇل تۋرالى "قامشى" پورتالى ق ر ينۆەستيسيالار جانە دامۋ مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

مەملەكەت باسشىسىنىڭ «100 ناقتى قادام» ۇلتتىق جوسپارى مەن قازاقستان حالقىنا جولداۋىندا جۇكتەگەن تاپسىرمالارىن ورىنداۋ ماقساتىندا «جەر قويناۋى جانە جەر قويناۋىن پايدالانۋ تۋرالى» ق ر كودەكس جوباسى ازىرلەندى.  

قۇجاتتى ازىرلەۋشىلەر جەر قويناۋى تۋرالى كودەكستى قابىلداۋدىڭ نەگىزگى سەبەبىن ءتۇسىندىردى. بۇگىنگى تاڭدا زەرتتەلگەن كەن ورىندارى زەردەلەنۋدە جانە جاڭا كەن ورىندارىن اشۋ ءۇشىن گەولوگيالىق بارلاۋ سياقتى تاۋەكەلى كوپ سالاعا ينۆەستيسيا تارتۋدى تالاپ ەتەتىن وتكىر ماسەلە كۇن تارتىبىندە تۇر.

كودەكس جوباسىن ازىرلەۋ ماقساتىندا مينيسترلىك مەملەكەتتىك ورگان مەن اككرەديتتەلگەن سۋبەكتى وكىلدەرىنەن باسقا تاۋەلسىز عىلىمي ينستيتۋتتاردىڭ، حالىقارالىق ساراپشىلاردىڭ (دۇنيەجۇزىلىك بانك، ەىدۇ، داندي ينستيتۋتى) جانە مامانداندىرىلعان كونسالتينگتىك كومپانيا وكىلدەرىن قوسقاندا 98 ادامنان تۇراتىن جۇمىس توبىن قۇردى.

ۆاك-دا «جەر قويناۋى جانە جەر قويناۋىن پايدالانۋ تۋرالى» ق ر كودەكس جوباسىنىڭ تۇجىرىمداماسى ماقۇلداندى (2015 جىلدىڭ 17 شىلدەسىندە) جانە قازىرگى ۋاقىتتا كودەكس جوباسى جۇمىس توبىنىڭ قاراۋىندا.

كودەكس جوباسىنىڭ نەگىزگى باعىتتارى ەڭ ۇزدىك الەمدىك تاجىريبە نەگىزىندە جەر قويناۋىن پايدالانۋ قۇقىعىن بەرۋدى جەڭىلدەتۋ؛ قورلاردى باعالاۋدىڭ حالىقارالىق تارتىبىنە كوشۋ؛ گەولوگيالىق اقپاراتقا قولجەتىمدىلىكتى ۇسىنۋ جانە ونى ساندىق ۇلگىگە كوشىرۋ؛ يۋنيورلىق كومپانيالاردىڭ نارىعىن دامىتۋ؛ تۇراقتى تۇردە ينۆەستورلارعا جەر قويناۋىن پايدالانۋدى جۇزەگە اسىرۋ ءۇشىن كەپىلدىك بەرۋ قاجەت.

بۇدان بولەك كودەكس جوباسى مىنالاردى قاراستىرادى:

1) ەكونوميكالىق ىنتالاندىرۋ ادىسىنە كوشۋ (گەولوگيالىق بارلاۋدى قارجىلاندىرۋدىڭ ەڭ از كولەمى تۋرالى دامۋ تالاپتارى، بەلگىلەنگەن جەر قويناۋى ۋچاسكەلەرىن پايدالانۋ ءۇشىن دامۋ ستاۆكا تولەمىنىڭ جۇيەسى)؛

2) كەڭ تارالعان پايدالى قازبالار، كومىرسۋتەكتى شيكىزات پەن قاتتى پايدالى قازبالار ءۇشىن كودەكستىڭ ارنايى بولىگىنە جەكە ەرەجەلەر ەنگىزۋ؛

3) كەلىسىمشارت جاساسۋ كەزەڭىندە قورىتىندىلار مەن ساراپتامالاردى، ءارتۇرلى راسىمدەردى تۇبەگەيلى قىسقارتۋ (ساراپتاما ەكولوگيالىق جانە ونەركاسىپتىك قاۋىپسىزدىك بولىگىندە عانا)؛

4) جەر قويناۋىن باسقارۋ باعدارلامالارىن ەنگىزۋ؛

         5) دۇنيەجۇزىلىك تاجىريبە ەسەبىنەن قاتتى پايدالى قازبالارعا كەڭ تارالعان پايدالى قازبالاردىڭ كوپتەگەن بولىگىن جاتقىزۋ جانە كەڭ تارالعان پايدالى قازبالاردىڭ ءتىزىمىن قايتا قاراۋ. تەك بازالىق قۇرىلىس ماتەريالدارى ءۇشىن جەر قويناۋى قۇقىعىن بەرۋ ءتارتىبىنىڭ ەرەكشەلىگىن قاراۋ ۇسىنىلادى؛

6) كەن ورىندارىن جابۋ كەزىندە ەلىمىزدىڭ ەكولوگيالىق قاۋىپسىزدىگىن قامتاماسىز ەتۋ ءۇشىن ول ورىنداردى جويۋ جونىندەگى ەرەجەلەردى كۇشەيتۋ؛

7) مەملەكەتتىك جانە جەكە قاراجات ەسەبىنەن جەر قويناۋىن گەولوگيالىق زەردەلەۋدى ەنگىزۋدە ناقتى پارامەترلەردى انىقتاۋ؛

8) تەحنوگەندiك مينەرالدى ءتۇزiلiمدەردى پايدالانۋدى رەتتەۋ؛

9) دۇنيەجۇزىلىك تاجىريبە ەسەبىنەن تاۋارلاردىڭ، جۇمىستار مەن كورسەتىلەتىن ساتىپ الۋ قىزمەتتەرىن رەتتەۋ جانە دۇنيەجۇزىلىك ساۋدا ۇيىمىنا كىرۋگە بايلانىستى جەرگىلىكتى قامتۋ بويىنشا تالاپتار كوزدەلەدى؛

جەر قويناۋىن پايدالانۋ كودەكسىنىڭ جوباسىن ازىرلەگەندە سالىق سالۋ، ەكولوگيا، جەر قاتىناستارى سياقتى سالالاردى قوسقاندا جوعارىدا كورسەتىلگەن تاسىلدەردى جۇزەگە اسىرۋدى قامتاماسىز ەتۋگە باعىتتالعان ساباقتاس زاڭنامانى ءبىر ۋاقىتتا جەتىلدىرۋ كوزدەلەدى.

كودەكس جوباسىنىڭ ۇكىمەتكە ەنگىزۋ مەرزىمى – 2017 جىلعى شىلدە، پارلامەنتتىڭ قاراۋىنا 2017 جىلعى قىركۇيەكتە جىبەرىلەدى.

اعىمداعى جىلدىڭ سوڭىنا دەيىن كودەكس جوباسىنىڭ تولىق ءماتىنى مينيسترلىكتىڭ سايتىندا جاريالانىپ، كەلەسى جىلدىڭ باسىنان باستاپ، قوعام وكىلدەرىنىڭ قاتىسۋىمەن جان-جاقتى تالقىلاۋلار ۇيىمداستىرۋ جوسپارلانۋدا.