شاردارا ماقتاشىلارى بيىل مول ءونىم جينادى، دەپ حابارلايدى وبلىس اكىمدىگىنىڭ باسپا ءسوز قىزمەتى. اۋداندا 12 291،2 گەكتار القاپتان مەجەلەنگەن 33 309 توننانىڭ ورنىنا 33 806 توننا ءشيتتى ماقتا جينالدى.

اۋدان ديقاندارى قاجىرلى ەڭبەكتىڭ، اگروتەحنيكالىق تالاپتارعا ساي ماقتانى كۇتىپ-باپتاۋ شارالارىن ءوز دەڭگەيىندە اتقارعانىنىڭ ناتيجەسىندە جوعارى كورسەتكىشكە جەتتى.

گەكتار ونىمدىلىگىن 27،5 سەنتنەردەن اينالدىرعان ديقاندار قاۋىمى وسىلايشا ەرەن ەرلىكتىڭ ۇلگىسىن كورسەتىپ وتىر. مول ونىمگە قول جەتكىزۋدە ق.تۇرىسبەكوۆ، كوكسۋ جانە الاتاۋ باتىر اۋىلدىق وكرۋگىنىڭ ماقتاشىلارى سۇبەلى ۇلەستەرىن قوستى. سونداي-اق، جاۋشىقۇم اۋىلىندا تامشىلاتىپ سۋارۋ ادىسىمەن 240 گەكتارعا ماقتا ەگىپ وتىرعان «ءيىرجار اگرو» جشس-ى دا مول ءونىم الۋعا قول جەتكىزدى. سەرىكتەستىك ديقاندارى مەجەلەنگەن 960 توننا ءشيتتى ماقتانىڭ ورنىنا 1224 توننا ماقتا الىپ، ءار گەكتاردان ورتاشا 51 سەنتنەردەن ءونىم جينادى.

كوكسۋ اۋىلدىق وكرۋگىندەگى «توقاي» شارۋاشىلىعىنىڭ ءتوراعاسى اسان ادىلبەكوۆ بيىل دا گەكتار ءتۇسىمىن ارتتىرىپ وتىر. مايتالمان ماقتاشىنىڭ قاراماعىنداعى 9،5 گەكتار القاپتىڭ ءار گەكتارىنان 61،4 سەنتنەر ءونىم جينالعان. الاتاۋ باتىر اۋىلىنداعى دۇيسەن لەسوۆ باسشىلىق جاسايتىن «راحىمجان» شارۋا قوجالىعى 15 گەكتار ماقتالىقتان 47 سەنتنەردەن ءونىم اينالدىردى.

جەكەلەگەن ماقتا تەرىمشىلەر اراسىندا كوكسۋلىق دۇيسەنكۇل سەركەبايعا ىلەسەتىن ادام بولعان جوق. جيىن-تەرىم ناۋقانى باستالعالى د.سەركەباي 20 گەكتار ماقتالىقتىڭ ءار گەكتارىنان 61،2 سەنتنەردەن ماقتا تەرىپ، قىرمانعا 123 توننا اق ۇلپا جينادى.

ماقتاشىلاردىڭ مەجە جوسپارىن ارتىعىمەن ورىنداعان كورسەتكىشى تۋرالى اۋدان اكىمى ارمان ابدۋللايەۆ وبلىس باسشىسى جانسەيىت تۇيمەبايەۆقا ارنايى راپورت جولدادى. قازىرگى تاڭدا اۋىلدىق وكرۋگتەردە ماقتا جيناۋ ناۋقانى تولاستاعان جوق. شارۋالار القاپتاعى ءونىمدى جاۋىن-شاشىنعا ۇرىندىرماي جيناپ الۋ ءۇشىن ۋاقىتپەن ساناسپاي ەڭبەك ەتۋدە.

http://www.zhebe.com/