جەكە كاسىپپەن اينالىسۋ، ءوز بەتىنشە ارەكەت ەتىپ، نان تابۋ كوپتىڭ قاپەرىنە كىرسە دە ۇلكەن ءىستى باستاۋعا كەلگەندە كوپشىلىكتىڭ جۇرەگى داۋالاماي جاتادى. دەسەك تە مال اسىراپ، ونى كوبەيتىپ، داۋلەتىن ارتتىرۋعا بەل بۋعان قانداستارىمىز بارشىلىق.
ماسەلەن تۇلكىباس اۋدانىنا قاراستى مىڭباي اۋىلىنىڭ تۇرعىنى «قازاگرو» حولدينگىنىڭ ەنشىلەس كومپانياسى بولىپ تابىلاتىن «اۋىل شارۋاشىلىعىن قارجىلاي قولداۋ قورى» اق مەن يسلام دامۋ بانكىنىڭ بىرىگىپ جۇزەگە اسىرىپ جاتقان شاعىن نەسيەلەۋ باعدارلاماسى اياسىندا ءبىرىنشى بولىپ قارجىلاندىرىلىپتى.
اياداي عانا اۋىلدا تىرشىلىك ەتىپ جاتقان حالىقتىڭ نەگىزگى تابىس كوزى اۋىل شارۋاشىلىعى ەكەن. سونىڭ ىشىندە مال شارۋاشىلىعى. تۇلكىباس اۋدانى نەگىزىنەن مال باعۋعا وتە قولايلى ايماق بولىپ سانالادى. ءشوبى شۇيگىن، جەرى قۇنارلى. وسىنى ءتيىمدى پايدالانۋدى كوزدەگەن اۋىل تۇرعىنى ايتمۇقان تىلەۋىشوۆ «ءساتتى» دەپ اتالاتىن نەسيەلىك باعدارلاما بويىنشا 4 جىلعا 2 ملن تەڭگە كولەمىندە نەسيە الىپ، 11 باس سيىر ساتىپ الىپتى. قورا-قوپسىسى مەن جەم-شوبىن نەسيە الماس بۇرىن دايىنداپ قويسا كەرەك. ءوتىنىش بەرگەن ۋاقىتتان باستاپ نەسيە الۋشىنىڭ مۇمكىندىگىن سارالاعان بانك قىزمەتكەرلەرى اقىرىندا ءوتىنىشتى قاناعاتتاندىرىپ، سۇراعان اقشاسىن بەرىپ، ءتىپتى سيىرلاردى ساتىپ الۋعا دا جاردەمدەسىپتى.
بۇعان دەيىن جىلقى بورداقىلاۋمەن اينالىسىپ كەلگەن ايتمۇقان شارۋانىڭ جاس تا بولسا مالدىڭ ەبىن تابا بىلەتىن ىسكەر جىگىت ەكەنى كورىنىپ تۇر. قورا-قوپسى دا جاۋراۋىق كەلەتىن سيىر مالى ءۇشىن جىلى ەتىپ جاسالىپتى، ءبىر سوزبەن ايتقاندا تالاپقا ساقاداي ساي. نەسيەگە وسىلايشا سيىر العانىنا ريزا. ايتۋىنشا، جاقسى پايدا كورەيىن دەپ تۇر. 11 سيىردىڭ بارلىعى تولدەپ ۇلگەرگەن. 11 باس 22-گە كوبەيىپتى. نەبارى جارتى جىلدىڭ ىشىندە بۇزاۋلارى ەت الىپ، ءوسىپ شىعا كەلگەن. ەندى ءبىراز وسىرگەننەن كەيىن بازارعا شىعارماقشى نەمەسە ەتتەي ساتپاق ويى بار. وسىلايشا بىر-ەكى جىلدىڭ ىشىندە كەتكەن شىعىندى تولىعىمەن اقتاپ الام دەيدى.
ودان قالسا بۇل سيىرلار كۇنىنە ەڭ كەمى 11 ليتر ءسۇت بەرەتىن كورىنەدى. 11 سيىر كۇن سايىن 11 ليتردەن ءسۇت بەرسە 120 ليتر ءسۇت ءونىمىن تاياۋ ماڭداعى اتى وڭتۇستىك وڭىرگە كەڭىنەن تانىمال بوپ كەتكەن قارابۇلاق اۋىلىنىڭ بازارىنا اپارىپ كوتەرمە باعامەن ساتادى. ءار ءليترىن 60-70 تەڭگەدەن. سوندا ءسۇتتىڭ وزىنەن كۇنىنە 7-8 مىڭ، جىلىنا 2-3 ملن تەڭگە تازا تابىس تابادى. مىنە ەسەپ. جالپى نەسيەنى ۇستەماقىسىمەن قوسا ەسەپتەگەندە وسى ءسۇتتى ساتۋدان تۇسەتىن پايدامەن-اق جاۋىپ تاستاۋعا تولىق مۇمكىندىك بار دەيدى ايتمۇقان باۋىرىمىز. ال، بۇزاۋلاردان تۇسەتىن پايدا ءوز الدىنا بولەك اڭگىمە. ول بۇزاۋلار ارى كەتسە بىر-ەكى جىلدا ۇلكەن سيىرعا اينالىپ شىعا كەلەدى. وسىلايشا مال باسىن كوبەيتىپ، ارتىعىن ساتىپ، نەسيەدەن دە ءبىرجولا قۇتىلىپ، وتباسىن تولىق اسىراۋعا جاعدايلارى جەتەتىن بولادى. ارينە ەڭبەك ەتسەم دەپ تالپىنعان شارۋانىڭ پايداعا كەنەلۋىنە اۋەلى قۇداي جاردەمشى، سوسىن بازارداعى نارىققا بايلانىستى بولماق. ازىرگە تەڭگەمىز قۇنىن جوعالتپاي، نارىق تا ءبىرشاما رەتتەلىپ، تۇراقتالىپ قالدى. وسى سەبەپتى دە نەسيە الۋعا تاۋەكەلگە بارعان ۇقسايدى.
شىندىعىنا كەلگەندە بۇگىندە حالىقتىڭ نەسيەلىك ۇيىمدارعا دەگەن كوزقاراسى ەكى ءتۇرلى. بىرەۋلەر نەسيەگە مۇلدە جولاماۋ كەرەك دەگەنگە بەكىپ السا، ەندى بىرەۋلەر تاۋەكەلگە بەل بۋىپ، قارىزعا اقشا الىپ، ءىسىن باستاپ جاتىر. قۇدايعا شۇكىر، قازاق مالدىڭ جايىن بىلەتىن حالىق قوي. ال مال باققانىڭ قاشاندا قارنى توق بولارى ءسوزسىز. ال ەندى مەملەكەت قولداۋ تانىتىپ، ءىستىڭ كوزىن كورسەتىپ جاتسا ءبارىمىز جابىلىپ وسى بەرەكەلى ءىستىڭ وركەن جايۋىنا اتسالىسقانىمىز دۇرىس سەكىلدى. سەبەبى اۋىلداعى اعايىننىڭ جاعدايى دۇرىستالسا، بۇكىل ەلدىڭ الەۋەتى كوتەرىلدى دەي بەرىڭىز.
