جاڭا ءىس باستاعان وڭتۇستىك­قازاق­ستاندىق كاسىپكەردىڭ ەڭبەگى تۋرالى ورايى كەلگەندە ايتا كەتكەندى ءجون سانادىق. سايرام اۋدانى مانكەنت اۋىلىنىڭ تۇرعىنى ميراليم ميرابدۋللايەۆ تاياۋدا «جۇمىسپەن قامتۋ-2020» باعدارلاماسى بويىنشا فەرمەرلىك شارۋاشىلىق قۇرىپ، ءوزىنىڭ جەكە بيزنەسىن اشتى.

بىرنەشە جىلدان بەرى ەكى قولعا ءبىر جۇمىس تاپپاعان ءۇش بالانىڭ اكەسى ميراليم ميرحادي ۇلى وتباسىن اسىراۋعا شاماسى ارەڭ جەتىپ كەلگەن. 2011 جىلدىڭ قاراشاسىندا اۋىل تۇرعىنى جەرگىلىكتى جۇمىسپەن قامتۋ ورتالىعىنا بارىپ، ول جەردەگى ماماندار ازاماتقا كاسىپكەرلىك نەگىزىن ۇيرەنۋگە كەڭەس بەرەدى. ميراليم ميرابدۋللايەۆ وقۋ كۋرسىنا جازىلىپ، بۋحگالتەريا نەگىزدەرىن، جوس­پارلاۋ، كاسىپكەرلىك نەگىزدەرى مەن ماركەتينگ نەگىزدەرىن ۇيرەنىپتى. «سايرام اۋدانىندا ءىرى قارا مال ءوسىرۋدى ۇيىمداستىرۋ» بويىنشا بيزنەس-جوسپار جازىپ، ونى ءساتتى قورعاپ شىققان. ءسويتىپ، بۇل كاسىبىن جۇزەگە اسىرۋعا شاعىن نەسيە ۇيىمىنا جولداما الادى.

ءسويتىپ جۇرگەندە بىلتىر قاڭتار ايىندا كەپىل مۇلىگى باعالانىپ، حالىققا قىزمەت كورسەتۋ ورتالىعى كەلىسىمشارتتى تىركەگەن سوڭ جوباسىن ىسكە اسىرۋعا بانك 1 ملن. تەڭگە نەسيە بەرسە كەرەك.

«ءقازىر مەنىڭ وتىز شاقتى ءىرى قارا مالىم بار. كاسىبىمنىڭ وركەندەپ كەلە جاتقانىن ماقتانىشپەن ايتا الامىن. ەندى «جۇمىسپەن قامتۋ-2020» باعدارلاماسى بويىنشا مەملەكەتتىڭ قولداۋ كورسەتۋى ارقاسىندا وتباسىمنىڭ بولاشاققا دەگەن سەنىمى ارتا ءتۇستى. مەملەكەت باسشىسىنا جانە باسقا دا كومەك قولىن سوزعان ازاماتتارعا العىسىم شەكسىز. باعدارلامانىڭ ارقاسىندا باعىم جاندى»، – دەيدى ميراليم ميرابدۋللايەۆ.

ونىڭ بولاشاقتا ىسكە اسىرامىن دەگەن ارمان-تىلەگى كوپ. ۇرعاشى سيىر تۇقىمىن الىپ، قوي ءوسىرىپ، مال ۇستايتىن قورا-قوپسى سالماقشى. كەيىن اۋىلداستارىن دا جۇمىسپەن قامتىماق ويى بار.

ەستەرىڭىزگە سالا كەتسەك، «جۇمىسپەن قامتۋ-2020» باعدارلاماسىنىڭ ماقساتى تۇراقتى جانە ناتيجەلى جۇمىسپەن قامتۋ ارقىلى حالىق تابىسىن ارتتىرۋ بولىپ تابىلادى. قازاقستاننىڭ ۇدەمەلى يندۋستريالىق-يننوۆاسيالىق دامۋى ەڭبەك نارىعى كوكجيەگىنىڭ كەڭەيۋىنە مۇمكىندىك بەرۋدە. ءوزىن-وزى جۇمىسپەن قامتيتىن، جۇمىسسىز جانە از قامتىلعان حالىقتى جاڭا وندىرىستىك، اۋىلشارۋاشىلىق كاسىپورىندار مەن ءىرى ينفروقۇرىلىمدىق جوبالارعا تارتۋ مەملەكەتتىڭ باستى مىندەتى، كەدەيلىك كورسەتكىشىن تومەندەتۋ ماسەلەسىن شەشۋگە كومەكتەسەدى.

اقجول كەنتپايەۆ