ق ر ۇلتتىق اكادەميالىق كىتاپحاناسىندا «نارتۇلعا» اتتى جاڭا كىتاپتىڭ تۇساۋى كەسىلدى. كىتاپقا ەلباسى نۇرسۇلتان نازاربايەۆتىڭ قازاقستان تاۋەلسىزدىگىن تۇعىرلى ەتۋ، قوعامداعى تۇراقتىلىقتى ساقتاۋ، قازاقستانداعى جانە الەمدەگى قاۋىپسىزدىكتى قامتاماسىز ەتۋ تۇرعىسىنداعى باتىل باستامالارى مەن بىرەگەي يدەيالارى ارقاۋ بولعان، - دەپ حابارلايدى BAQ.kz.
تۋىندى اۆتورى قايرات بيسەمبايەۆ ۇلت ليدەرىنىڭ اتوم قارۋىنان باس تارتۋ، الەمدىك ءدىنباسىلاردىڭ باسىن قوسۋ، قازاقستان حالقى اسسامبلەياسىن قۇرۋ جانە استانانى ارقاعا كوشىرۋ سەكىلدى تاعدىرلى شەشىمدەرىنە تەرەڭ ۇڭىلە وتىرىپ، ونىڭ قايراتكەرلىك، كوشباسشىلىق قاسيەتتەرىن ءتۇرلى قىرىنان اشا تۇسەدى.
بۇل رەتتە اۆتور قازاقستان پرەزيدەنتى جايىنداعى ءوز ويىن الەمنىڭ اسا كورنەكتى ساياسي كوشباسشىلارىنىڭ پىكىرلەرىمەن كومكەرىپ، قىزىقتى ەتىپ جەتكىزەدى.
سونداي-اق، ءتورت تاراۋدان تۇراتىن كىتاپتىڭ ءتىلى قاراپايىم، مازمۇنى تاريحي دەرەكتەر مەن ەستەلىكتەرگە باي.
«ءبىز تاۋەلسىزدىكتىڭ العاشقى جىلدارىنداعى قيىنشىلىقتى دا، سول ءبىر كەزەڭنەن جاس مەملەكەتتى پرەزيدەنتىمىزدىڭ قانداي قاجىر-قايراتپەن الىپ شىققانىن دا، ەلىمىزدىڭ جاڭا عاسىردا جاڭا بەلەستەرگە قالاي قانات قاققانىن دا كوردىك. بۇگىندە سونىڭ ءبارىن وي ەلەگىنەن وتكىزە وتىرىپ، نۇرسۇلتان نازاربايەۆتىڭ ەڭبەگىنە ىشتەي قايران قالامىن. سول سەزىم قولىما قالام الىپ، مەنى وسى كىتاپتى جازۋعا جەتەلەدى» – دەيدى كىتاپ اۆتورى.
شارا بارىسىندا كىتاپتىڭ مازمۇنى كەڭىنەن اشىلىپ، شىعارما تۋرالى مەملەكەت جانە قوعام قايراتكەرلەرى پىكىر ءبىلدىردى.
