بۇگىن استانادا قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن تاۋەلسىزدىكتىڭ 25 جىلدىعىنا ارنالعان سالتاناتتى جيىن ءوتتى. وندا ق ر پرەمەر-مينيسترىنىڭ ورىنباسارى يمانعالي تاسماعامبەتوۆ ءسوز سويلەپ، تاۋەلسىزدىك تۋرالى ءوز وي-تولعامىن ەرەكشە تەبىرەنىسپەن جەتكىزدى. بۇل تۋرالى  ق ر پرەمەر-مينيسترى ورىنباسارىنىڭ باسپا ءسوز قىزمەتى حابار تاراتتى.

"ءيا، ادام ءۇشىن الاڭسىز ءومىر ءبىر باقىت بولسا، حالىق ءۇشىن تاۋەلسىز بولۋ - مىڭ باقىت! ال "باقىت" دەگەنىمىز ورىندالعان اق ارمان. اشىعىن ايتۋ كەرەك. بۇل جولعى ب ا ق - ءبىزدىڭ ماڭدايىمىزعا بۇرىن-سوڭدى قونباعان ب ا ق. وعان وسىناۋ سايىن دالامىزدىڭ كوزى، ءاز اتالارىمىزدىڭ ءسوزى، اقباس تاريحتىڭ ءوزى كۋا. ءوز الدىنا ەل بولامىن دەگەن حالقىمىزدىڭ سوناۋ تۇركى قاعاناتىنان جالعاسقان 15 عاسىرلىق تامىرى، 1500 جىلدىق عۇمىرى كۋا"، - دەدى يمانعالي تاسماعامبەتوۆ.

سونداي-اق، يمانعالي تاسماعامبەتوۆ VI عاسىرداعى كوك تۇركىلەر زامانىنان بەرى ۇلى دالادا ءىزى قالعان قاعاناتتار مەن حاندىقتاردى 128 قاعان مەن حان بيلەگەنىن ايتا كەلە،  ولاردىڭ ەشقايسىسى ەلىنىڭ شەكاراسىن شەگەلەي الماعانىن ايتتى.

"ەشقايسىسى ەلىنە ءقاۋىپ تونبەيتىندەي ەتىپ، بارىمەن كەلىسىم جاساي العان جوق. ەشقايسىسى ەلىندە قوي ۇستىنە بوزتورعاي جۇمىرتقالاعان بەيبىت زامان ورناتىپ، تاتۋلىققا ۇيىتا العان جوق. ەشقايسىسى مەملەكەتىن الەمنىڭ التى قۇرلىعىنا بىردەي مويىنداتا العان جوق. ەشقايسىسى بارشا ادامزات بالاسىن ىمىراعا شاقىرىپ، كەلىسىم ءسوزىن جۇرگىزە العان جوق. ەشقايسىسى ەشقاشان مىزعىماس استاناسىن سالا العان جوق. ال، ەلباسى نۇرسۇلتان نازاربايەۆ وسىنىڭ ءبارىن ءبىر ءوزى جاسادى"، - دەدى ۆيسە-پرەمەر تاۋەلسىزدىكتىڭ 25 جىلدىعىنا ارنالعان سالتاناتتى جيىندا سويلەگەن سوزىندە.

سونىمەن قاتار، ق ر تاۋەلسىزدىگىنىڭ 25 جىلدىعىنا ارنالعان سالتاناتتى جيىندا ۆيسە-پرەمەر يمانعالي تاسماعامبەتوۆ ءسوز سويلەپ، حالىقتى ەلدىڭ بىرلىگى مەن بەيبىت تىرلىگىن ساقتاۋعا ۇندەدى.

"مۇنداي ءداۋىرلى وي مەن ءدۇبىرلى ىستەردىڭ تۇبىندە ءبىر عانا بولەك دۇنيە - ءاربىر قازاق كۇنى-تۇنى قاپەرىنەن شىعارماي، ىشتەي تاۋبە ەتەتىن، ەلباسىمىز ءار سوزىنەن تاستاماي، ايتىپ جۇرەتىن ۇلى قۇندىلىق جاتىر. ول - ەلدىڭ اماندىعى. بىرلىگى مەن بۇگىنگى بەيبىت تىرلىگى. بەرەكەسى مەن ىرىسى"، - دەپ ءسوزىن جالعاستىردى ۆيسە-پرەمەر يمانعالي تاسماعامبەتوۆ.

بۇل رەتتە يمانعالي تاسماعامبەتوۆ كەشەگى كەڭەستىك جۇيە قيراپ، باۋىرلاس ەلدەرىمىزدىڭ باسىنا تۇسكەن قيىن زامانداردان مىسال كەلتىردى.

"فەرعانا مەن وش ۇلتارالىق قاقتىعىستارىنىڭ ناتيجەسى -1500 ءولىم، 10 مىڭ مۇگەدەك، 35 مىڭ بوسقىن؛ ابحاز-گرۋزين سوعىسى - 9 مىڭ ءولىم، 10 مىڭ مۇگەدەك، 300 مىڭ بوسقىن؛ قاراباق سوعىسى - 30 مىڭ ءولىم، 150 مىڭ مۇگەدەك، 1 ميلليون بوسقىن؛ تاجىكستانداعى ازاماتتىق سوعىس - 60 مىڭ ءولىم، 280 مىڭ مۇگەدەك، 1،5 ميلليون بوسقىن. بۇل ءجاي عانا ساندار ەمەس. تاتۋلىقتىڭ تامىرىن،ىنتىماقتىڭ ىرىسىن، بەيبىتشىلىكتىڭ ءقادىرىن بىلەتىن تاعدىرلار"، - دەپ ايتتى ۆيسە-پرەمەر ق ر تاۋەلسىزدىگىنىڭ 25 جىلدىعىنا ارنالعان سالتاناتتى جيىندا.

Cونداي-اق، ق ر تاۋەلسىزدىگىنىڭ 25 جىلدىعىنا ارنالعان سالتاناتتى جيىندا ءسوز سويلەگەن ق ر پرەمەر-مينيسترىنىڭ ورىنباسارى يمانعالي تاسماعامبەتوۆ ەلدىڭ اماندىعى، بەيبىتشىلىك تۋرالى ايتا كەلە، اقش-تىڭ 34ء-شى پرەزيدەنتى دۋايت ەيزەنحاۋەردىڭ سوعىس تۋرالى ايتقان ءسوزىن مىسالعا كەلتىردى.

"ەكى بىردەي دۇنيەجۇزىلىك سوعىسقا قاتىسقان، اقش-تىڭ 34ء-شى پرەزيدەنتى دۋايت ەيزەنحاۋەر: "قانشا ادىلەتتى بولسا دا، ەشقانداي سوعىس بالانىڭ ءبىر تامشى اششى جاسى مەن انانىڭ ءبىر تال اعارعان شاشىنا تاتىمايدى. سوعىسۋ ونەر ەمەس، ال سوعىستا جەڭۋ ەرلىك ەمەس. ناعىز ەرلىك پەن داڭق - قاراپايىم حالىقتىڭ ماڭداي تەرى - ەڭبەگىندە. تاريحتىڭ شىنايى قوشامەتىنە دە سول ەلدى ەڭبەككە باۋلىپ، تابىسقا جەتەلەگەن تۇلعا عانا لايىق!" دەگەن ەكەن"، - دەدى ۆيسە-پرەمەر بىرلىك پەن بەيبىتشىلىك ماڭىزىن باسا ايتا وتىرىپ.