بۇگىن استاناداعى تاۋەلسىزدىك سارايىندا ەل تاۋەلسىزدىگىنىڭ 25 جىلدىعىنا ارنالعان سالتاناتتى شارا ءوتىپ، وندا ەلباسى نۇرسۇلتان نازاربايەۆ بارشا قازاقستاندىقتاردى باس مەرەكەمەن قۇتتىقتادى.

جيىنعا قاتىسقان كورنەكتى مەملەكەت قايراتكەرلەرى، ءتۇرلى سالانىڭ وكىلدەرى دە ءسوز الىپ مىنبەگە كوتەرىلدى. ءبىر قىزىعى پرەزيدەنت نازاربايەۆ وسى شيەك عاسىر ۋاقىت ىشىندە قازاقستاننىڭ وتكەن جولىن، جاس مەملەكەتتىڭ كەز بولعان قيىندىقتارىن جىپكە ءتىزىپ، نەبىر قيىن بەلەستەردى جۇدىرىقتاي جۇمىلعان حالىق بىرلىگى ارقاسىندا وتكەنىن ايتىپ، ەلدىك پەن ەگەمەندىكتىڭ ءمان-ماڭىزىنا توقتالسا، مىنبەرگە كوتەرىلگەندەر ەلباسىنى كوزىنشە ماقتاپ، وسى جىلدار ىشىندە اتقارىلعان بارلىق شارۋالار تەك ءبىر كىسىنىڭ ەڭبەگى دەپ كورسەتۋگە تىرىستى. باس پارتيا جەتەكشىسىنىڭ ءبىرىنشى ورىنباسارى دا، ۇلتتىق رۋحانيات جاناشىرى اتالىپ جۇرگەن ۆيسە-پرەمەر دە، ولاردان كەيىن ءسوز العان سپورتشى، دارىگەرلەر دە سالتاناتتى شارانى تاۋەلسىزدىككە ارنالعان جيىن ەمەس، ەلباسىنىڭ تۋعان كۇنى نەمەسە تۇڭعىش پرەزيدەنت كۇنى دەپ قابىلداپ قالسا كەرەك.

ىڭعايسىزدىقتان جيىننىڭ سوڭىنا قاراي ەلباسىنىڭ ءوزى قۇتقاردى. ءدۇيىم جۇرتقا وزىنە باعىتتالعان ماقتاۋ مەن قولپاشتاۋدىڭ ارتىقتاۋ كەتىپ جاتقانىن انىق اڭعارتتى.

«...بۇگiن مەنiڭ اتىما كوپ اسىرە ماقتاۋ ءسوز ايتىلدى. مەنiڭ جاسىم دا، ءتاجiريبەم دە ۇلكەن، سوندىقتان مۇنداي سوزدەر ماعان اسەر ەتپەيدi، ارينە. شىن ءمانiندە iستەلگەن iستەر تۋرالى ايتىلسا، وندا ءجون، بiراق ودان ارتىق ايتىلماۋى تيiس. دەگەنمەن مەن بارشاڭىزعا جىلى سوزدەرiڭiز ءۇشiن العىس ايتامىن. مۇنىڭ ءبارi مەنi بولاشاق iستەرگە قاناتتاندىرۋ ءۇشiن ايتىلىپ جاتىر دەپ ەسەپتەيمiن. ءدال قازiر مەن قاناتتانىپ وتىرمىن دەپ سiزدەردi سەندiرگiم كەلەدi»، - دەپ كۇلiمسiرەدi ن.نازاربايەۆ.

شىنىمەن دە، ەلباسى ەڭبەگىن ەسكەرەمىز دەپ كوپ اعايىندار اسىرا سىلتەپ جىبەرگەنى بۇل جيىندا دا انىق بايقالدى. سول بايانداماشىلار وسى «اسىرەشەشەندىگىمەن» قازاقستان مەملەكەتتىلىگىنىڭ باستاۋىندا تۇرعان تۇلعا تۋرالى كەرى پىكىر قالىپتاستىرىپ الامىز-اۋ دەگەندى مۇلدەم ويلامايتىن سياقتى.

پرەزيدەنتتەن كەيىنگى بيلىك باسىنداعى ەكىنشى تۇلعا توقايەۆ تا قىرىن كەتكەندەي بولدى. جيىن تىزگىنىن قولىنا الىپ، «شەشەندەردى» كەزەك-كەزەك مىنبەرگە شاقىرىپ وتىرعان ونىڭ وسى جيىرما بەس جىل ىشىندە قازاقشاعا ءالى ءتىلى سىنباعان با دەپ قالدىق. ونىسىن قويىڭىزشى، ەلدەن قالمايىن دەپ ەلباسىنىڭ ادىرىسىنە كەسەك ماقتاۋلار مەن اسەرلى تەڭەۋلەرىن قارشا بوراتقان پارتيالىق ارىپتەسى مۇحتار قۇل-مۇحاممەدتى «كوپ سويلەپ كەتتىڭ» دەگەندەي مىنەپ تاستادى. الايدا، مۇحتاردان كەيىن مىنبەرگە كوتەرىلگەندەر سەنات سپيكەرىنىڭ بۇل ەسكەرتۋىن قىستىرعان دا جوق. ماسەلەن، ۆيسە-سپيكەر يمانعالي تاسماعامبەتوۆ ەلباسىنىڭ قازاقستان دامۋىنداعى رولىنە توقتالا كەلە، قىزدى-قىزدىمەن قازاق تاريحىنداعى 128 حان مەن قاعاننىڭ ءحۇ عاسىرلىق قىزمەتىنەن نازاربايەۆتىڭ 25 جىل ىشىندەگى جۇمىسى اسىپ تۇسەتىنىن ايتىپ، سان سوقتىردى. «سان سوقتىردى» دەۋىمىز بەكەر ەمەس، ەكى اپتا بۇرىن عانا جارامساقتىقتىڭ جاراپازانىنان قاجىپ، ەلباسىنىڭ اتىن استاناعا بەرەيىك دەگەندەردىڭ «ءالاۋلايىن» ارەڭ توقتاتقاندا، ەل سەنگەن ازاماتتىڭ مىنا «شابىسى» كىمدى بولسا دا شامىرقاتقانى ءسوزسىز. الدە، بايانداما كەزەگى الدەبىر مەديسينالىق ورتالىقتىڭ تانىالداۋ نەيروحيرۋگىنان كەيىن تيگەنىنە شامدانىپ تۇرىپ، بايقاماي قالدى ما ەكەن يمەكەڭ؟!

الايدا، جيىندا ءسوز العانداردىڭ ءبارى اسىرە ماقتاۋمەن شەكتەلدى دەي المايمىز. ماسەلەن، كوپ ءىس-شارادا كوزگە تۇسە بەرمەيتىن، ءبىرتوعا قايراتكەر قايرات ءمامي ەرلەگەن سياقتى. ادەتتەگى سارىنمەن ەل دامۋىن ەلباسى ەسىمىمەن بايلانىستىرا كەلە، جوعارعى سوت ءتوراعاسى قازاقستاننىڭ يەسى دە، كيەسى دە كىم ەكەنىن سارايداعىلاردىڭ دا، جيىندى توتە ەفيردەن كورىپ وتىرعان بىلايعى جۇرتتىڭ دا ەسىنە سالارلىق ءسوز ايتتى.

«رەسپۋبليكامىزدىڭ يەسى دە كيەسى قازاق ۇلتى دا وسى ۋاقىت ىشىندە وزگەنى ەلەپ ەكشەپ، ءوزىن تانىتا ءبىلدى. داستۇرسىزدىككە بارمادى، اعايىنشىلدىقتىڭ التىن ارقاۋىن ۇزبەدى، دوستى باۋىرعا، باۋىردى تاۋىرگە اينالدىردى. تاۋەلسىزدىك تۋى توبەمىزدە جەلبىرەگەن جيىرما بەس جىل ۇلتىمىزدىڭ قانىندا مەملەكەت قۇرۋ قابىلەتىنىڭ مولدىعىن دالەلدەدى!». نە دەگەن ءسوز؟! جەر – قازاقتىكى، ەل – قازاقتىكى ەكەنى ەجەلدەن داۋسىز ماسەلە. الايدا، سونى بيىك مىنبەردەن باتىل تۇردە مالىمدەۋگە كوپ جەردە كەرىتارتپالىعىمىز كەدەرگى جاساپ، «تولەرانتتىلىق»، «ۇلتتار دوستىعى» دەگەن سياقتى «كەزەكشى» سوزدەرمەن شەكتەلىپ جاتاتىنىمىز دا وتىرىك ەمەس. سوندىقتان دا، بۇگىنگى جيىندا ايتىلعان ماقتاۋلار مەن توقتاۋسىز جاۋعان ودالاردىڭ ىشىندە ءىلىپ الارلىق ءبىر ءسوز بولسا، ول – وسى قايرات ءماميدىڭ ءسوزى بولدى-اۋ.

جومارت ابدوللا ۇلى