يراكتىڭ پرەمەر-مينيسترى حايدار ءال-يبادي «دايش تەررور ۇيىمى مۇناي قۇدىقتارىن ءبۇلدىرىپ، سۋ مەن مۇنايدى بىر-بىرىنە قوستى» دەدى. ونىڭ ايتۋىنشا، دايش يراكتى وسى ارەكەتىنىڭ كەسىرىنەن 35 ميلليارد دوللار شىعىنعا باتىرعان. ءارى، موسۋلدا ورتەنگەن كۇكىرتتەن ەكولوگياعا اۋىر زارداپ كەلگەن.

سونداي-اق يبادي بەيبىت تۇرعىندارعا دايش جاساعان زۇلىمدىقتاردى ايىپتادى.

ايتا كەتەر بولساق، دايش ۇيىمى سيريا مەن يراكتىڭ ءبىراز بولىگىن باسىپ العان ۋلتراراديكالدى تەررورلىق ۇيىم. ولار وزدەرىن يسلامنىڭ ناعىز قاعيدالارىمەن جۇرەتىن مەملەكەت قۇرامىز دەپ سانايدى. الايدا، ولاردىڭ ارەكەتتەرىنەن مىڭداعان بەيبىت تۇرعان ءتۇرلى جانتۇرشىگەرلىك ولىممەن اجال قۇشسا، جۇزدەگەن تاريحي نىساندار، ەسكەرتكىشتەر مەن مادەني قالدىقتار ءبۇلىندى.  

ەسكە سالا كەتسەك، 17 قازان كۇنى يراك پرەمەر-مينيسترى حايدار ءال-يبادي موسۋل قالاسىن دايش تەرروريستىك ۇيىمىنان ازات ەتۋ وپەراسياسى باستالعانىن جاريالاعان ەدى. قالا 2014 جىلدىڭ ماۋسىم ايىنان بەرى لاڭكەستەر ىقپالىندا قالىپ كەلگەن.

ال ازات ەتۋ وپەراسياسى حالىقارالىق كواليسياسىنىڭ اۋە كۇشتەرى، يراك اسكەري كۇشتەرى جانە كۇردى اسكەرلەرىنىڭ قاتىسۋىمەن جۇرگىزىلدى. كوپ وتپەي وپەراسيا ءوز ناتيجەسىن بەرىپ، يراكتىڭ موسۋل قالاسىن لاڭكەستەردەن ازات ەتۋ وپەراسياسى بارىسىندا ۇكىمەتتىك اسكەري كۇش 13 اۋداندى تازارتتى.