م.اۋەزوۆ اتىنداعى دراما تەاترىنىڭ اكتريساسى شىنار جانىسبەكوۆا «ق ر ەڭبەك سىڭىرگەن قايراتكەرى» اتاعىن الدى. بۇل تۋرالى ونەر يەسى ءوز پاراقشاسىندا جازدى.

شىنار جانىسبەكوۆانىڭ ەسىمى تەاتر، كينو، تەلەارنالار ارقىلى كوپشىلىككە كەڭىنەن تانىس. ادەبيەت پەن ونەردىڭ ورەسىن بىلەتىن اتا-انا تاربيەسىن العان قىزدىڭ ونەر جولىن قالاماۋى دا مۇمكىن ەمەس ەدى. شىنار ت.جۇرگەنوۆ اتىنداعى ونەر اكادەمياسىنا ق ر ەڭبەك سىڭىرگەن قايراتكەرى، پروفەسسور ءرابيعا قانىبايەۆانىڭ سىنىبىنا تۇسەدى. ونى اكەمتەاترعا (مۇحتار اۋەزوۆ اتىنداعى قازاق مەملەكەت­تىك اكادەميالىق دراما تەاترى) قازاقستاننىڭ حالىق قاھارمانى، رەجيسسەر ازەربايجان مامبەتوۆتىڭ ءوزى قابىلدايدى. شىناردىڭ قازاق ونەرى الىپتارىنىڭ كوزىنە ءتۇسۋى دە قىزىق. سوڭعى پارتادا ەلەۋسىز وتىراتىن ستۋ­دەنتتىڭ تاپسىرمانى شىنايى ورىن­داعا­نىنا ريزا بولعان ءرابيعا مۇقاي قىزى «سەندە سەنگىشتىك، تازالىق بار، قىزىم. سەنەن تا­ما­شا ءارتىس شىعادى»، − دەپ بەتىنەن ءسۇيىپ، باتاسىن بەرسە، تەاتر دالىزىندە كەزدەيسوق كورىپ قالعان قىراعى رەجيسسەر جۇمىس ءىز­دە­­گەن جاسقا بىردەن ءان ايتقىزىپ، مونولوگ وقىتادى. قاپىلىستا ىنىسىنەن ايىرىلىپ، كوكىرەگى شەرلى بولىپ جۇرگەن شىنار اقتوقتىنىڭ مونولوگىن جۇرەككە جەتكىزە ورىنداپ، 21 جاسىندا اكەم تەاتردىڭ ءارتىسى اتانادى. سودان بەرى قانشاما رول سومداپ، كورەرمەندەرىنىڭ كوڭىلىن جاۋلادى. اسىرەسە، م.اۋەزوۆتىڭ «ابايىنداعى» اجار، «ەڭلىك-كەبەكتەگى» ەڭلىك، ي.ساپاربايەۆتىڭ «سىعان سەرەناداسىنداعى» يزولدا جۇرتشىلىقتىڭ ەرەكشە ىقىلاسىنا بولەندى.