مەنىڭ «زوبالاڭ» داستانىم ارادا 30 جىل وتسە دە تاعى دا جارىق كورمەپتى!.. كەشە عانا 1986 ج. ايگىلى جەلتوقسان قاسىرەتىنىڭ 30 جىلدىعى بۇكىل ەلىمىزدە، اسىرەسە، قازاق ەلى تاۋەلسىزدىگىنىڭ التىن بەسىگى الماتى شاھارىندا بەلگىلى ءبىر دەڭگەيدە اتالىپ وتكەنى بەلگىلى. الماتى قالاسىنىڭ اكىمدىگى بۇل شارانى وتكىزۋگە قال-قادىرىنشە كوڭىل ءبولىپ، جەلتوقسان قۇرباندارىنا اس بەرىپ، زارداپ شەككەندەرگە كومەك قولىن سوزىپ دەگەندەي جۇمىس اتقارعانى تۋرالى وسىنىڭ الدىنداعى حابارىمدا ايتقانمىن.
...بۇل ارادا مەن سول ايگىلى جەلتوقسانعا قاتىسقان، ول جونىندە «ازاتتىق» راديوسىنا تۇڭعىش رەت حابار تاراتقان ازامات، «زوبالاڭ» داستانىن جازعان اقىن رەتىندە كوڭىلىمە قاياۋ تۇسىرگەندەي بولعان مۇلدەم باسقا ءبىر اڭگىمەنى ايتايىن دەپ وتىرمىن...
جەلتوقساننىڭ 30 جىلدىعى قارساڭىندا استانادا تۇراتىن ءىنىم، جەلتوقسانشى قۇرمانعازى راحمەتوۆتەن ولار شىعارىپ جاتقان كىتاپتارىندا مەنىڭ قانداي ەڭبەگىم كىرگەنى تۋرالى سۇراعانىمدا، ول مەنىڭ «زوبالاڭ» اتتى داستانىمنىڭ، «زوبالاڭ» داستانى قالاي دۇنيەگە كەلدى؟» دەگەن ماقالامنىڭ تولىق ەنگەنىن ايتىپ، مەنەن ءسۇيىنشى سۇراعانداي بولعانى بار. ارادا وتكەن 30 جىلدان كەيىن ەلىمىزدە تۇڭعىش رەت باسپا ءجۇزىن كورىپ وتىرعان «زوبالاڭ» داستانىم تۋرالى قالىڭ جۇرتشىلىقتان ءسۇيىنشى سۇراپ، حابار تاراتقانىم جۇرتشىلىق ەسىندە بولار دەيمىن؟ وسى بولات تولەپبەرگەنوۆتىڭ قۇرمانعازى راحمەتوۆتىڭ باسشىلىعىندا شىعارعان «1986-2016. رۋح پەن ار» دەگەن كىتابىنىڭ تۇساۋكەسەرى بولىپ، وعان ءبارىمىز قاتىسىپ، شىرەنىپ تورگە وتىرىپ، كىتاپتىڭ تۇساۋىن ءوز قولىمىزبەن كەسىپ، مارە-سارە بولعانىمىز ەسىمدە. جەلتوقسان قۇرباندارىن ەسكە الاۋعا بايلانىستى شارالارعا قاتىسىپ جۇرگەندىكتەن ارادا وتكەن ەكى-ۇش كۇننىڭ ىشىندە مەنىڭ «زوبالاڭ» داستانىمنىڭ تولىق نۇسقاسى ەنگەن ول كىتاپقا قاراۋعا قولىم تيمەدى. 18.12.2016 ج.، جەكسەنبىدە سول «ار مەن رۋح» كىتابىن باستان-اياق شولىپ قاراپ شىقتىم. «زوبالاڭ» داستانىنىڭ اتى دا، زاتى دا جوق بولىپ شىقتى. وسى جەلتوقسان قاسىرەتىنە قاتىسقان، ول تۋرالى تۇڭعىش رەت جازىپ، شەتەلگە تاراتقان مەن تۋرالى دا ءبىر اۋىز دەرەك جوق بولماي شىقتى. راس، كىتاپتا بۇرىنىراقتا تۇسكەن ەكى فوتوسۋرەتىم ءجۇر. وندا «جۇماش كوكبورى كىم؟» جانە «بۇل ارادا نەعىپ جۇرگەنى» تۋراسىندا دەگەننەن باسقا مەن جايلى تيتتەي دە اقپارات بولماي شىقتى. سوندا بۇنى قالاي تۇسىنۋگە بولادى؟ كىمدى كىم، نە ءۇشىن الداپ وتىر جانە مەنى الدايتىنداي ولاردىڭ باسىنا نە كۇن تۋدى ەكەن دەگەن زاڭدى سۇراق تۋىندايدى؟
«زوبالاڭ» داستانىنىڭ اۆتورى، اقىن، جۇماش كەنەباي
