وڭتۇستىك قازاقستان وبلىسى قازىعۇرت اۋدانى «دايان» شارۋا قوجالىعىندا ارنايى كاسىپورىن يەلەرىنە جابىق توپىراقتا ليمون ءوسىرۋ تۋرالى شەبەرلىك سىنىپتارىن ءجيى وتكىزىپ تۇرادى.سەبەبى، بۇل شارۋاشىلىق ءتۇرىن دامىتىپ، قولعا العاندار كەمدە-كەم.

         "دايان" شارۋا قوجالىعى 2008 جىلى قىزاناق پەن قيار ءوسىرۋ ءۇشىن 8 جىلىجاي سالعان. العاشىندا جۇمىستارى جاقسى جۇرەدى. الايدا سوڭعى جىلدارى باسەكەلەستەر كوبەيىپ، كوكونىستەردى وتكىزۋ قيىنعا سوققان. شارۋاشىلىقتىڭ جۇمىسىمەن جاقىنىراق تانىسىپ، شارۋا قوجالىڭىنىڭ باسشىلىعىمەن سويلەستىك.

«سول كەزدە ءبىز ءبارىن باسىپ وزۋعا بەل بۋدىق»، – دەيدى «دايان» ديرەكتورى ءماناتالى تاڭسىقبايەۆ. – ليموندى قالاي ءوسىرۋ كەرەكتىگىن كورۋ ءۇشىن وزبەكستانعا باردىق. قايتاردا بىرنەشە كوشەتىن الىپ كەلىپ، ءوزىمىزدىڭ جىلىجايعا وتىرعىزدىق. اراعا ەكى جىل سالىپ، ول جەمىسىن بەرە باستادى. ءقازىر ورتا ەسەپپەن العاندا ءار اعاشتان 15 مىڭ كيلوگرامداي جەمىس الامىز. ءبىزدىڭ قازىعۇرتتىڭ ليموندارى شىمكەنت پەن الماتىدا جانە رەسەي قالالارىندا وتە جاقسى وتەدى. بۇل جەمىسكە سۇرانىس جىل سايىن ارتىپ كەلەدى.

بۇل سيترۋستىك جەمىستى ءوسىرۋ ءۇشىن تاڭسىقبايەۆتار (بۇل وتباسىلىق كاسىپ) ءتۇرلى ليمون وسىرەتىن ءتالىمباقتاردى ارالاپ، بارلىعىن ساناپ شىققان. «بۇل كاسىپتىڭ كىرىسىن دە، شىعىسىن دا ءبىز جان-جاقتى ويلاندىق. باسقا جەمىستەر سەكىلدى بۇعان دا كوپ كۇتىم كەرەك. ءبىراق ءبىر كۇنى ءبىر اعاشتان 135 كيلوگرامم ليمون تەرىپ العان ادامداردى ءوز كوزىمىزبەن كورگەندە قىزىعۋشىلىعىمىز ادان سايىن وياندى. ءسويتىپ، وتىز كۇن ويلانىپ، قىرىق كۇن تولعانىپ «مەيەر» دەپ اتالاتىن ليون سورتىن ءوسىرۋدى قولعا الدىق».

العاشقى جىلدارى قىزىق ءۇشىن ءار اعاشتان قانشا ليمون العانىمىزدى سانايتىنبىز. رەكوردتىق كورسەتكىشىمىز – 35 كيلوگرامم (282 ليمون). بۇل رەكوردتى ءالى ەشبىر اعاش قايتالاعان جوق.

«دايان» شارۋا قوجالىعى ءوز دەگەندەرىنە جەتتى. ەندى ولار ءوز تاجىريبەسىن وزگەلەرمەن ءبولىسۋدى ءجون كورىپ وتىر. قازىعۇرت اۋدانى كاسىپورىن يەلەرىن قابىلداۋ ورتالىعىنىڭ ديرەكتورى اسقار اۋباكىروۆ: «ليمون ءوسىرۋ – كەرەمەت باستامالاردىڭ ءبىرى. ول كوپ ۇزاماي ءبىزدىڭ اۋدانىمىزدىڭ برەندىنە اينالارى ءسوزسىز» دەيدى.

قازىعۇرت اۋدانى گەوگرافيالىق ورنى جاعىنان وتە جاقسى جەردە ورنالاسقان. سوندىقتان جاقىندا بۇل جەرگە تاجىريبە رەتىندە بانان اعاشىنىڭ دا كوشەتتەرىن وتىرعىزىپ كوردى. شارۋا قوجالىعىنىڭ ديرەكتورى الداعى ۋاقىتتاردا ونى بولەك جىلىجايعا وسىرەتىنىن ايتتى. سەبەبى ليمون مەن بانان جەمىستەرىنىڭ تەمپەراتۋرالىق تارتىپتەرى سايكەس كەلمەيدى. 

بۇيىرسا "دايان" شارۋا قوجالىعى بانان جەمىسىن دە ءوسىرىپ، ساتىلىمعا قويادى.

اقەركە ايان قىزى