تۇركىستاننىڭ تۋماسى، جازۋشى، كوسەمسوزشى، ادەبيەت سىنشىسى يگىلىك ايمەننىڭ جاعدايى قيىن ەكەن. ول كىسى بۇگىندە استاناداعى «كوكتالدان» پاتەر جالداپ تۇرىپ جاتىر. ءوزى ەكىنشى توپتاعى مۇگەدەك. از عانا زەينەتاقىسىن پاتەر جالداۋ مەن ەمدەلۋگە ازەر جەتكىزىپ، كەيدە اپتالاپ قارا ناندى عانا تالعاجاۋ ەتەتىن كۇندەرى بولادى دەپ حابارلايدى baq.kz
– يگىلىك اعا، جاعدايىڭىزدى ەستىگەن سوڭ حابارلاسىپ تۇرعان ەدىك، ءقازىر ءحالىڭىز قالاي؟
– جاعدايدىڭ نەسىن سۇرايسىڭ، قاراعىم، كەزىندە جاقسى ءومىر ءسۇرىپ ەدىك، ەندىگى تىرشىلىك مىناۋ. ايەلىم وسىدان جەتى جىل بۇرىن قايتىس بولعان. جالعىز ۇلدى ەنەسى مەن كۇيەۋدەن قايتىپ كەلگەن قايىنبيكەسى ورتالاپ، ءويتىپ-بۇيتىپ ءجۇرىپ ۇيىنە كىرگىزىپ الدى. اۋىلداعى ءۇيدى ساتىپ، 25 مىڭ دوللار بانككە قۇيىپ، يپوتەكاعا العان ءۇش بولمەلى ءۇي بار ەدى، اقشاسىن جالعىز ءوزىم تولەپ تۇرا الماعان سوڭ پروسەنتى ءوسىپ، ونى دا بانك تارتىپ الدى. ەندى «كوكتالدا» پاتەر جالداپ تۇرىپ جاتىرمىن.
– ءۇيىڭىز جىلى ما؟
– ءۇي دەپ قاي ءبىر ءۇي دەيسىڭ، پاتەر قوجايىندارى كومىر بەرمەيدى، سىعىرايعان ەلەكتر پەشىنىڭ جىلۋىمەن وتىرمىز. ءقازىر كۇن جىلى بولىپ تۇر. ەرتەڭ سۋىتىپ كەتسە نە بولاتىنىن بىلمەيمىن. ءجيى-جيى اۋىرىپ قالامىن. وتكەن اقپان ايىندا قۇلاپ قالىپ، ەكى ومىرتقامدى زاقىمداپ العان ەدىم. ودان تولىقتاي ايىعا الماي جۇرگەندە كىتاپحانادان شىعىپ كەلە جاتىپ قۇلاپ، باسىمدى جارىپ الدىم. قان قىسىمى دا تۇسپەي تۇر. ءبىراق قۇدايعا ايتار ارىزىم جوق. تاڭەرتەڭ ۇلتتىق كىتاپحاناعا بارىپ، كومپيۋتەر زالىندا شارشاعانىمشا وتىرىپ جۇمىس ىستەيمىن. سودان سوڭ ۇيگە كەلىپ شاي-پاي ىشكەن بولامىن.
– قازىرگى ءحالىڭىز شىعارماشىلىعىڭىزعا دا كەرى اسەرىن تيگىزىپ جاتقان شىعار. ۇلتتىق كىتاپحانادا بولعاندا بىردەڭە جازا الىپ جاتىرسىز با؟
– جازىپ جۇرگەن ەڭبەگىم بار ەدى. نوۋتبۋگىمدى اۆتوبۋستا ۇمىتىپ قالدىرىپ كەتىپپىن. سول ءۇشىن عوي كىتاپحاناعا بارىپ جۇرگەنىم. بىلتىر كوكتەمدە مەملەكەتتىك تاپسىرىسپەن «ماڭگىلىك ماحابباتىم مەنىڭ» دەگەن پروزالىق جيناعىمدى شىعارىپ بەردى.
– وعان قالاماقى بەرىلمەي مە؟
– ەشتەڭە دە بەرگەن جوق. جالعىز مەن ەمەس قوي، بارىنە دە بەرىلمەيتىن بولعان ءقازىر. قالاماقىڭىز دەپ 100 كىتاپ بەردى. ونى مەن كوشەگە شىعىپ ساتىپ جۇرەيىن بە؟ تانىس-تامىرلارعا تاراتىپ بەردىم.
– قانشا بالاڭىز بار؟ بىردە-بىرەۋى قارايلاسپاي ما؟
– ۇلىم حابارلاسىپ، جاعدايىمدى سۇراپ تۇرادى. ءبىراق ايەلىنەن اسىپ كەتە المايدى. ال ەكى قىزىم مۇلدەم حابار المايدى. ولاردىڭ دا ءوز تىرشىلىگى بار. ايەلىم كەزىندە جيىرما جىل مەكتەپ ديرەكتورى بولىپ ىستەپ، جۇرت قاتارلى جاپ-جاقسى-اق كۇن كەشكەن ەدىك، اقىرى مىناۋ بولدى.
