اتاپ ايتقاندا، اقمولا وبلىسىندا جىلىنا 1 ملن. ليتر گليفوسات كاليي تۇزى بار گەربيسيدتەر جانە گليفوسات شىعاراتىن ءوندىرىس، اقتوبە وبلىسىندا جىلدىق قۋاتتىلىعى 50 مىڭ شارشى مەتر تۇرعىن ءۇي سالاتىن «تۇرعىن ءۇي قۇرىلىسى كومبيناتى»، الماتى وبلىسىندا يننوۆاسيالىق تەحنولوگيا بويىنشا جىلىنا 400 مىڭ توننا قولدانبالى شويىن الاتىن تاۋ-كەن وڭدەۋ كەشەنى ىسكە قوسىلدى.  

اتىراۋ ءموز قايتا جاڭعىرتىلىپ، مودەرنيزاسيالاندى، ال شىعىس قازاقستان وبلىسىندا اەس-كە ارنالعان جىلۋ بولەتىن جيناق شىعاراتىن كاسىپورىن جۇمىسىن باستادى. اقتوعاي تبك-سىندا جىلىنا 37 ملن توننا ءسۋلفيدتى كەن وڭدەيتىن فابريكا ىسكە قوسىلدى. جامبىل وبلىسىندا «قازفوسفات» ج ش س ەكستراكسيالى فوسفور قىشقىلىن وندىرەتىن ەفك-1 تەحنولوگيالىق جۇيەسى قايتا جاڭعىرتىلدى، باتىس قازاقستان وبلىسىندا جىلدىق قۋاتى 131 ملن توننا بالىق ەتىن جانە 10 توننا ۋىلدىرىق وندىرەتىن اكۆاوسىرۋ كەشەنى ىسكە قوسىلسا، قاراعاندى وبلىسىندا «ارسەلورميتتال تەمىرتاۋ» اق № 4 دومنا پەشى جاڭعىرتىلدى. «كوكتاسجال» كەنىشى بازاسىندا جىلىنا 3 ملن. توننا رۋدا وڭدەپ، 18 مىڭ توننا مىس وندىرەتىن تاۋ-كەن بايىتۋ كەشەنى ءوز جۇمىسىن باستادى. قوستاناي وبلىسىندا «بايان سۇلۋ» اق كونديتەرلىك ونىمدەر ءوندىرىسىن جىلىنا 9 075 تونناعا دەيىن ارتتىردى، قىزىلوردا وبلىسىندا شالقيا كەنىشىندە پوليمەتالل كەن بايىتاتىن فابريكانىڭ قۇرىلىسى ءجۇرىپ جاتىر، جىلىنا 112 توننا مىرىش جانە 29 مىڭ توننا قورعاسىن وندىرەدى.

تەلەكوپىر بارىسىندا سقو تايىنشا اۋدانىندا 120 مىڭ توننا وسىمدىك مايىن شىعاراتىن مايلى داقىلدار وڭدەيتىن زاۋىت، وڭتۇستىك قازاقستان وبلىسىندا ارنايى ماقساتتاعى جانە جالپى ماشينا جاساۋ سالاسىنا قاجەتتى قۇيمالار شىعاراتىن زاۋىت جۇمىسىن باستادى. ال استانادا قۇرىلىس ماتەريالدارىن شىعاراتىن كاسىپورىن ىسكە قوسىلدى. زاۋىت جىلىنا 120 مىڭ توننا قۇرعاق قوسپالار جانە 10 مىڭ توننا ديسپەرسيالى قوسپا وندىرەدى. الماتىدا «كازلەگپروم-الماتى» ءجشس-نىڭ جىلىنا 150 مىڭ جۇپ اياق-كيىم تىگەتىن وندىرىستىك سەحى جۇمىسىن باستادى.

سونداي-اق، قازاقستان پرەزيدەنتى نۇرسۇلتان نازاربايەۆ تەلەكوپىر بارىسىندا ستراتەگيالىق ماڭىزى بار ينفراقۇرىلىمدىق جوبالاردى ىسكە قوستى. اتاپ ايتقاندا، ماڭعىستاۋ وبلىسىنىڭ قۇرىق پوسەلكەسىندە جىلىنا 5،1 ملن. توننا جۇك تۇسىرىپ-تيەيتىن پارومدىق كەشەن جۇمىسىن باستادى، الماتى-شۋ ۋچاسكەسىندە جاڭا تەمىرجول جەلىسى اشىلدى. بۇل جول تاۋلىگىنە 51 جۇپ جۇك پويىزىن وتكىزە الادى. قايتا جاڭعىرتىلعان «استانا-تەمىرتاۋ» (ۇزىندىعى 169 كم) جانە «الماتى-قاپشاعاي» (ۇزىندىعى 104 كم) اۆتوكولىك جولدارى اشىلدى، ۇزىندىعى 598،5 كم ەكىباستۇز-سەمەي (شۋلبينسكايا گەس) – وسكەمەن جالپىۇلتتىق ەنەرگەتيكالىق جەلىسى ىسكە قوسىلدى.

يندۋستريالاندىرۋ باعدارلاماسىن جۇزەگە اسىرۋ جىلدارىندا 4 ترلن. تەڭگەنىڭ 961 جوباسى ىسكە قوسىلدى، 90،6 مىڭ تۇراقتى جۇمىس ورنى اشىلدى.

سونىڭ ىشىندە 2016 جىلدىڭ 10 ايىندا 179،2 ملرد. تەڭگەنىڭ 63 جوباسى جۇزەگە اسىرىلىپ، 4،8 مىڭنان استام تۇراقتى جۇمىس ورنى اشىلدى.

يندۋستريالاندىرۋ باعدارلاماسىن جۇزەگە اسىرۋ باستالعاننان بەرگى ارالىقتا جاسالعان جوبالار بويىنشا 7،5 ترلن. تەڭگە شاماسىندا ءونىم ءوندىرىلدى، سونىڭ ىشىندە 2016 جىلدىڭ 10 ايىندا - 1،8 ترلن. تەڭگەنىڭ ءونىمى ءوندىرىلدى.