2016 جىلى 10-11 جەلتوقساندا تەگەراندا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق جونىندەگى قازاقستان-يران ۇكىمەتارالىق كوميسسياسىنىڭ 15-وتىرىسى ءوتتى.
وتىرىس اياسىندا ق ر ينۆەستيسيالار جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى مارات يگالييەۆ يراننىڭ تۋريستىك بيلىك وكىلدەرىمەن كەلىسسوزدەر جۇرگىزدى. تاراپتار جاقىن ۋاقىتتا ق ر ينۆەستيسيالار جانە دامۋ مينيسترلىگى مەن يران يسلام رەسپۋبليكاسىنىڭ مادەني مۇرا، تۋريزم جانە قولونەر ۇيىمى اراسىندا ءوزارا توپتىق تۋريستىك ساپارلاردى جەڭىلدەتۋ جونىندەگى مەموراندۋم ازىرلەۋگە كەلىستى.
كەلىسىم قازاقستان مەن يران ازاماتتارىنىڭ ءوزارا توپتىق تۋريستىك ساپارلارى سالاسىنداعى ءوزارا ءتيىمدى ىنتىماقتاستىقتى جۇزەگە اسىرۋعا قۇقىقتىق جانە ۇيىمداستىرۋشىلىق نەگىز قالىپتاستىرادى. قۇجات قۇرامىندا 5-تەن 50-گە دەيىن ادام بولاتىن تۋريستىك توپتار ءۇشىن ۆيزالىق رەجيمدى جەڭىلدەتەدى. ەكى ەلدىڭ تۋريستىك بيلىگى قازاقستان مەن يرانعا باراتىن تۋريستىك توپتاردى جاساقتاۋعا جاۋاپتى جەرگىلىكتى تۋروپەراتورلار ءتىزىمىن الماساتىن بولادى.
سونداي-اق، قازاقستان-يران ۇكىمەتارالىق كوميسسياسىنىڭ وتىرىسى اياسىندا قازاقستان رەسپۋبليكاسى ۇكىمەتى مەن يران يسلام رەسپۋبليكاسى ۇكىمەتى اراسىنداعى ىسكەرلىك ماقساتتاعى ۆيزالاردى راسىمدەۋ ءتارتىبى تۋرالى كەلىسىمگە قول قويۋ ماسەلەسى دە تالقىلاندى.
ق ر ينۆەستيسيالار جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى مارات يگالييەۆ اتاپ وتكەندەي، «ەكى ەل اراسىنداعى تۋريستىك الماسۋلاردى دامىتۋدا ءوزارا توپتىق تۋريستىك ساپارلاردى جەڭىلدەتۋدىڭ ۇلكەن ماڭىزى بار. يران قازاقستاننىڭ تۋريزم سالاسىنداعى پەرسپەكتيۆالى سەرىكتەسى بولىپ تابىلادى. 80 ملن-عا جۋىق حالقى بار. ءبىزدىڭ ەل يراندىق تۋريستەرگە ەكولوگيالىق، ويىن-ساۋىق، مادەني-تاريحي تۋريزم مۇمكىندىكتەرىن جانە باسقا دا دەمالىس تۇرلەرىن ۇسىنا الادى. ءوز كەزەگىندە يران جاڭا تۋريزم ستراتەگياسىنا سايكەس، 2025 جىلعا قاراي جىل سايىن 20 ملن. تۋريست قابىلداپ، تۋريزمنەن 30 ملرد. دوللار پايدا تابۋدى كوزدەپ وتىر. 2015 جىلى يرانعا 5،2 ملن شەتەلدىك تۋريست كەلگەن. 2016 جىلى يران قازاقستاننان جانە تاعى 57 ەلدەن كەلەتىن دەمالۋشىلارعا اۋەجايدا ءۇش ايعا ۆيزا بەرۋدى باستادى. بۇل ەل ساياحاتتىق تۋريزم مۇمكىندىكتەرىن ۇسىنىپ (يراندا يۋنەسكو-نىڭ مادەني مۇرا تىزىمىنە ەنگەن 17 نىسان بار)، سونىمەن بىرگە دەمالۋشىلاردى قاۋىپسىزدىكتىڭ جوعارى ستاندارتتارىمەن قامتاماسىز ەتەدى. حالىقارالىق سانكسيا الىنعالى العاش رەت يراننىڭ Iran Air اۋەكومپانياسى Boeing كومپانياسىمەن 80 ۇشاق ساتىپ الۋ بويىنشا كەلىسىمگە قول قويدى. جالپى ايتقاندا، يرانمەن تۋريستىك ىنتىماقتاستىقتىڭ الەۋەتى ۇلكەن ەكەنىن بايقاپ وتىرمىز. سوندىقتان، بىرلەسكەن جوبالار مەن باعدارلامالاردى جۇزەگە اسىرۋ، ونىڭ ىشىندە كاسپيي تەڭىزىندە سۋ ءتۋريزمىن دامىتۋ جوسپارلانىپ وتىر».
