بۇگىن قازاقستان رەسپۋبليكاسى ۇكىمەتىنىڭ وتىرىسىندا ق ر ينۆەستيسيالار جانە دامۋ ءمينيسترى جەڭىس قاسىمبەك «ستاندارتتاۋ تۋرالى» زاڭ جوباسىن جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولشەم بىرلىگىن قامتاماسىز ەتۋ جانە ستاندارتتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىردى.
زاڭ جوباسىنىڭ ماقساتى ونىمدەردىڭ ساپاسى مەن قاۋىپسىزدىگىن، ادام ءومىرى مەن دەنساۋلىعىنىڭ قاۋىپسىزدىگىن، قورشاعان ورتانى قورعاۋ جانە ۇلتتىق قاۋىپسىزدىكتى قامتاماسىز ەتۋ، ۇلتتىق تاۋارلاردىڭ، جۇمىستار مەن قىزمەتتەردىڭ باسەكەگە قابىلەتتىلىگىن ارتتىرۋ، سونداي-اق، يننوۆاسيانى ءتيىمدى ەنگىزۋدى قولداۋ جانە جوعارى تەحنولوگيالىق وندىرىستەردى دامىتۋ.
«دامىعان ەلدەر تاجىريبەسى نەگىزىندە زاڭ جوباسىنا ۇلتتىق ستاندارتتاۋ ورگانى ەنگىزىلدى، ول ستاندارتتاۋ بويىنشا بارلىق ۇدەرىستەردى ۇيلەستىرەدى. ول بارلىق مۇددەلى تاراپتاردى (مەملەكەت-بيزنەس-تۇتىنۋشىلار) ەسەپكە الىپ، كونسەنسۋس نەگىزىندە ستاندارتتار قابىلداۋ ءۇشىن قولايلى جاعداي جاساۋدى كوزدەيدى. بۇنىڭ ناتيجەسى باسەكەلەستىك ورتا قالىپتاستىرىپ، ىشكى جانە سىرتقى نارىقتا سەنىم تۋدىراتىن ستاندارتتار بولۋى كەرەك»-دەدى مينيستر ج.قاسىمبەك.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولشەم بىرلىگىن قامتاماسىز ەتۋ جانە ستاندارتتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ق ر 6 كودەكسى مەن ق ر 43 زاڭىنا وزگەرىستەر مەن تولىقتىرۋلار ەنگىزۋدەن تۇرادى. ول ولشەمدەر باقىلاۋىن قامتاماسىز ەتۋدى حالىقارالىق مودەلگە سايكەستەندىرۋدى كوزدەيدى. ءبىرىنشى كەزەكتە سالىستىرىپ تەكسەرۋدىڭ ورنىنا ەتالونداردى كاليبرلەۋ ەنگىزىلەدى. بيزنەستىڭ قوسالقى شىعىندارىن بولدىرماۋ ءۇشىن (قۇرالداردى سالىستىرىپ تەكسەرۋ جانە كاليبرلەۋ تالاپ ەتىلەتىن جاعدايدا) سالىستىرىپ تەكسەرۋدى كاليبرلەۋ ناتيجەلەرى بويىنشا راسىمدەۋ مۇمكىندىگى قاراستىرىلادى. سونىمەن قاتار، حالىقارالىق تاجىريبەگە سايكەس، ادام ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ، قورشاعان ورتانى قورعاۋ، ءادىل ساۋدانى قامتاماسىز ەتۋ تۇرعىسىنان ەرەكشە ماڭىزدى قىزمەت سالالارىن قالدىرىپ، مەملەكەتتىك مەترولوگيالىق باقىلاۋ سالاسىن 11-دەن 6 پوزيسياعا دەيىن قىسقارتۋ قاراستىرىلعان.
«زاڭ جوباسىن قابىلداۋ ارقىلى ۇلتتىق ستاندارتتاۋ جانە ولشەم بىرلىگىن قامتاماسىز ەتۋ جۇيەسىن حالىقارالىق مودەلمەن ۇيلەستىرۋ، كونسەنسۋستىق ۇلتتىق ستاندارتتار قابىلداۋ، ءونىم، جۇمىس جانە قىزمەتتەر ساپاسىن دامىتۋ مەن ينۆەستيسيالار تارتۋ ءۇشىن جاعداي جاساۋ جانە يننوۆاسيالار ەنگىزۋ مەن تەحنولوگيالار ترانسفەرتىن ىنتالاندىرۋ سياقتى ناتيجەلەرگە قول جەتكىزەمىز»،-دەپ اتاپ ءوتتى ق ر ينۆەستيسيالار جانە دامۋ ءمينيسترى جەڭىس قاسىمبەك.
