وتكەن اپتادا رەداكسيامىزعا جانات قۇرشانيەۆا ەسىمدى كەلىنشەك حابارلاستى. ول وڭتۇستىك قازاقستان وبلىسىندا تۋىپ-وسكەن، ءبىراق بۇگىندە الماتىدا تۇرادى، ونداعى «باراحولكا» دەپ اتالىپ كەتكەن بازاردا ساۋدا ىستەيدى ەكەن.

جانات قۇرشانيەۆانىڭ جاسى ءقازىر 24-تە ەكەن. ول بىزگە ۇلتى وزگە بىرەۋدىڭ ءوزىن «ءولتىرىپ كەتەمىن» دەپ قورقىتىپ جۇرگەنىن ايتتى. سەبەبىن سۇراعانىمىزدا باسىنان وتكەن وقيعانى باياندادى. ءبىز ونىڭ ايتقاندارىن ەش وزگەرىسسىز جاريالاۋدى ءجون كورىپ وتىرمىز.

«مەن «ءبىرىنشى الماتى» جاقتا پاتەر جالداپ تۇرامىن، – دەيدى ج.قۇرشانيەۆا. – ءۇي جاقتاعى دۇكەننەن كەرەك -جاراعىمدى ساتىپ الىپ جۇرەتىنمىن. دۇكەننىڭ قوجايىنى اندا-ساندا ادەمىسىڭ دەپ تيىسەتىن. ءبىر كۇنى اۆتوبۋستان ءتۇسىپ، ۇيگە كەلە جاتقانىمدا ول الدىمنان شىقتى. «مەنىمەن ءجۇر، جايلى پاتەر كورسەتەمىن»، – دەدى. مەن: «كەرەك ەمەس، پاتەرىم بار عوي، ۇيگە كەلە جاتىرمىن»، – دەپ وتە بەرگەنىمدە ول مەنى سوققىعا جىعىپ كەتتى. مەن «102»-گە «زۆونداپ»، ونىڭ ۇستىنەن پوليسياعا ارىز جازدىم. ول مەنەن كەشىرىم سۇراپ، ارىزىمدى قايتىپ الۋ ءۇشىن 400 مىڭ تەڭگە بەردى. مەن  سوسىن ونى كەشىرىپ، ارىزىمدى قايتىپ الدىم. ال ونىڭ بەرگەن اقشاسىنا 170 مىڭ تەڭگە قوسىپ، «باراحولكاداعى» ساۋدامدى جالعاستىرا بەردىم. كەيىن پاتەر تاۋىپ، سول جاققا قاراي كوشىپ كەتكەنمىن. جاقىندا سول كىسى باسىما پيستولەت تاقاپ قورقىتىپ، 570 مىڭ تەڭگەم مەن موينىمداعى تروسىمدى، نەكە جۇزىگىمدى تارتىپ اكەتتى. مەن قايتادان ارىزداندىم، پروكۋراتۋراعا دا جازىپ جاتىرمىن. ءبىراق ودان ازىرگە ەشقانداي ناتيجە جوق. ال الگى قاراقشى: «ارىز جازا بەر، ودان ساعان پايدا جوق. مەن سەنىڭ قاي جەردە تۇراتىنىڭدى ءبىلىپ الدىم. ۇيىڭە بومبا قويىپ، ءولتىرىپ كەتەمىن»، – دەپ قورقىتىپ ءجۇر. ەندى مەن نە ىستەيمىن؟»

وسىلاي دەگەن ج.قۇرشانيەۆا بۇل جونىندە گازەتىمىزدە جازۋدى ءوتىندى. «قۇقىق قورعاۋ ورىندارى بۇل جونىندە ءبىلىپ، زومبىلىق جاساۋشىنى جونگە سالسا، مەنى قورعاسا ەكەن»، – دەيدى ول.

دەرەككوز: zamana.kz

اۆتور: گ. اشىربەكوۆا