«قامشى» پورتالى مال ساۋداسىمەن اينالىسقان اعايىندى ءۇش جىگىتتىڭ ولىمىنە قاتىستى ۇزىناعاش اۋىلىندا بولعان قىلمىستىق ءىستىڭ جايىن ءجىتى باقىلاپ، وقىرماندارىن اقپاراتتاندىرىپ كەلدى.  بۇل جولى وقىرماندارعا مارقۇمداردىڭ ارتىندا قالعان جەسىرى مەن جەتىمىنە جۇرت جاساعان جاقسىلىق تۋرالى جاعىمدى جاڭالىقتى ۇسىنامىز.

الماتى وبلىسى، ۇزىناعاش بازارىنا مال ساتۋعا شىعىپ، كىسى قولىنان قاستاندىقپەن ولگەن اعايىندى ءۇش ازاماتتىڭ وتباسىلارىنا ەرىكتى ازاماتتار ۇيىسىپ كومەك قولىن سوزدى. بۇل تۋرالى ازاماتتار جوعالعانى تۋرالى اقپارات تاراعاندا «ۇزىناعاش» ىزدەۋ توبىنا بەلسەنە ات سالىسقان ماقسۇتقان دالەي ۇلى «قامشى» تىلشىسىنە حابارلادى. قىلمىس اشىلعان سوڭ ماقسۇتقان دالەي ۇلى ەرىكتى ازاماتتار اراسىندا اعالىق كورسەتىپ، «مارقۇمداردىڭ تۋىستارىنا» ماتەريالدىق كومەك كورسەتۋ تۋرالى Wechat ميكروبلوگىنداعى ءابدىراحمان قامانشايۇىلىنڭ «الماتى اقپارات» توبىندا ۇندەۋ تاستاپ، باستاما كوتەرگەن. ءبىر اۋىزدان قولداۋ تاپقان باستاما ناتيجەسىندە، اسىلجان مامىش ەسىمدى ازاماتتىڭ «قايىرىمدى جاندار» توبىنىڭ ەسەپشوتى ارقىلى ءۇش اي ىشىندە 1 ميلليون 157 مىڭ تەڭگە كولەمىندە قارجى جينالعان.

2 كۇن بۇرىن، 19 جەلتوقساندا ماقسۇتقان دالەي ۇلى ءابدىراحمان، جانىبەك ەسىمدى ازاماتتارمەن بىرگە تالدىقورعانعا بارىپ، ەسەپكە بۇگىنگە دەيىن جينالعان اقشانى الىپ مارقۇمداردىڭ وتباسىنا تابىستادى. «قايىرىمدى جانداردان جينالعان قاراجات ءار وتباسىعا 386 مىڭ تەڭگەدەن ۇلەستىرىلىپ بەرىلدى، قازاعا قايىرا كوڭىل ايتىپ، قۇران باعىشتاپ قايتتىق»، - دەيدى ماقسۇتقان دالەي ۇلى. ول، «بۇل ارقىلى حالىقتىڭ ىنتىماعىن، ايدىڭ كۇننىڭ امانىندا كىسى قولىنان قازا تاپقاندار قايعىسىنا ەل بولىپ ورتاقتاسا الاتىنىمىزدى كورسەتتىك» دەي كەلە، «وقيعا ورىن العالى بەرى قاراي «قامشى» پورتالى ۇزدىكسىز اقپاراتتىق دابىل كوتەرىپ كەلدى. سونداي-اق ءىستىڭ باسى قاسىندا، قۇقىقتىق جۇمىستاردا، ىزدەۋ جۇمىسىندا ەركىن بەيسەكەي، داۋلەتجان، شالقار سىندى ازاماتتاردىڭ دا ەڭبەگىن ايتا كەتكەن ءجون. ارينە ءبىراۋىزدىلىق تانىتىپ، جۇكتى جۇمىلا كوتەرگەن ەلگە ەڭ ۇلكەن العىستى ايتامىز»، - دەدى «قامشى» تىلشىسىنە.

  

سونداي-اق، ماقسۇتقان دالەي ۇلىنىڭ ايتۋىنشا، الماس احمەتبەك سياقتى ەل تانىعان ازاماتتار باس بولىپ، «ءۇش ارىس ءۇشىن» اتتى توپ ارقىلى 4 ميلليون 800 مىڭنىڭ ۇستىندە قاراجات جينالعان. بۇل قاراجات قايتىس بولعانداردىڭ جەسىرلەرىنە ارناۋلى ەسەپتىك كارتوچكا ارقىلى اي سايىن 60 مىڭ تەڭگەدەن ايلىق جاردەم رەتىندە بەرىلە باستاعان.

سونىمەن قاتار، «اسقار جاكۋلين» قورى مارقۇمداردىڭ وتباسىنا 1 جارىم ميلليون قاراجات كومەك قولىن سوزعان.

قوسا كەتەر بولساق، 

ەسكە سالساق، دولدان ۇلى جارقىنبەك (1979 جىلى تۋعان)، زارلىحان ۇلى مۇقيات (1973 جىلى تۋعان)، ءالىمحان قادىلبەك شىعىس قازاقستان وبلىسىنىڭ تارباعاتاي اۋدانىنان ساتىپ العان 40 باس مالدى ەكى جۇك كولىگىمەن 17 قىركۇيەك كۇنى ۇزىناعاش بازارىنا شىعارعان. سودان ءىز-تۇزسىز جوعالىپ كەتكەن. بىرنەشە كۇننەن كەيىن ولاردىڭ دەنەسى تابىلدى. 24 قىركۇيەكتە الماتى وبلىستىق ىشكى ىستەر دەپارتامەنتىنىڭ باسپا ءسوز قىزمەتى ءىز-تۇزسىز جوعالعان ءۇش اعايىندىنىڭ ولىمىنە قاتىستى كۇدىكتىلەر ۇستالعانىن حابارلادى. ولاردى قىلمىسكەرلەر  ازاپتاپ ولتىرگەن.

وقيعا بولعان كەزىندە  اكىمدىك مارقۇمداردىڭ تۋىستارىنا كومەك كورسەتەدى دەگەن اقپارات تاراعان بولاتىن. الايدا، بۇل اقپاراتتى «ۇزىناعاشتا قازا تاپقان ءۇش جىگىتتىڭ وتباسىنا ماتەريالدىق كومەك كورسەتىلەدى دەگەن اقپارات شىندىققا جاناسپايدى»، دەگەن مالىمدەمەسىمەن الماتى وبلىسى اكىمىنىڭ ورىنباسارى باحتيار ونەربايەۆ جوققا شىعارعان ەدى.

ايتا كەتسەك، مارقۇمداردىڭ تۋىستارى قىلمىسكەرلەرگە ءولىم جازاسىن سۇراعان بولاتىن.

الايدا سوت نەگىزگى ايىپتالۋشى تالعات سۇلەيمانوۆقا سوت ءومىر بويى باس بوستاندىعىنان ايىرۋ جازاسىن كەستى. ال، ت. سۇلەيمانوۆتىڭ سىبايلاسى مۇرات وڭالبايەۆ 25 جىلعا باس بوستاندىعىنان ايىرىلىپ، قاتاڭ تۇزىمدەگى كولونياعا جىبەرىلەتىن بولعان ەدى.

ەرلان تولەۋباي