قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعى  اياسىندا  وڭتۇستىك قازاقستان وبلىسىنىڭ اكىمى ج.تۇيمەبايەۆ ءوز سالاسىنىڭ دامۋىنا ۇلەس قوسقان ءبىلىم، دەنساۋلىق جانە مادەنيەت سالالارىنىڭ قىزمەتكەرلەرىنە جالپى 110 ادامعا تۇركيا رەسپۋبليكاسىندا تاجىريبە الماسۋ ءۇشىن جولداما تاپسىرعان بولاتىن.

2016 جىلعى 14-21 جەلتوقسان ارالىعىندا تۇركيا رەسپۋبليكاسى ىستامبۇل قالاسىندا وبلىستىق مەديسينا سالاسىنىڭ 50 قىزمەتكەرىنە ارنالعان ماستەر-كلاسستار مەن وقىتۋ سەمينارلارى وتكىزىلدى. وقىتۋ ىستامبۇل قالاسىنداعى ەڭ ۇزدىك كلينيكالارى  Okan ۋنيۆەرسيتەتى اۋرۋحاناسى، Yeditepe ۋنيۆەرسيتەتى اۋرۋحاناسى، Acıbadem اۋرۋحاناسى بازالارىندا جۇرگىزىلدى. سەمينارلار مەن ماستەر-كلاستاردىڭ نەگىزگى باعىتى – جۇرەك پەن قانتامىر اۋرۋلارى، ونكولوگيالىق دەرتتەر، انا مەن بالاعا مەديسينالىق جاردەم كورسەتۋدىڭ بىرىكتىرىلگەن مودەلىن ەنگىزۋگە باعىتتالدى. ونىڭ ىشىندە: ءجىتى ميوكارد ينفاركتى، ءجىتى ينسۋلت جانە جاراقات كەزىندەگى مەديسينالىق كومەك كورسەتۋ جانە ونكولوگيالىق اۋرۋلاردى باسقارۋدا، بوساندىرۋ مەن بالالار قىزمەتىندە مەديسينالىق كومەك كورسەتۋ قامتىلدى.

سونداي-اق اتالعان كلينيكالاردىڭ جۇمىس مەنەدجمەنتىمەن، دارىگەرلەردى دايىنداۋ ادىسىمەن تانىستىرۋ جۇرگىزىلدى. ماستەر-كلاستار بارىسىندا وبلىستىق دارىگەرلەر كورسەتىلگەن باعىتتار بويىنشا وتالار مەن مانيپۋلياسيالاردى جانە ناۋقاستاردى جۇرگىزۋ ءتارتىبىن ۇيرەندى.

وقىتۋدىڭ قورىتىندىسى بويىنشا بارلىق ماماندار ارنايى سەرتيفيكاتتارعا يە  بولدى.

سونىمەن قاتار، ءبىلىم جانە مادەنيەت سالالارىنىڭ قىزمەتكەرلەرى دە حالىقارالىق دەڭگەيدە تاجىريبە الماسىپ، اسا پايدالى ماعلۇمات الىپ قايتتى.

ونىڭ ىشىندە ءبىلىم قىزمەتكەرلەرى ىستامبۇل مەن انكارا قالالارىنىڭ مەكتەپتەرى مەن بالا باقشا جۇمىستارىمەن تانىستى.