«ونەر قىراندارىنىڭ» سوڭعى وتكىزگەن كونسەرتتەرىندە جات اعىمدى ۇستانۋشىلاردى سىناعانى جايلى ماتەريال «قامشى» پورتالىندا جارىق كورىپ، 70 مىڭنان اسا وقىلىپ، ايتارلىقتاي تالقىعا ءتۇستى. «قامشى» ءتىلشىسى  «ونەر قىراندارىنىڭ» ديرەكتورى ماديار سەرىكبايەۆپەن تەلەفون ارقىلى تىلدەسكەن بولاتىن. «قامشى» پورتالى جۇرت كوڭىلىنەن شىققان قويىلىمدى ساحنالاعان تەاتر جەتەكشىسىمەن وتكىزگەن سۇحباتىن وقىرمان نازارىنا ۇسىنادى.

– قايىرلى كۇن، ماديار مىرزا! «تاۋەلسىزدىك كۇنى» 31 ارنا ەفيرىنەن كورسەتىلگەن كونسەرتتەرىڭىزدەگى جات اعىمدى ۇستانۋشىلارعا قاتىستى قويىلىم حالىقتىڭ كوڭىلىنەن شىعىپ، قوعامدا ايتارلىقتاي ءدۇمپۋ تۋعىزدى. بۇنداي قويىلىمدى ساحانالاۋعا نە ىقپال ەتتى؟

– بىرىنشىدەن، بۇل – ەلباسىنىڭ تىكەلەي تاپسىرمالارىنىڭ ءبىرى. ەكسترەميزمگە قارسى، قازاق جاستارىنىڭ جات اعىمعا كىرىپ كەتپەۋلەرى ءۇشىن الدىن-الۋ ماقساتىندا جاسالعان جۇمىس. ەكىنشىدەن، الماتى قالاسى اكىمدىگىنىڭ باستاماسىمەن، قولداۋىمەن وتكەن شارا بولدى.

– قويىلىم كورەرمەنگە نە ايتقىسى كەلدى؟

– ءبىزدىڭ نەگىزگى ماقساتىمىز – ەكسترەميزمگە قارسى، قازاق جاستارىنىڭ جات اعىم جەتەگىندە كەتىپ قالماۋلارى ءۇشىن ماسەلەنىڭ الدىن-الۋ، ادامي قاسيەتتەردى دارىپتەپ، جاقسىعا شاقىرىپ، جاماندىقتان تىيۋ ەدى. سونىمەن قاتار، قازىرگى تاڭدا تەك قازاقتىڭ باسىنا ەمەس، كۇللى ادامزاتقا ءتونىپ تۇرعان قاۋىپتەردىڭ ءبىرى: جات اعىم جەتەگىندە  كەتۋ، ەكسترەميزم قۇربانى بولۋ، تولاستاماي تۇرعان تەررور. بۇل ءجاي عانا تاقىرىپ ەمەس جانە دە ءبىز ەشقانداي دا ءدىن وكىلى ەمەسپىز، ەشقانداي دا ءدىندى ناسيحاتتاپ، ونى تالقىعا سالىپ جاتقان جوقپىز، ءوزىمىزدىڭ يسلام ءدىنى، مۇسىلماندىعىمىز نە ايتادى دەگەن سياقتى ساۋالدار توڭىرەگىندە قۇرالعان. قازاقتىڭ ءسالت-داستۇرىنىڭ ءوزى  - ءدىن، ءدىننىڭ دىڭگەگىنە بايلانعان ءداستۇر. ءبىز سول ءدىننىڭ كورىنىسى: اتا-انانى سىيلاۋ، كورشىمەن جاقسى قارىم-قاتىناستى بولۋ، اعايىن-تۋعانمەن ارالاسۋ، پارا الماۋ، وتىرىك سويلەمەۋ دەگەن سياقتى ءداستۇرىمىزدى كورسەتتىك. سالافيت، ۆاححابيزم، تاكبىرشىلەر دەگەن سياقتىلاردىڭ ارا-جىگىن اجىراتىپ جاتقان جوقپىز، تەك وتاندى تاستاپ، سيرياعا كەتىپ قالۋ، وتانىن سۇيمەۋ ماسەلەسىن  ايقىنداپ  كورسەتۋگە تىرىستىق.  الايدا، تەك قانا ءوزىمىزدىڭ بىلىمىمىزبەن عانا، ونەر قىراندارىنىڭ عانا ءوزىنىڭ ىزدەنىسىمەن جاسالدى  دەپ ايتا المايمىن. بۇل – كەلىسىلگەن، جۇيەلى تۇردە جاسالعان دۇنيە.

– وسى قويىلىمعا قاتىستى سىزدەرگە جات اعىمدى ۇستانۋشىلاردىڭ تاراپىنان قانداي دا ءبىر قىسىم كورسەتىلمەدى مە؟

– ارينە، بىرەۋلەرگە ۇناماي جاتۋى مۇمكىن، بىرەۋلەر مۇسىلمانداردى وسىنداي قىلىپ كورسەتتىڭدەر دەپ قارسى پىكىر ايتۋى مۇمكىن، ءتىپتى جەلىلەردە ايتىلىپ تا جاتىر عوي، ال ءبىزدىڭ وزىمىزگە كەلىپ پالەن دەپ ەشكىم ايتقان جوق.  ءبىراق، ءبىز پالەنشەنى عانا كورسەتەمىز دەپ ەمەس، نەگىزىنەن حالىقتىڭ  جات اعىم جەتەگىندە كەتىپ قالماۋ، تۋرا جولدان اداسپاۋدىڭ الدىن الۋ ماقساتىندا قويىلعان بولاتىن. ەندى، ءسوز يەسىن تابادى دەيدى عوي، اركىم ءوزىن تاۋىپ تا جاتقان بولار.

سۇحباتتاسقانىڭىزعا راحمەت!

وقىرماننىڭ ەسىنە سالا كەتەتىن بولساق، بيىل قازاقستاندا ەكى بىردەي لاڭكەستىك وقيعا ورىن الىپ، سالدارىنان قازاقستاندا تەرروردىڭ سارى دەڭگەيى، اقتوبە مەن الماتىدا قىزىل دەڭگەيى جاريالانعان ەدى. بيلىك رەسمي تۇردە اتالعان قىلمىستى سالافيتتەردىڭ جاساعانىن جاريالاعان بولاتىن.
 

قامشىگەر: نازەركە لابيحان