تۇركيا ءدىن ىستەرى باسقارماسىنىڭ 38 ەلدەگى ءدىني قىزمەتكەرلەرىنە «سول ەلدەگى ف.گۇلەنگە قاتىسى بار ادامدار مەن مەكەمەلەر جايلى بارلاۋ جۇمىستارىن جۇرگىزۋ كەرەكتىگى» بۇيرىعى گوللانديادا جۇزەگە اسپاي قالدى. ءبۇل جايىندا تۇرىكتىڭ Cumhuriyet گازەتى جازادى. مالىمەتتىڭ قازاقشا نۇسقاسىن قامشى پورتالى وقىرمان نازارىنا ۇسىنادى.

گۇلەنگە قاتىستى ادامداردىڭ ءتىزىمىن دايىنداعانىن مەديا قىزمەتكەرلەرىنە راستاعان گوللانديا سىرتقى ىستەر مينيسترلىگى وسى ەلدەگى گااگا ەلشىلىگى ءدىن ىستەرى اتتاشەسى يۋسۋف ادجاردى ەلدەن ەكستراديسيالادى. De Telegraaf گازەتى تاراتقان «ادجاردىڭ انكاراعا جىبەرىلگەندىگى جايلى» اقپاردا حريستيان دەموكراتيالىق پارتياسى (حدپ) «فەتحۋللاھشىلاردىڭ قورعانى» دەپ اتالىپ، حدپ دەپۋتاتتارىنىڭ تۇركيا جانە ءدىن ىستەرى باسقارماسى جايىندا ماجىلىسكە جاعىمسىز ۇسىنىستار ۇسىنعاندىعى ايتىلعان. ادجار بولسا، «ينتەرنەتتە اركىمگە قولجەتىمدى مالىمەتتەردى پايدالانعانىن» ايتىپ، بارلاۋشىلىق جاساماعانىن العا تارتقان.
وسىعان بايلانىستى تۇركيانىڭ گااگا ەلشىسى گوللانديا سىرتقى ىستەر مينيسترلىگىنە شاقىرىلدى، ال حدپ ادجاردىڭ ەلدەن قۋىلۋ كەرەكتىگىن تالاپ ەتتى. سىرتقا ىستەر ءمينيسترى بەرت كوەندەرس جانە الەۋمەتتىك ىستەر ءمينيسترى لوديەۆەيك اشەر ماجىلىسكە جولداعان حات ارقىلى تۇركيانىڭ ادجاردى ەلگە كەرى شاقىرعانىن مالىمدەدى. ادجاردىڭ ارەكەتتەرىنىڭ «گوللانديالىق ازاماتتاردىڭ ومىرىنە قۇقىقسىز تۇردە قول سۇعۋ» ەكەنىن ايتقان ەكى مينيستر تۇركيا ەلشىسى مەن ادجاردىڭ قىزمەتىنەن بوساتىلۋى ءۇشىن «ورتاق كەلىسىمگە» بارعانىن جەتكىزدى.