نۇرسۇلتان نازاربايەۆ يراننىڭ شىۇ مەن ەاەو-عا مۇشە بولۋىنا كومەكتەسۋگە ۋادە بەردى. بۇل تۋرالى بۇگىن اقوردادا قازاقستان پرەزيدەنتى نۇرسۇلتان نازاربايەۆپەن كەلىسسوزدەردەن كەيىنگى بىرلەسكەن مالىمدەدە يران يسلام رەسپۋبليكاسىنىڭ پرەزيدەنتى حاسان رۋحاني ايتتى، دەپ حابارلايدى inform.kz. 

«ءبىز وڭىرلىك ىنتىماقتاستىق سالاسىندا شانحاي ىنتىماقتاستىق ۇيىمى مەن ەۋرازيالىق ەكونوميكالىق وداقتىڭ تولىققاندى قاتىسۋشىسى بولۋعا دايىن ەكەندىمىزدى جاريا ەتتىك. پرەزيدەنت نۇرسۇلتان نازاربايەۆ بىزگە اتالعان ەكى باعىتتا دا كومەكتەسۋگە ۋادە بەردى. سونىمەن قاتار ءبىز كاسپيي سالاسىندا بىرلەسكەن ىنتىماقتاستىقتى قولدايمىز جانە كاسپييدىڭ قۇقىقتىق مارتەبەسى ماسەلەسىن ءوڭىردىڭ ءۇشىنشى ەلدەرىمەن ىنتىماقتاستىقتا شەشۋ قاجەت»، - دەدى رۋحاني.

سونىمەن قاتار قازاقستان پرەزيدەنتىمەن كەلىسوزدەر بارىسىندا ءوڭىردىڭ وزەكتى ماسەلەلەرى، ونىڭ ىشىندە بارلىق ەلگە ءقاۋىپ ءتوندىرىپ وتىرعان تەرروريزمگە قارسى تۇرۋ سالاسىنداعى ىنتىماقتاستىق تالقىلانعانىن اتاپ ءوتتى.

«بۇگىندە يراك پەن سيريادا ورىن الىپ وتىرعان جاعداي ءبىزدىڭ بارلىعىمىزدى دا الاڭداتادى. بۇل پروبلەمانى شەشىپ، اتالعان ەلدەردە تۇراقتىلىق پەن قاۋىپسىزدىكتى قايتارۋ قاجەت. ازيا ءوڭىرىنىڭ ىقپالدى ەلدەرى رەتىندە يران مەن قازاقستان اسىرەسە ەكونوميكا سالاسىنداعى بىرلەسكەن كۇش-جىگەرىن جالعاستىرا بەرۋى ءتيىس»، - دەدى يران پرەزيدەنتى.