جۋرناليست جارىلقاپ قالىبايدىڭ ۇستىنەن قوزعالعان اكىمشىلىك ىسكە قاتىستى سوت وتىرىسى جالعاسۋدا. باستاپقىدا سۋدياعا سەنىمسىزدىك تانىتقان جارىلقاپ قالىباي بۇگىن ساراپتاما قورىتىندىسىن جاساعان مامانعا سەنىمسىزدىك تانىتتى. سۋديا ونىڭ ءوتىنىشىن قاناعاتتاندىردى.

بۇگىن الماتىداعى اكىمشىلىك سوتتا جۋرناليست جارىلقاپ قالىبايدىڭ ۇستىنەن ق ر اكىمشىلىك قۇقىقبۇزۋشىلىق كودەكسىنىڭ 344-باپ، 2-تارماعى بويىنشا قوزعالعان اكىمشىلىك ءىستى قاراۋ ءۇشىن سوت وتىرىسى ءوتتى. الماتى قالاسى المالى اۋداندىق ىشكى ىستەر باسقارماسى تاراپىنان تاعايىندالعان ساراپشى ءوزى جاساعان ساراپتامالىق قورىتىندىدا «اڭىز ادام» جۋرنالىنىڭ گيتلەرگە ارنالعان سانىندا بىرەسە «ەكسترەميزمدى اقتاۋ بەلگىلەرى بار» دەسە، بىرەسە «ەكسترەميزمدى اقتاۋ بەلگىلەرى بولۋى مۇمكىن» دەگەن ءدۇدامال وي ايتىپتى. وتكەن اپتاداعى سوت وتىرىسىندا جارىلقاپ قالىبايدىڭ ادۆوكاتتارى وتەگەن ىقسانوۆ پەن شىنقۋات بايجانوۆ سۋديا داستان الىبايدان: «ساۋاتسىز جاسالعان ساراپتاما ازاماتتىڭ تاعدىرىنا كەرى اسەرىن تيگىزۋى مۇمكىن. سوندىقتان ساراپتامانى جاساعان نازگۇل ايتجان قىزى مۇقانوۆا سوت وتىرىسىنا قاتىسىپ، ءبىزدىڭ سۇراقتارىمىزعا جۋاپ بەرسىن»، – دەگەن ءوتىنىش ايتقان بولاتىن. الايدا، ادۆوكاتتاردىڭ بۇل وتىنىشىنە پروكۋراتۋرا وكىلى ماقسات رسالين ۇزىلدى-كەسىلدى قارسىلىق تانىتتى. العاشقىدا «ساراپتاما جاساعان ەكى ساراپشىنى ءبىرى – راۆيلوۆ كەزەكتى ەڭبەك دەمالىسىندا ءجۇر. ال مۇقانوۆا مەملەكەتتىك «بولاشاق» باعدارلاماسى بويىنشا امەريكا قۇراما شتاتتارىنا ءبىلىم الۋعا كەتتى» دەگەن. ءبىراق ادۆوكاتتاردىڭ راۆيلوۆقا قاتىستى سۇراعى تۋىنداماعاندىقتان، تەك مۇقانوۆانى عانا سوتقا شاقىرتۋدى ۇسىندى. رسالين وعان دا قارسى بولدى. ۇزاق ۋاقىت تارتىسقاننان كەيىن سۋديا ساراپشى نازگۇل ىقسانوۆانى سوت وتىرىسىنا شاقىرۋعا شەشىم قابىلداعان. ءبىراق بۇگىنگى وتىرىسقا دا مۇقانوۆا كەلمەدى.

سوت وتىرىسىنىڭ سوڭىندا سۋديا داستان الىباي ساراپتاما قورىتىندىسىن قايتا جاساتۋعا شەشىم قابىلدادى. وعان سەبەپ، جارىلقاپ قالىباي دا، ونىڭ ادۆوكاتتارى دا پروكۋروردىڭ ساراپشىنى سوت زالىنا كەلتىرۋگە قارسى بولعان ارەكەتىنە نارازى بولىپ، سۋديادان قايتا ساراپتاما جاساۋعا ءوتىنىش ءبىلدىرۋى. وتىرىس بارىسىندا ادۆوكات شىنقۋات بايجانوۆ: «سوت وتىرىسىنا ساراپشى مۇقانوۆانى اكەلدىرۋگە پروكۋروردىڭ ءوزى مۇددەلى بولۋى ءتيىس ەدى. سۋدياعا «ءسىز شاقىرتۋ جىبەرسەڭىز دە، سوتقا كەلمەدى. مۇقانوۆاعا زاڭ بويىنشا ءتيىستى شارانى قابىلداڭىز» دەپ تالاپ ەتۋى ءتيىس بولاتىن. وكىنىشكە قاراي، ول كەرىسىنشە، قارسىلىق تانىتتى. بۇل ءبىزدىڭ كوڭىلىمىزگە كۇدىك ۇيالاتادى»، – دەدى. وتكەن سوت وتىرىسىندا دا قارسى بولعان پروكۋرور ماقسات رسالينگە قارسىلىق رەتىندە، ول سۋدياعا: «مەنىڭ 20 جىلدىق تاجىريبەمدە كەزدەسەتىن جايت، كەيدە ساراپشىنىڭ ورنىنا باسقا بىرەۋلەر قول قويىپ جىبەرەدى نەمەسە ساراپشى باستاپقىدا جاڭىلىپ قورىتىندىعا قول قويىپ، كەيىن ءوز ۇستانىمىنان اينىپ شىعادى. تۇسىنبەيتىنىم، پروكۋراتۋرا وكىلى مۇقانوۆانى شاقىرتۋعا قارسى؟ مۇمكىن ونىڭ ورنىنا باسقا بىرەۋلەر قول قويعان شىعار؟ بالكىم مۇقانوۆانىڭ ساراپتاما قورىتىندىسىن جاساۋعا قاقى جوق شىعار؟»، – دەگەن. وسىدان كەيىن سۋديا داستان الىباي: «نازگۇل مۇقانوۆانى كەلەسى سوت وتىرىسىنا شاقىرىپ كورەيىك»، – دەدى. «شاقىرىپ كوردى»، ءبىراق ساراپشى سوتتىڭ شاقىرۋىن قۇلاعىنا قىستىرعان جوق. ياعني، كەلمەدى. سول سەبەپتى، سۋديا قايتالاما ساراپتاما قورىتىندىسىن جاساتۋعا شەشىم قابىلدادى.

العاشقى سوت وتىرىسىندا «ءادىل ءسوز» حالىقارالىق ءسوز بوستاندىعىن قورعاۋ ۇيىمى جانىنداعى اقپاراتتىق داۋلى قۇجاتتار بويىنشا لينگۆيستيكالىق ساراپتاما جاسايتىن راحيليا قارىمساقوۆا حانىم ءوزى جاساعان ساراپتامالىق قورىتىندىداعى «ەكسترەميزمدى اقتاۋدىڭ بەلگىلەرى جوق» دەگەن ۇستانىمىن سۋديا مەن سوتقا قاتىسۋشىلارعا ەگجەي-تەگجەيلى ءتۇسىنىدىرىپ بەرگەن ەدى. سول كەزدە ءلام-ميم جاق اشپاعان پروكۋرور ماقسات رسالين ەكىنشى سوت وتىرىسىندا 40 جىلدىق ەڭبەك ءوتىلى بار راحيليا قارىمساقوۆانىڭ كاسىبي بىلىكتىلىگىنە كۇمان كەلتىرگەن بولاتىن. سول وتىرىستا قارىمساقوۆا حانىم جوق بولعاندىقتان، بۇگىن ارنايى كەلىپ، ءوزىنىڭ قازاقستانداعى سوت وكىلدەرىمەن، سۋديالارمەن قويان-قولتىق جۇمىس ىستەگەنىن، كەزىندە پروكۋرورلارعا قىلمىستىق تاقىرىپتارعا وراي لەكسيا وقىعانىن دالەلدەيتىن دايەكتەر كەلتىردى. «ءادىل ءسوز» ۇيىمىنىڭ وكىلى عاليا حاكيم قىزى اجەنوۆا حانىم دا ۇيىم مەن ونىڭ اتقاراتىن شارۋالارى تۋرالى بىزگە اڭگىمەلەپ بەردى.

بۇگىنگى سوت وتىرىسىنا جارىلقاپ قالىبايدى قوعامدىق قورعاۋشى رەتىندە قاتىسقان ازامات – جەڭىس لەكەروۆ ەلىمىزدى ازاماتتىق قوعامعا اينالدىرۋ ءۇشىن ازاماتتاردىڭ قوعام ومىرىنە بەلسەنە ارالاسۋىن قامتاماسىز ەتۋ كەرەكتىگىن ايتتى. «جارىلقاپ قالىبايدى ەكى ايدا 3 رەت سوتقا بەرەتىندەي، جاۋ شاپتى ما؟ نەگە سونشا قۋدالايدى؟! ازاماتتار تۇگەل اراشا ءتۇسۋى ءتيىس ەدى. وكىنىشكە قاراي، قوعام بەلسەندى ەمەس»، – دەپ مالىمدەگەن ول قازاقستاندى دەموكراتيالىق قوعامعا اينالدىرۋ جولىندا قولىنان كەلگەنشە ۇلەس قوساتىنىن جەتكىزدى.