ۋكراينانىڭ شىعىسىندا اپاتقا ۇشىراعان مالايزيالىق Boeing 777 ۇشاعى قۇرباندارىن ەسكە الۋ ءۇشىن اۆستراليادا 7 تامىز قارالى كۇن دەپ جاريالاندى
بۇل تۋرالى اتالمىش ەلدىڭ پرەمەر-مينيسترى توني ەببوتتىڭ عالامتورداعى رەسمي پاراقشاسىندا حابارلانعان، دەپ جازادى ريا نوۆوستي. مۇنداعى اقپاراتقا سايكەس، 7 تامىز كۇنى ەلدىڭ بارلىق ۇكىمەتتىك مەكەمەلەرىندە، سونداي-اق اۆستراليانىڭ شەتەلدەردەگى ديپلوماتتىق وكىلەتتىلىكتەرىنىڭ عيماراتتارىندا مەملەكەتتىك تۋلار تومەن تۇسىرىلەدى. سونىمەن قاتار مەلبۋرندەگى قاسيەتتى پاتريك سوبورىندا ءدال وسى كۇنى كونفەسسياارالىق سيپاتتاعى ۇلتتىق مەموريالدىق ءراسىم وتەدى.
«بۇل ءراسىم اپاتتان قازا تاپقانداردى ەسكە الۋ مەن ولاردىڭ جاقىندارىنا قولداۋ كورسەتۋ ماقساتىندا ۇيىمداستىرىلىپ وتىر. ءبىز ارينە، قازا تاپقان 298 ادامنىڭ بارلىعى ءۇشىن قايعىرامىز، دەگەنمەن، اۆستراليا تۋعان ۇيلەرىنە اينالعان 38 جەرلەسىمىزدىڭ قازاسى جانىمىزعا قاتتى باتادى. ولاردىڭ وتباسىلارىنىڭ قايعىسىنا ورتاقتاسىپ كوڭىل ايتامىز جانە وسىناۋ قيىن كەزەڭدەردە كومەك قولىمىزدى سوزۋعا ءازىرمىز»، - دەيدى ەل ۇكىمەتىنىڭ باسشىسى.
Kazinform.kz
