رەيتەر اگەنتتىگى پرەزيدەنت باراك وباما: «رەسەي ەشتەڭە دە ىستەي المايدى. الەم ەكونوميكاسىنا ىقپالى ارتىپ كەلە جاتقان بەيجىڭدى اۋىزدىقتاۋ كەرەك»،-دەپ بريتاندىق «ەكونوميست» جۋرنالىنا سۇقپات بەردى دەيدى كەشەگى اقپاراتىندا .

وباما سۇحباتىندا بەيجىڭنىڭ اسكەري جانە ەكونوميكالىق ىقپالدارىن ەسكەرە وتىرىپ، اقش-تىڭ ازيا ايماعىنا جۇرگىزىپ وتىرعان سىرتقى ساياساتتاعى قارەكەتتەرى حاقىندا توقتالعان. دەيتۇرعانمەن، اقش-تىڭ سىرتقى ساياساتتا سوڭعى ءۇش ايدان بەرى رەسەي قولداۋىنداعى سەپاراتيستەردىڭ شىعىس ۋكرايناداعى ورنىقسىزدىق تۋدىرۋىن قامتىعان حالىقارالىق داعدارىستارمەن كوبىرەك اينالىسقانىن ەسكەرتكەن.

رەسەي الەمدەگى ءۇشىنشى ۇلكەن مۇناي ءوندىرۋشى جانە ەكىنشى ۇلكەن تابيعي گاز ءوندىرۋشى ەل ەكەندىگىن ەسكە سالا كەتكەن رەيتەرلىقتار: «ەۋروپانىڭ رەسەي ەنەرگەتيكالىق ەكسپورتىنا تاۋەلدىلىگى باتىستىڭ ۋكراينا داعدارىسىنا بولعان ۇستانىمدارىن كۇردەلىلەندىرىپ وتىر»،- دەگەن ءۋاج ايتا كەلىپ، ۋكرايناداعى داعدارىس سالدارىنىڭ رەسەيگە تيگىزەتىن زاردابى تۋرالى باراك وبامانىڭ: «رەسەي پرەزيدەنتى ۆلاديمير ءپۋتيننىڭ ۋاقىتتىق ساياسي مۇددە ءۇشىن تۋدىرعان بۇل تۇيتكىلدەرى رەسەيدىڭ ۇزاق بولاشاعىنا ۇلكەن زالال اكەلەدى»،-دەگەن پىكىرىن بەرەدى.

رەسەيدىڭ حالىقاراداعى ءرولى تۋرالى: «رەسەي تۇك تە ىستەي المايدى....مالىمەتتەرگە نەگىزدەلگەندە، يميگرانتتار ماسكەۋگە اعىلىپ جاتقان جوق. ونىڭ ۇستىنە، ورىس ەركەكتەرىنىڭ ورتاشا ءومىر ءسۇرۋ ۇزاقتىعى 60 جاس توڭىرەگىندە. رەسەي دەموگرافياسى توقتاۋسىز قۇلدىراۋدا»،-دەيدى اقش پرەزيدەنتى.

ال، كورشىلەرىمەن مۇنايعا باي وڭتۇستىك تەڭىزدەگى تەرريتورياعا تالاسقان، باتىسپەن ينتەللەكتۋالدىق مەنشىك قۇقىعى ماسەلەسى توڭىرەگىندە كەلىسە الماعان جۇڭگو جايلى باراك وباما: «مەنىڭ جۇڭگو جايلى ەسكەرتە كەتەتىن ءبىر ءىسىم: ءبىز بەيجىڭگە قاتال ۇستانىمدا بولۋىمىز كەرەك، سەبەبى، ولار قارسىلىققا جولىققانعا دەيىن قارسى جاعىن بار كۇشتەرىمەن ىعىستىرۋدان تانبايدى. قىتايلار تۇيسىنبەيدى. وبستاركسياعا مۇلدەم بەيىم دە ەمەس. ال، حالىقارالىق نورمالارعا مۇنداي وتە قاراپايىمدىلىق كەمدىك قىلادى»،-دەيدى. «ەگەر جۇڭگو الەمنىڭ جىلىگى تاتىمايتىن ارزان تاۋار وندىرەتىن زاۋىتى بولۋدان ينتەلەكتۋالدى مەنشىگى قورعالاتىن جوعارى ساپالى ءونىم وندىرەتىن زاۋىتقا وزگەرگەندە، وندا ءبىزدىڭ ارامىزداعى ساۋدالىق بايلانىس ءتىپتى دە وڭايلاسا تۇسكەن بولار ەدى»،-دەيدى باراك وباما.

دەرەككوز: Yahoo!News.

 http://news.yahoo.com/obama-russia-doesnt-anything-west-must-firm-china-201843411.html

دايىنداعان: تالعار دالەلعازى.