قازاقپاراتتىڭ جازۋىنشا 25 تامىزدان باستاپ «قازاقستان» ۇلتتىق تەلەارناسىنان شىڭعىس حاننىڭ نەمەرەسى، تولە حاننىڭ ۇلى - موڭعولداردىڭ سوڭعى ۇلى حانى جانە جۇڭگو يمپەرياسىنىڭ نەگىزىن قالاۋشى قۇبىلاي حاننىڭ ءومىرىن، باسقارۋى جانە وزگە ەلدەردى باسىپ الۋلارىن سۋرەتتەيتىن «قۇبىلاي حان» ەپيكالىق دراماسى كورسەتىلمەك. تەلەحيكايانىڭ سيۋجەتى بىرنەشە ون جىلدىقتى قامتيدى جانە موڭعولداردىڭ ۇلى ديناستياسى يۋاننىڭ، ودان كەيىن ۇلى جۇڭگو يمپەرياسىنىڭ قۇرىلۋىنا سەبەپ بولعان وقيعالار تۋرالى باياندايدى.

50 سەريادان تۇراتىن تاريحي دراما جۇڭگو ەلىندە ۇلكەن تابىسقا جەتىپ، قىمبات جوبالاردىڭ ءبىرى بولدى. تەلەحيكايا گونكونگ، تايلاند، مالايزيا، كورەيا، تايۆان، ۆەتنام، اقش، كانادا ەلدەرىندە دە كورسەتىلدى. تەلەحيكايانىڭ بيۋدجەتى 250 ملن. اقش دوللارىن قۇرادى. تۋىندىدا 5 مىڭعا جۋىق اكتەر وينايدى. سونداي-اق، ءتۇسىرىلىم جۇمىستارىنا 5 مىڭعا جۋىق ات قاتىستىرىلدى. تاريحي درامانىڭ قويۋشى رەجيسسەرى - سۋي سيۋ مين.

موڭكە موڭعولداردىڭ حانى اتانعان كەزدە قۇبىلاي حان قىتايدى جاۋلاپ الۋعا بەل بۋادى. شىڭعىسحاننىڭ ولىمىنەن كەيىن ونىڭ تولە جانە ۇگەدەي اتتى ۇلدارى بيلىككە تالاسا باستايدى. ۇگەدەي حان بولعانىمەن ونىڭ ايەلى تورەگىن ۋايىمنان كوز اشپايدى، سەبەبى ۇلى شىڭعىسحان كوزى تىرىسىندە نەمەرەلەرىنىڭ ىشىندە تولەنىڭ ۇلى قۇبىلايدى ەرەكشە جاقسى كورەتىن. تورەگىن كۇيەۋىنىڭ اعاسىنا ۋ بەرىپ ولتىرگەنىمەن قويماي، اكەسىنىڭ ءولىمى ءۇشىن كەك العىسى كەلگەن موڭكە مەن قۇبىلايدى كوتەرىلىس ۇيىمداستىردى دەپ ايىپتايدى. الايدا، قۇبىلايدىڭ ەرەكشە قىراعىلىعى مەن اناسى سورگەگتەنيدىڭ دانىشپاندىعىنىڭ ارقاسىندا تولە ۇرپاقتارى امان قالادى. قۇبىلاي شىڭعىسحاننان كەيىنگى موڭعولداردىڭ بەسىنشى جانە سوڭعى اتاقتى يمپەراتورى اتانادى....

قۇبىلاي باسىپ العان جەرگە يەلىك ەتۋ ءۇشىن ءبىر توپ سەنىمدى قىتايدىڭ كونفۋسيشىل كەڭەسشىلەرىن ءوز قاراماعىندا ۇستايتىن بولعان. ول كوپتەگەن جۇڭگو عالىمدارىنا جاي عانا جۇمىس بەرىپ قويماي، ولارمەن دوس بولا بىلگەن، سونداي-اق قىتايدىڭ ورتالىق جازىعىن باسقارۋ ءۇشىن مەملەكەتتىك قىزمەت جۇيەسىن دە قابىلدادى. سوندىقتان دا ونى سەسەن حان، ياعني دانىشپان حان دەپ اتاعان.

ءوزى بيلىك ەتىپ تۇرعان كەزدە قۇبىلاي قىتايدا كەڭىنەن تانىمال بولعان. الايدا، موڭعول كونسەرۆاتورلارى ونىڭ جۇڭگو مادەنيەتىنە دەگەن قىزىعۋشىلىعىنا نارازى بولاتىن. كەيبىر جالاقورلار ونىڭ اعاسى موڭكەگە قۇبىلاي تۋرالى: «قۇبىلاي كوپتەگەن قىتايلىقتاردىڭ جۇرەگىن جاۋلاپ، موڭعول يمپەرياسىنا ءقاۋىپ تۋدىرىپ، مول بايلىققا كەنەلگەن» دەگەن الىپ قاشپا اڭگىمەلەر ايتا باستايدى. سول ءۇشىن تەلەحيكايادا اۋلەتتىڭ ىشىندەگى ۇلكەن جانجال باستاۋ الىپ، اعايىندى ەكى باۋىر اراسىندا تالاس باستالادى. الايدا، اقىل جەڭىپ، اعايىندىلاردىڭ باسى قايتا بىرىگەدى. ناتيجەسىندە، دانا باسشى قۇبىلايحان بارلىق قىتايدى قول استىنا بىرىكتىرىپ، قازىرگى بەيجىڭ ورنىندا استاناسىن جاريالاپ، كورشى پاتشالىقتاردى دا وزىنە باعىندىرادى.

تەلەحيكايادا ءدال وسى تۇستا اكەسىنىڭ ورنىن باسۋعا تالپىنىپ، بۇلىكشىلەردى باسقارعان قۇبىلاي حاننىڭ ۇلىنا قارسى كۇرەسكە ۆەنەسيادان جاس ماركو پولو كەلگەن كەز جايلى، باتىس پەن شىعىس اراسىنداعى العاشقى قاتىناستاردىڭ قالىپتاسۋى تۋرالى باياندايدى. ماركو پولو كەيىننەن يۋان يمپەرياسىنىڭ ءومىرىنىڭ سيپاتتاماسىن قالدىرعان. ماركو پولونىڭ بايانداۋىنىڭ اسەرىنەن قۇبىلايحان باتىستاعى ەرەكشە تانىمال تاريحي تۇلعاعا اينالىپ، ونىڭ اتى جاڭادان تانىلا باستادى.

درامالىق وقيعالارعا، ساراي ىشىندەگى زۇلىم نيەتتىلەرگە، تاق پەن جاڭا جەرلەرگە يەلىك ەتۋ ءۇشىن كەسكىلەسكەن ۇرىس پەن تارتىسقا تولى كوپ سەريالىق الەمدىك بەستسەللەردىڭ قازاقستانداعى پرەمەراسى «قازاقستان» ۇلتتىق تەلەارناسىندا ساعات 19:30-دا  دۇيسەنبى مەن جۇما ارالىعىندا ورىس تىلىندەگى سۋبتيترمەن كورسەتىلەدى.          

قامشى-اقپارات