تۇركىمەنستاندا كەزەكتى پرەزيدەنت سايلاۋى ءۇشىن 07:00-دە سايلاۋ ۋچاسكەلەرى جۇمىسىن باستادى. بۇل داۋىس بەرۋ كەشكى 19:00-گە دەيىن 2587 سايلاۋ ۋچاسكەسىندە جالعاسادى. ال ونىڭ 39-ى تۇركىمەنستاننىڭ وزگە ەلدەردەگى ديپميسسياسىندا اشىلعان. داۋىس بەرۋگە 3223455 ادام قاتىسادى.

سايلاۋعا بارلىعى توعىز كانديدات ءتۇستى. داۋىس بەرۋگە قاتىسقان سايلاۋشىلاردىڭ جارتىسىنان كوبىنىڭ قولداۋىنا يە بولعان كانديدات تۇركىمەنستاننىڭ جاڭا سايلانعان پرەزيدەنتى بولىپ سانالادى.

اشعاباتتاعى №68 مەكتەپتە ورنالاسقان سايلاۋ ۋچاسكەسىنە پرەزيدەنتپەن بىرگە ونىڭ اكە-شەشەسى كەلدى.

داۋىس بەرۋدەن كەيىن بەردىمۇحامەدوۆ قىسقاشا ءسوز سويلەدى. «بۇكىل حالقىمىز ەل ءۇشىن ماڭىزدى وقيعاعا قاتىسۋدا. ميلليونداعان ادام كونستيتۋسيالىق قۇقىن پايدالانىپ، ەرىكتەرىن ءبىلدىرىپ جاتىر. ولار بولاشاق الدىنداعى ۇلى جاۋاپكەرشىلىگىن سەزىنىپ، جوعارى مەملەكەتتىك قىزمەتكە الداعى جەتى جىلعا لايىقتى دەگەن كانديداتقا داۋىس بەرۋدە» دەدى ول.

تۇركىمەنستانداعى پرەزيدەنت سايلاۋىنا جەرگىلىكتى ۋاقىت بويىنشا ساعات 11:00-گە دەيىن قاتىسۋشىلاردىڭ 51%-ى داۋىس بەرىپ ۇلگەردى. ەڭ جوعارى كورسەتكىش احال ءۋالاياتىندا تىركەلگەن. مۇندا 11:00-گە دەيىن 58،77% داۋىس بەرۋشى قاتىستى. بالقان ءۋالاياتىندا – 51،52%، داشوعۇز ءۋالاياتىندا – 52،84%، لەباپ ءۋالاياتىندا – 51،90%، مارى ءۋالاياتىندا – 49،40%، اشحاباد قالاسىندا – 45،02%.

ايتا كەتەر بولساق، 2016 جىلدىڭ 14 قىركۇيەگىندە قابىلدانعان جاڭا كونستيتۋسياعا سايكەس، پرەزيدەنت وكىلەتتىگى بەس جىلدان جەتى جىلعا ۇزارتىلدى. سونىمەن قاتار،پرەزيدەنتتىڭ جاسى 70-تەن جوعارى بولماۋى كەرەك دەگەن شەكتەۋ الىنىپ تاستالدى.

ەسكە سالساق، بىرنەشە كۇن بۇرىن حالىقارالىق قۇقىق قورعاۋ "حيۋمان رايتس ۋوچ" (HRW) ۇيىمى تۇركىمەنستاندا وتەتىن پرەزيدەنت سايلاۋى قارساڭىندا مالىمدەمە جاساپ، ەركىن جانە تازا سايلاۋ وتەتىنىنە كۇمان كەلتىرگەن.