23 تامىز كۇنى ەلورداداعى اباي ەسكەرتكىشىنىڭ الدىندا قازاقتىڭ ۇلى اقىنىنىڭ تۋعان كۇنىنە ارنالعان «ابايدىڭ ءان الەمى» اتتى مەرەكەلىك شارا وتەدى. بۇل تۋرالى استانا قالاسى تىلدەردى دامىتۋ باسقارماسىنا سىلتەمە جاساپ قازاقپارات حابارلادى.

شارانىڭ باستى ماقساتى - ابايدىڭ سان قيلى مۇراسىن ناسيحاتتاۋ، الۋان تاقىرىپتاعى اندەرى ارقىلى سۋرەتكەردىڭ ەستەتيكالىق الەمىن تانىتۋ. شارا اباي ەسكەرتكىشىنە گۇل قويۋ راسىمىمەن باستالادى. اتالعان كەش بارىسىندا قازاقستان رەسپۋبليكاسىنىڭ ەڭبەك سىڭىرگەن ءارتىسى، ونەرتانۋ پروفەسسورى كەنجەعالي مىرجىقبايدىڭ «قايران جۇرتىم»، «ولسە دە تابيعات ادام ولمەس»، «قاراڭعى تۇندە تاۋ قالعىپ» (ءۇش تىلدە)، قازاقستان رەسپۋبليكاسىنىڭ ەڭبەك سىڭىرگەن قايراتكەرى جانات شىبىقبايدىڭ «كوزىمنىڭ قاراسى»، قازاقستان رەسپۋبليكاسىنىڭ ەڭبەك سىڭىرگەن قايراتكەرى گۇلزيرا بوكەيحاننىڭ «تاتيانانىڭ ءانى»، قازاقتىڭ ءداستۇرلى اندەرىن ناقىشىنا كەلتىرە ايتىپ جۇرگەن تانىمال ءانشى ەرلان ءرىسقاليدىڭ ورىنداۋلارىندا «سەگىز اياق»، «بويى بۇلعاڭ» سياقتى ابايدىڭ تانىمال اندەرى شىرقالادى. سونىمەن قاتار، ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ارتىستەرى ابايدىڭ ومىرىنەن دايىندالعان قويىلىم كورسەتەدى. بيىل اباي قۇنانباي ۇلىنىڭ تۋعانىنا 169 جىل تولدى.

قامشى-اقپارات