تۇركىمەنستاندا پرەزيدەنتتىك سايلاۋ اياقتالىپ، قورىتىندى ناتيجەلەر جاريالاندى. بۇل تۋرالى sn.kz حابارلايدى. ورتالىق سايلاۋ كوميسسياسىنىڭ مالىمەتىنشە، گۋربانگۋلى بەردىمۇحامەدوۆ 97،69% داۋىس جيناپ، قايتا ەلدىڭ پرەزيدەنتى بولىپ سايلانعان.

بەردىمۇحامەدوۆپەن بىرگە پرەزيدەنتتىڭ "تاعىنا" تاعى 8 ۇمىتكەر دامەلى بولعان ەدى. الايدا، ولاردىڭ بارلىعى جابىلىپ ءجۇرىپ 3 پايىز دا داۋىس جيناي الماعان. ال، ساياسي ساراپشىلار بولسا سايلاۋدىڭ ناتيجەسى الدىن الا بەلگىلى بولعانىن ايتادى. تەك، بەردىمۇحامەدوۆتىڭ ناقتى قانشا داۋىس جينايتىنى عانا ولاردى قىزىقتىرعان.

ال، حالىقارالىق قۇقىق قورعاۋ ۇيىمدارى وسىناۋ ساياسي ناۋقاننىڭ ادىلەتتى وتكەنىنە سەنبەيدى. ازاتتىق راديوسىنىڭ تىلشىلەرى سايلاۋ ۋچاسكەلەرىندە بولىپ، بيۋللەتەندەردىڭ تەك ءبىر ادامنىڭ عانا اتىنا تولتىرىلىپ جاتقانىن بايقاعان. سونداي-اق، سايلاۋشىلاردىڭ رەسمي دەرەكتەردە كەلتىرىلگەندەي كوپ ەمەستىگىن دە راديو جۋرناليستەرى مالىمدەپ وتىر.