2020 جىلعا قاراي ۇكىمەت قارىزىنىڭ كولەمى 11،9 ترلن تەڭگە بولادى. بۇل تۋرالى قارجى ءمينيسترى باقىت سۇلتانوۆ مالىمدەگەن. دوللارعا شاعاتىن بولساق(ۇلتتىق بانكتىڭ قازىرگى كۋرسى بويىنشا 321.95) 36 ميلليارد، 962 ميلليون دوللاردى قۇرايتىن بولادى.
«بولجالدى ەسەپتەۋلەرگە سايكەس، 2020 جىلعا قاراي ۇكىمەتتىڭ قارىزى 11 تريلليون تەڭگە نەمەسە ءجىو-نىڭ 20،6 پايىزىن قۇرايدى. وسى جىلدىڭ كورسەتكىشتەرىمەن سالىستىرعاندا قارىز الداعى ءۇش جىلدا 1،3 ەسە وسەدى. بۇل كەزدە قارىزدى قايتارۋ قيىنداي تۇسەتىنى ءسوزسىز. دەگەنمەن، بۇگىنگى جاعدايدا «ءۇشىنشى جاڭعىرۋ» جوباسىن ىسكە اسىرۋ ءۇشىن ۇكىمەت بۇل شارالاردى ورىندى دەپ ەسەپتەيدى. سوندىقتان ۇكىمەت كەلەر ءۇش جىلدا بيۋدجەت ساياساتىن وڭتايلاندىرۋ جوباسىن، سونداي-اق بيۋدجەتتىڭ تابىسىن ارتتىرۋ مەن ماكروەكونوميكالىق جاعدايدى جاقسارتۋ شارالارىن ۇسىنادى»، — دەدى باقىت سۇلتانوۆ.
ايتا كەتەتىن بولساق، باقىت سۇلتانوۆ ءۇش جىل بۇرىن ۇكىمەت باسشىسىنىڭ ورىنباسارى رەتىندە مەملەكەتتىك جانە كۆازيمەملەكەتتىك سەكتوردىڭ سىرتقى قارىزى 2020 جىلعا دەيىن 22 پايىزعا دەيىن تومەندەتىلەتىنىن ايتقان بولاتىن.
2014 جىلعى 20 ماۋسىمدا ق ر پارلامەنتى پالاتالارىنىڭ بىرلەسكەن وتىرىسىندا ق ر ۇكىمەت باسشىسىنىڭ ورىنباسارى - قارجى ءمينيسترى باقىت سۇلتانوۆ:
«قازاقستاننىڭ جالپى قارىزى 150 ملرد. دوللارعا جاقىنداپ قالدى. ءبىراق مۇنىڭ جارتىسى فيرماارالىق قارىزدارعا جاتادى. بۇل - سىرتقى ءىرى ينۆەستيسيالىق جوبالار ارقىلى شەتەل ينۆەستورلارىنان كەلەتىن قاراجات»، - دەگەن ەدى. ءمينيستردىڭ اتاپ وتۋىنشە، اتالعان قاراجات قازاقستاننىڭ جالپى قارىزى ىشىنە كىرەدى. ال قارىزدىڭ قالعان جارتىسى مەملەكەتتىك جانە كۆازيمەملەكەتتىك سەكتور مەن بانكتەردىڭ بورىشتارى. بانكتەردىڭ سىرتقى قارىزى 2007-2008 جىلداردان باستاپ داعدارىسقا قارسى جۇمىستار ارقىلى قارجى ينستيتۋتتارىنا كومەكتەسۋ جانە سىرتقى قارىزدى قايتا قۇرىلىمداۋ ارقىلى تومەندەتىلۋدە بولعان. «مەملەكەتتىك جانە كۆازيمەملەكەتتىك قارىزدى الار بولساق، ەلباسىنىڭ جارلىعىمەن جاڭا بيۋدجەتتىك ساياسات تۋرالى تۇجىرىمداما بەكىتىلدى. وسى قۇجاتقا سايكەس، مەملەكەتتىك جانە كۆازيمەملەكەتتىك سەكتوردىڭ سىرتقى قارىزى بۇگىنگى 27 پايىزدان 2020 جىلعا قاراي 22 پايىزعا دەيىن تومەندەتۋگە ءتيىستىمىز»، - دەگەن بولاتىن ب.سۇلتانوۆ.
ەسەپكە سالاتىن بولساق، 2014 جىلعى جالپى قارىزدىڭ جارتىسى ۇكىمەتتىڭ قارىزى بولسا، ول 75 ميلليارد دوللار شاماسىندا بولۋعا ءتيىس. باقىت سۇلتانوۆتىڭ كەشە عانا جاساعان مالىمدەمەسىندە ۇكىمەتتىڭ سىرتقى قارىزى شامامەن 37 ميلليارد دوللارداي بولاتىنى بولجانعان. بۇل، 6 جىلدىڭ ىشىندە قازاقستان ۇكىمەتىنىڭ سىرتقى قارىزى 2 ەسەگە ازاياتىنىن كورسەتەدى. الايدا، قازاقستاننىڭ سىرتقى قارىزى وسى جىلداردا ءوسىپ جاتقانى كورىلەدى. ۇكىمەت ەسەپتەن جاڭىلدى ما؟ الدە جاسىردى ما؟ ول جاعى بەلگىسىز.
