كەزدەسۋگە م.جولداسبەكوۆ، ك.ساعادييەۆ، ر.شىردابايەۆ، و.ابدىكارىموۆ، ب.ىزمۇحامبەتوۆ، م.قاسىمبەكوۆ قاتىستى.

باسقوسۋ بارىسىندا كونستيتۋسيالىق رەفورمالاردى تالقىلاۋمەن، سونداي-اق اۋىل شارۋاشىلىعى، مال شارۋاشىلىعى، دەنساۋلىق ساقتاۋ، عىلىم جانە ءبىلىم، شاعىن جانە ورتا بيزنەس سالالارىن جاڭعىرتۋمەن، جۇرگىزىلىپ جاتقان جەكەشەلەندىرۋمەن بايلانىستى حالىق ءۇشىن ماڭىزدى ەكونوميكالىق، الەۋمەتتىك، قوعامدىق اۋقىمدى ماسەلەلەر تالقىلاندى.

مەملەكەت باسشىسى تاۋەلسىزدىكتىڭ 25 جىلىندا قازاقستان كۇردەلى جول ءجۇرىپ وتكەنىن اتاپ ءوتىپ، رەسپۋبليكامىزدىڭ ودان ءارى دامۋىنىڭ نەگىزگى باعىتتارىنا قاتىستى ءوز ويىن ورتاعا سالدى.

– قازاقستان تانىمال ەلگە اينالدى، ەكونوميكامىز قارقىندى دامىپ كەلەدى. ەندى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدا بەلگىلەنگەن ماقساتتار مەن مىندەتتەردى ىسكە اسىرۋ ءۇشىن قول جەتكەن جەتىستىكتەرىمىزدى پايدالانا ءبىلۋ قاجەت، – دەدى قازاقستان پرەزيدەنتى.

نۇرسۇلتان نازاربايەۆ قازاقستاندىقتاردىڭ الدىندا تۇرعان زاماناۋي سىن-قاتەرلەرگە نازار اۋداردى.

– نارىقتىق قاتىناستار جولىن تاڭداعان قوعامىمىزدىڭ الدىندا ورىندالۋ تيىمدىلىگى ەلدىڭ ودان ءارى دامۋىنا ىقپال ەتەتىن تۇبەگەيلى جاڭا مىندەتتەر تۇر. جاھاندىق ەكونوميكا داۋىرىندە يننوۆاسيا كۇن تارتىبىندەگى باستى ماسەلەگە اينالدى. يندۋستريالىق توڭكەرىس ءبىزدى اينالىپ وتپەۋگە ءتيىس. ءبىز ەكونوميكامىزعا يننوۆاسيالىق تەحنولوگيالاردى ەنگىزە ءبىلۋىمىز قاجەت، – دەدى مەملەكەت باسشىسى.

سونداي-اق، قازاقستان پرەزيدەنتى بۇل ماقساتتىڭ جۇزەگە اسىرىلۋى ءتيىستى قارجى جۇمساۋدى قاجەت ەتەتىنىن اتاپ ءوتتى.

– ەگەر يننوۆاسيالىق تەحنولوگيالار ازىرلەۋگە قاراجات بولمەسەك، وندا بىزگە الەمدىك جاڭا ەكونوميكالىق قۇرىلىمنىڭ اۋقىمىنان تىس قالۋ ءقاۋپى ءتونۋى مۇمكىن. جاپپاي ءوندىرىستى دامىتۋ ءۇشىن جاڭاشىلدىقتار ەنگىزۋ ارقىلى ەڭبەك ونىمدىلىگىن ارتتىرعان ءجون. بۇعان كاسىپورىنداردىڭ، سونداي-اق ەلدىڭ جەتەكشى جوعارى وقۋ ورىندارىنىڭ جانىنان عىلىمي-زەرتتەۋ ينستيتۋتتارى قۇرىلىپ، ولارعا ءتيىستى قولداۋ جاسالعاندا عانا قول جەتكىزۋ مۇمكىن بولادى. ماسەلەن، مۇنداي عىلىمي-زەرتتەۋ ينستيتۋتتارىن «الاتاۋ» يننوۆاسيالىق تەحنولوگيالار ساياباعىنىڭ، نازاربايەۆ ۋنيۆەرسيتەتىنىڭ جانىنان قۇرۋعا مۇمكىندىك بار، – دەدى ەلباسى.

كەزدەسۋگە قاتىسۋشىلار مەملەكەت باسشىسى باستاماشى بولعان، مەملەكەتتىك بيلىك تارماقتارى اراسىندا وكىلەتتىكتەردى قايتا بولۋگە باعىتتالعان رەفورمالاردى تولىق قولدايتىندارىن ءبىلدىردى. بۇل رەتتە ەڭ الدىمەن پارلامەنتتىڭ وكىلەتتىگىن كەڭەيتۋگە، ونىڭ دەربەستىگى مەن جاۋاپكەرشىلىگىن كۇشەيتۋگە باعىتتالعان قادامداردىڭ دەر كەزىندە جاسالعانى جانە پروگرەسسيۆتىلىگى اتاپ ءوتىلدى.

بۇعان قوسا، كەزدەسۋگە قاتىسۋشىلار رەسپۋبليكالىق جانە جەرگىلىكتى بيۋدجەت قاراجاتىنىڭ جۇمسالۋىنا قوعامدىق باقىلاۋ جاساۋعا، سالالىق باعدارلامالاردىڭ ورىندالۋىنا، جەر رەفورماسىنا، سىبايلاس جەمقورلىققا قارسى سانانى ورنىقتىرىپ، «مۇلدەم توزبەۋشىلىك» ساياساتىن ءتيىمدى جۇزەگە اسىرۋعا، سونداي-اق بەس ينستيتۋسيونالدىق رەفورمانى ىسكە اسىرۋ بويىنشا ۇلت جوسپارىندا بەلگىلەنگەن مىندەتتەردى كەزەڭ-كەزەڭمەن ورىنداۋعا قاتىستى تۇيتكىلدى ماسەلەلەرگە توقتالدى.