«نۇرلى جەر» باعدارلاماسى بويىنشا جىل سايىن تۇرمىسى تومەن وتباسىلار ءۇشىن 3 مىڭ پاتەر سالىنادى. سونداي-اق، دارىگەرلەر، مۇعالىمدەر مەن مەملەكەتتىك قىزمەتكەرلەر اتالعان باعدارلاما اياسىندا پاتەر الۋعا مۇمكىندىگى بار. بۇل تۋرالى ۇكىمەتتىڭ باسپا ءسوز ورتالىعىندا وتكەن بريفينگتە قۇرىلىس، تۇرعىن ءۇي كوممۋنالدىق شارۋاشىلىق ىستەرى جانە جەر رەسۋرستارىن باسقارۋ كوميتەتىنىڭ ءتوراعاسى مارحابات جايىمبەتوۆ مالىمدەدى، دەپ حابارلايدى Baq.kz

«نۇرلى جەر» باعدارلاماسى 5 باعىت بويىنشا جۇمىس ىستەيدى. باعدارلاما اياسىندا بەرىلەتىن تۇرعىن ۇيلەردىڭ شارشى مەترى ارزانداتىلعان: 140 مىڭ تەڭگە. بۇل باسقا وڭىرلەر ءۇشىن. ال استانا مەن الماتى قالالارىندا بۇل باعا 180 مىڭ تەڭگەنى قۇرايدى. ال، جالپى نارىقتاعى پاتەردىڭ ءبىر شارشى مەترى 260-280 مىڭ تەڭگە. بۇل قاراپايىم حالىق ءۇشىن ۇلكەن جەڭىلدىك»، - دەدى ول.

سونىمەن قاتار، م.جايىمبەتوۆ مەملەكەتتىك باعدارلاما اياسىندا سالىناتىن تۇرعىن ۇيلەردەن كىمدەردىڭ پاتەر الۋعا مۇمكىندىگى بار ەكەندىگىنە توقتالدى.

«ول مەملەكەتتىك قىزمەتكەرلەر، دارىگەرلەر مەن مۇعالىمدەر، ءارى تۇرمىسى تومەن ازاماتتار. قازىرگى تاڭدا 430 مىڭ ادام كەزەكتە تۇر. بۇل باعدارلاما تۇرمىسى تومەن وتباسىلارعا قولداۋ كورسەتۋگە باعىتتالعان. جىل سايىن تۇرمىسى تومەن وتباسىلار ءۇشىن 3 مىڭ پاتەر سالىناتىن بولادى. ناتيجەسىندە 15 جىلدىڭ ىشىندە 45 مىڭ پاتەر سالامىز. بۇل حالىق ءۇشىن ۇلكەن كومەك»، - دەپ اتاپ ءوتتى ول.

وسى ورايدا مارحابات جايىمبەتوۆ قاراپايىم ازاماتتاردىڭ پاتەردى قالاي الاتىندىعىن ءتۇسىندىردى.

«جالعا بەرىلەتىن، ءبىراق ساتىلمايتىن پاتەرلەر بولادى. جىل سايىن وسى قۇرىلىستى جۇرگىزۋ ءۇشىن 25 ملرد تەڭگە قارجى ءبولىنىپ وتىر. ناتيجەسىندە 3 مىڭ پاتەر سالىنادى. ودان باسقا 16-17 مىڭ نەسيەلىك پاتەر سالىنادى. وعان كۆازيمەملەكەتتىك سەكتورداعى «سامۇرىق قازىنا» ءال-اۋقات قورى مەن «بايتەرەك» حولدينگى جاۋاپتى. ولاردا 277 ملرد تەڭگە قارجى تۇر. وسى مەكەمەلەر ارقىلى 15 جىلدىڭ ىشىندە 280 مىڭ پاتەر پايدالانۋعا بەرىلەدى. بۇل پاتەرلەر «تۇرعىن ءۇي جيناق بانكى» ارقىلى ۇلەستىرىلەدى. اقشاسى 50%-عا جەتپەگەندەردىڭ جەڭىلدەتىلگەن نەسيەمەن پاتەر الۋعا مۇمكىندىگى بار»، - دەدى ول.