«التىن قالام» ادەبي جۇلدەسى جاڭا ماۋسىمىن جاريالايدى

الماتىدا، اقپاننىڭ 16-دا، ساعات 14.00، قازاقستان باسپا ءسوز ورتالىعىندا «التىن قالام» ادەبي جۇلدەسى جاڭا ماۋسىمىن جاريالايدى. بيىلعى شارا الاش قوزعالىسىنىڭ 100 جىلدىعىنا ارنالادى. 6-شى رەت ۇيىمداستىرىلىپ وتىرعان بايقاۋ جۇمىستاردى اقپاننىڭ 17 باستاپ، قىركۇيەكتىڭ 15-نە دەيىن قابىلدايدى.

بيىل بايقاۋعا قازاق جانە ورىس تىلىندە جازىلعان جۇمىستار اقپاننىڭ 17 باستاپ، قىركۇيەكتىڭ 15-نە دەيىن قابىلدانادى. وقىرماندار قىركۇيەك ايىنىڭ 30-نە دەيىن داۋىس بەرە الادى. ادەبي تۋىندىلاردى ۇيىمداستىرۋ كوميتەتىنىڭ adebiet2014@gmail.com، kenze2002@mail.ru ەلەكتروندىق پوشتاسىنا جولداۋعا بولادى. كونكۋرس جايلى تولىق مالىمەتتى جۇلدەنىڭ www.akalam.kz رەسمي سايتىنان بىلە الاسىزدار. سايىسقا تۇسكەن بارلىق شىعارما اتالعان سايتتا ورنالاستىرىلادى. وقىرماندار تومەندەگى اتالىمدار بويىنشا داۋىس بەرەدى: 
 1. جىلدىڭ ۇزدىك پوەزياسى
2. جىلدىڭ ۇزدىك پروزاسى
3. «دارابوز» - جىلدىڭ ۇزدىك بالالار جانە جاسوسپىرىمدەر 
شىعارماسى
4. ەسەنجول دومبايەۆ اتىنداعى جىلدىڭ ۇزدىك ساتيراسى
5. جىلدىڭ ۇزدىك فانتاستيكا جانە دەتەكتيۆ شىعارماسى
6. جىلدىڭ ۇزدىك كينوسەنارييى جانە دراماتۋرگياسى
7. قازاق ادەبيەتىنە قوسقان ەلەۋلى ەڭبەگى ءۇشىن 
8. شەتەل اۆتورلارىنىڭ ۇزدىك شىعارماسى 
9. الاشوردانىڭ 100 جىلدىعىنا ارنالعان ارنايى جۇلدە

الاش قوزعالىسىنىڭ 100 جىلدىعىنا وراي ارنايى نوميناسيانىڭ جاريالانۋىن بيىلعى جۇلدەنىڭ ەرەكشەلىگى رەتىندە اتاپ وتۋگە بولادى. وسى اتالىمنىڭ جەڭىمپازى ۇيىمداستىرۋشىلار اتىنان 1 000 000 ملن تەڭگە سىياقى الادى. بۇل سايىسقا پروزا، پوەزيا، دراماتۋرگيا، ساتيرا، ياعني، كەز كەلگەن جانردا جازىلعان جۇمىستار قاتىسا الادى. ەڭ باستىسى شىعارما ەلىمىز تاريحىن ارقاۋ ەتىپ الىپ، وقىرمانداردى ەلىن، ءداستۇرىن سۇيۋگە، قۇرمەتتەۋگە شاقىرۋى ءتيىس.

كونكۋرس جايلى:
قازاق ادەبيەتىنىڭ بۇگىنى مەن بولاشاعىنا بەي-جاي قاراي المايتىن، قوعامدىق قىزمەتتىڭ ءار سالاسىندا ەڭبەك ەتىپ جۇرگەن دوسىم ساتپايەۆ، قۋات دومباي، كەنجە جۇمان ۇلى، راسۋل جۇمالى جانە ايدوس سارىم سەكىلدى ازاماتتار اقىلداسا كەلىپ، 2009 جىلى «التىن قالام» ادەبي جۇلدەسىن وتكىزۋ تۋرالى باستاما كوتەرگەن بولاتىن. ماقسات – ەلىمىزدىڭ رۋحاني-مادەني دامۋىنا قازاقستان ازاماتى رەتىندە ءوز ۇلەسىن قوسۋ جانە جاس دارىندار مەن جاڭا ەسىمدەردىڭ قالىڭ جۇرتقا تانىلۋىنا ىقپال ەتۋ.
كەيىن بايقاۋدى ۇيىمداستىرۋ كوميتەتىنىڭ قۇرامىنا «كتك» تەلەارناسىنىڭ بۇرىنعى جەتەكشىسى ارمان شورايەۆ قوسىلدى. سونداي-اق، ۇيىمداستىرۋ جۇمىستارىنا تاتيانا فيليپچيك قولداۋ كورسەتىپ وتىر. ۇزدىكتەردى انىقتاۋعا وقىرمانداردىڭ ات سالىسۋى بايقاۋدىڭ باستى ەرەكشەلىگى سانالادى. شىعارمالاردى باعالاۋ ەكى كەزەڭنەن تۇرادى. ايتا كەتەتىن ءجايت، قازىلار قۇرامىندا كاسىبي قالامگەرلەر، ادەبيەتشىلەر جوق. كوپتىڭ تالقىسىنا ۇسىنىلعان ادەبي شىعارمالاردىڭ اۆتورى دا كورسەتىلمەيدى. مۇنداي تالاپتار جۇلدەنىڭ ءادىل وتۋىنە كەپىل بولا الادى. ايتا كەتەتىن جايت، «التىن قالام» بايقاۋ جۇمىستارىنا جازۋشىلار ەمەس، وقىرماندار باعا بەرەتىن قازاقستانداعى ءبىرىنشى ادەبي جۇلدە.

«التىن قالام» ۇلتتىق ادەبي جۇلدەسى العاش رەت 2010 جىلى ۇيىمداستىرىلدى. ۇمىتكەرلەردەن ادەبي تۋىندىلار «جىلدىڭ ۇزدىك پروزاسى»، «جىلدىڭ ۇزدىك پوەزياسى»، «جىلدىڭ ۇزدىك عىلىمي باسىلىمى»، «جىلدىڭ ۇزدىك ىسكەرلىك باسىلىمى»، «جىلدىڭ ۇزدىك بالالار كىتابى»، «بلوگومانيا» («E-Kiتاپ»)، «جىلدىڭ ۇزدىك اۋدارماسى» اتالىمدارى بويىنشا قابىلداندى. ءۇش اي ىشىندە ەلىمىزدىڭ ءار وڭىرىندە تۇراتىن 75 اۆتوردان 92 شىعارما كەلىپ ءتۇستى.

ەرەكشە اتاپ وتەتىن جايت، «التىن قالام» جۇلدەسىنىڭ ۇيىمداستىرۋ كوميتەتى ساياسي قىلمىسكەر دەپ ايىپتالىپ، جۇڭگو تۇرمەلەرىندە 40 جىل وتىرعان، «قىلمىس» اتتى 6 تومدىق كىتاپتى اباقتىدا جازىپ شىققان، جۇڭگو وكىمەتى تاراپىنان ساياسي سەبەپتەرگە بايلانىستى قۋدالانعان قازاقتىڭ اردا ازاماتى، تالانتتى قالامگەر، بۇكىل عۇمىرى ازاتتىق ءۇشىن كۇرەسپەن وتكەن قاجىعۇمار شابدانۇلىن «قازاق ادەبيەتىنە قوسقان زور ۇلەسى ءۇشىن» ماراپاتتادى. بۇل قاجىعۇمار شابدان ۇلىنىڭ تۋعان جەرىنەن العان العاشقى ادەبي سىيلىعى جانە وسى سىيلىقتى ۇيىمداستىرعانىمىزدى ماقتانىش ەتەمىز. 
 2016 جىلدان «ارۋنا» باسپاسى «التىن قالام» ادەبي جۇلدەسىمەن ىنتىماقتاسا باستادى. كونكۋرسقا قاتىسۋشىلاردىڭ ءبىرى تۇمار مۇقاشتەگىنىڭ بالالارعا ارنالعان «شيماي-شاتپاق» كىتابىن باسپادان شىعاردى. ەندى باسپا وتكەن جىلدىڭ قورىتىندىسى بويىنشا «جىلدىڭ ۇزدىك بالالار شىعارماسى» نوميناسياسىنىڭ ۇزدىك شىعارمالارىنىڭ ءبىرىن كىتاپ ەتىپ شىعارۋدى جوسپارلاپ وتىر.

ۇيىمداستىرۋ كوميتەتىنىڭ ەلەكتروندىق مەكەن-جايى: adebiet2014@gmail.com 
بايلانىس تەلەفونى 87013366053