جەمقورلىققا قارسى قىزمەت قىزمەتكەرلەرىنە قاتىستى كوررۋپسيالىق قىلمىستىق ىستەردى جۇرگىزۋ قۇقىعى ۇلتتىق قاۋىپسىزدىك كوميتەتىنە بەرىلمەك. بۇل تۋرالى پارلامەنت ماجىلىسىنە «قر-دىڭ ءبىرقاتار زاڭنامالارىنا قۇقىققورعاۋ جۇيەسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان رەسپۋبليكا باس پروكۋرورىنىڭ ورىنباسارى يوگان مەركەل حابارلادى.
سونداي-اق، قازاقستاندا بۇلتارتپاۋ شاراسىن تاڭداۋ كەزىندە تەرگەۋ سۋدياسىنىڭ وكىلەتتىگىن كەڭەيتۋ جوسپارلانىپ وتىر.
«زاڭ جوباسى ءۇش كودەكسكە وزگەرىستەر ەنگىزەدى، ياعني قىلمىستىق، قىلمىستىق-پروسەستىك جانە اكىمشىلىك قۇقىق بۇزۋشىلىق تۋرالى كودەكستەر مەن ءبىرقاتار زاڭداردى قامتيدى. قۇجاتتىڭ نەگىزگى باعىتتارىنا توقتالاتىن بولساق، تەرگەۋ سۋدياسىنىڭ كۇزەتپەن ۇستاۋعا سانكسيا بەرۋ كەزىندەگى وكىلەتتىگى كەڭەيتىلىپ وتىر. قولدانىستاعى نورمالار بويىنشا تەرگەۋ سۋدياسى ادامدارعا بۇلتارتپاۋ شاراسىن قولدانۋدىڭ ماقساتتىلىعىن تەك زەرتتەۋمەن اينالىساتىن. ەندى وعان كۇدىكتى ءبىر مەزگىلدە تەكسەرۋ مەن نەگىزدىلىگىن قاراۋعا مىندەتتەۋ ۇسىنىلادى، ياعني نەگىزگى كۇدىكتى قاراستىرۋداعى ايعاقتاردىڭ دالەلدىگىن قاداعالاۋ ەسكەرىلگەن. بۇل تۇزەتۋ پروسەستىڭ وسى كەزەڭىندە ازاماتتار ءۇشىن كەپىلدىك بەرۋدى ايتارلىقتاي كۇشەيتەدى»،-دەدى مەركەل.
ونىڭ سوزىنە قاراعاندا، سونىمەن قاتار زاڭ جوباسىندا جەڭىلدەتىلگەن بۇلتارتپاۋ شارالارىن تاعايىنداۋدا تەرگەۋ سۋدياسىنىڭ قۇقىقتارىن كەڭەيتۋ ۇسىنىلىپ وتىر. بۇل تۇرعىدا ەشقايدا كەتپەۋ تۋرالى ءتىلحات، جەكە كەپىلگەرلىك جانە باسقا دا شارالار قامتىلعان.
