رەسەيدە 14 جاستاعى قىزىن زورلاپ كەتكەن اكە سوتتىڭ شىعارعان ۇكىمىن تىم جەڭىل جازا دەپ قابىلداپ، سوت زالىندا قىلمىسكەردەن كەگىن قايتاردى. اشۋعا بۋلىققان قىزدىڭ اكەسى ءۇش قانجاردى قىنابىنان سۋىرىپ الىپ، ءدال قىلمىسكەرگە دالدەگەن، دەپ حابارلايدى okok.life، مالىمەتتىڭ قازاقشا نۇسقاسىن "قامشى" پورتالى وقىرمان نازارىنا ۇسىنادى.
بىرىنەن سوڭ ءبىرىن كەزەك-كەزەك دالدەگەن جەرىنە لاقتىرعان.
وقيعا جىلدام بولعانى سونشالىق: پوليسيا قىزمەتكەرلەرى قانداي دا ءبىر شارا قولدانىپ ۇلگەرە الماپتى. قانجاردىڭ ۇشەۋى دە قىلمىسكەرگە ءدال تيگەن، ەكەۋى جۇرەك تۇسىنا بارىپ قادالعان بولسا، ءۇشىنشىسى كومەيىن كەسىپ وتكەن. قىلمىسكەر سول جەردە ءتىل تارتپاي كەتىپتى، ال كەك الۋشى اكەنى سوت زالىندا تۇتقىنداپ الىپ كەتكەن. بولعان جايتقا كوڭىلى تولعان كاراۆايكين ازامات ەش قارسىلىق كورسەتپەي قولىندا تۇرعان تاعى ەكى پىشاقتى پوليسيا قىزمەتكەرلەرىنە تاپسىرعان.
مۇنداي قىلمىسقا بارۋىنىڭ سەبەبىن قىزدىڭ اكەسى بىلاي ءتۇسىندىردى: «مەنىڭ بۇل ىس-ارەكەتىمدى جۇپار اڭقىعان گۇل ءوسىرىپ، ونى قايداعى بىرەۋدىڭ تاپتاپ جاتقانىن كورىڭدەر، سول كەزدە عانا تۇسىنەسىڭدەر. مەنىڭ قىزىم ەكى رەت وز-وزىنە قول جۇمساماق بولدى، الايدا ەكەۋىندە دە كەزدەيسوق جاعداي قۇتقارىپ قالدى. ول ءالى كۇنگە دەيىن پسيحياترلىق اۋرۋحانادا ەم قابىلداپ ءجۇر، ال مىنا وڭباعانعا 5 جىل جالپى رەجيمدە جازاسىن وتەۋگە ۇكىم شىعاردى».
قىزدىڭ اكەسىنە پوليسياعا بەرگەن ارىزىن قايتارىپ ال ءۇشىن وعان بىرنەشە رەت قوماقتى قارجى ۇسىنعان ەكەن، ءتىپتى، ونى سوققىعا جىعىپ كەتۋدى دە جوسپارلاپ، اۋعانستاندىق ازاماتتارمەن كەلىسپەك بولىپتى، الايدا بۇل ىسكە ولار تىم كوپ قارجى سۇراعان. سول كەزدە زارداپ شەككەن قىزدىڭ اكەسى قىلمىسكەردەن وسىلاي كەك الۋىن جوسپارلاعان. عالامتوردان لاقتىراتىن قانجاردىڭ بەسەۋىن تاپسىرىسپەن العىزىپ، ۇيىندە جاتتىعۋ جۇرگىزە باستاپتى. ءبىر اپتادان كەيىن-اق ول بىر-ەكى سەكۋندتىڭ ىشىندە اسقاباققا وڭاي ءدال تيگىزىپ ۇيرەنگەن.
جوعارعى سوتتىڭ شەشىمى بويىنشا، كاراۆايكينگە سەگىز جىل باس بوستاندىعىنان ايىرۋ جازاسى تاعايىندالعان، الايدا جازا شارتتى تۇردە بولعاندىقتان ونى سوت زالىندا بوساتىپتى. مۇنداي شەشىمدى سوتقا قاتىسقان ءادىل قازىلار القاسىنىڭ شەشىمىمەن شىعارعان، ولاردى كوبىسىندە ءتۇرلى جاستاعى بويجەتكەن قىزدارى بار ەكەن.
اۋدارعان: نازەركە لابيحان
