بۇگىندە ديماش قۇدايبەرگەننىڭ ەسىمى ەلگە جاقسى تانىس. ءتىپتى قازاقستاندىقتاردى بىلاي قويعاندا، ونىڭ ونەرىنە الەمنىڭ كوپتەگەن ەلدەرىنىڭ تۇرعىندارى ءتانتى بولعان. ءوزىنىڭ تىڭدارماندار اۋديتورياسى قالىپتاسىپ، ەڭ تانىمال انشىلەردىڭ كوش باسىنا شىقتى. ال ونىڭ بالا كەزى قانداي ەدى؟ 

بالا ديماشتىڭ 10 جىل بۇرىن «قازاقستان-اقتوبە» تەلەارناسىنا بەرگەن سۇحباتى 
YouTube جەلىسىنە شىعارىلدى. الەۋمەتتىك جەلى قولدانۋشىلارى قىزۋ تالقىعا العان بۇل سۇحباتتا، ديماش ءوزىنىڭ كۋميرى تۋرالى دا ايتىپ بەردى. سۇحبات بەرگەن كەزدە ول نەبارى 13 جاستا عانا بولعان. ەفير بارىسىندا ول «اق كوگەرشىن» ءانىن ورىندايدى.
ديماشتىڭ اتا-اناسى قانات جانە سۆەتلانا ايتبايەۆتار ەلگە ەڭبەگى سىڭگەن مادەنيەت قايراتكەرلەرى. سوندىقتان دا بولار، ول بالا كۇنىنەن ونەرگە جاقىن بولىپ وسكەن. التى جاسىندا «اينالايىن» رەسپۋبليكالىق بايقاۋىنا قاتىسىپ «فورتەپيانو» نوميناسياسى بويىنشا لاۋرەات اتانادى. باسقا دا ءىرى بايقاۋلاردا توپ جارىپ، حالىق قوشەمەتىنە بولەنەدى. ونىڭ شەتەلدەگى ەڭ العاشقى جەڭىسى 2015 جىلى «سلاۆيان بازارى -2015» XXIV حالىقارالىق ەسترادالىق اندەر بايقاۋىندا گران-پري جەڭىپ الۋىندا. ءدال وسى كەزەڭدە وعان تىڭدارماندار نازار اۋدارىپ، ءانشى رەتىندە مويىنداي باستاعان ەدى. ال قىتايدا ءوتىپ جاتقان «Singer-2017» شوۋ-بايقاۋى ونىڭ اتاعىن اسپانداتا ءتۇستى.