ەگەر تابيعاتپەن ەتەنە جاقىن بولعىڭىز كەلسە، بيىكتىگى 65 فۋت بولاتىن اعاشتا ورنالاسقان اينەك ءۇي سىزگە ارنالعان. اينەك ءۇي سالۋ 2013 جىلى الماتىلىق ساۋلەتشى ايبەك الماسوۆتىڭ ويىنا كەلگەن. ال، ينۆەستور جوبانى تەك وسى جىلى عانا ماقۇلداعان. ءۇيدىڭ قۇرىلىسىن 2017 جىلى باستاۋ كوزدەلدى، دەپ حابارلايدى bnews.kz جاڭالىقتارى.

«كەز-كەلگەن ءۇيدى سالۋ ءۇشىن اعاشتاردى كەسۋگە تۋرا كەلەدى. ال، مەن تابيعاتقا زيان كەلتىرمەيتىندەي قالاي قۇرىلىس باستاۋعا بولاتىنىن ويلاستىردىم»، - دەيدى ايبەك.

2017 جىلدىڭ ماۋسىمىندا قۇرىلىستى باستاۋ جوسپارلانۋدا. ول ءۇشىن جاس كاسىپكەر بريگادا جيناپ ءجۇر.

«ءۇي الماتىنىڭ تاۋلى ايماعىندا ورنالاسادى. جانە برونداپ قويعان جاعدايدا، كەز-كەلگەن ادام ءۇشىن ەسىگى اشىق. ءۇيدىڭ ەڭ باستى ەرەكشەلىگى 4 قاباتتى ءۇيدىڭ اينەگىنەن  شىرشالارعا تولى ورماندى تاماشالاي الاسىزدار»، - دەدى جاس ساۋلەتشى.

ايبەك الماسوۆتىڭ ايتۋىنشا، جاتىن بولمەلەردىڭ ورنىنا 4 ادامعا ارنالعان دەمالىس بولمەلەرى سالىناتىنى كوزدەلىپ وتىر.

«ءۇيدىڭ اينەكتەن جاسالعانى قورشاعان ورتا ءۇشىن قولايلى. ءۇيدىڭ ءىشىن كۇننىڭ كوزىنەن قۋات الاتىن esla Powerwall اككۋمۋلياتورىمەن جىلىتاتىن بولامىز. ءۇيدىڭ ۇستىڭگى قاباتى جاڭبىر سۋىن ءسىڭىرىپ، تازارتىپ وتىرادى»، - دەپ ءسوزىن اياقتادى ايبەك. 

اۋدارعان: گۇلىم جاقان