شەتتەن ورالعان ەتنيكالىق قازاقتار اراسىندا پاتريوتتىق ولەڭدەرىمەن تانىلعان اقىن، جۋرناليست ەرلان تولەۋبايدىڭ «ساعان كەلدىم اتاجۇرت» اتتى ءانى جارىققا شىقتى دەپ حابارلايدى «قامشى» پورتالى.

ءاننىڭ ءسوزى  «ساعان كەلدىم اتاجۇرت» اتتى ولەڭى اقىن مۇراتقان شوقان 2001 جىلى 7 قازاندا اتاجۇرتقا ورالعاندا جازعان.

«ساعان كەلدىم اتا جۇرت،
قاڭعىرىپ كەلگەن ۇل دەمە،
تۇياعى توزعان تۇل دەمە،
قىزىعىپ كەلىپ تۇرعام جوق،
ۇلدە مەنەن بۇلدەڭە،
ساعان قاراي سۇيرەيدى،
قانىمداعى بىرلەڭە!»، - دەيتىن ولەڭ جولدارىنداعىداي، ءان اتاجۇرتتى اڭساعان شەتتەگى قازاقتاردىڭ اتامەكەنگە، تۋعان وتانعا دەگەن ماحابباتىن ايشىقتايدى.

ءاندى ەرەكشە داۋىس يەسى، التايدىڭ ار جاعىنان كەلىپ، الاتاۋدىڭ اسپانىن انمەن تەربەتىپ جۇرگەن بيبىگۇل قيلىمحان قىزى ورىنداعان.

ءاننىڭ تۇساۋى بۇگىن «قازاقستان» ارناسىنىڭ «تاڭشولپان» اقپاراتتىق سازدى تاڭعى باعدارلاماسىندا كەسىلدى. باعدارلاماعا ءان اۆتورى ەرلان تولەۋباي مەن ورىنداۋشى بيبىگۇل قيلىمحان قوناقتا بولدى.

كوپتى جاڭا اندەرىمەن ءجيى قۋانتىپ جۇرگەن ەرلان تولەۋباي جاڭا ءانى تۋراسىندا: «شەتەلدەگى قاي قازاقتىڭ بولماسىن اتاجۇرتقا ساعىنىشى – تاۋەلسىزدىك العان تۇتسا العاشقى بوپ جەتىپ، قازاق توپىراعىنا ساجدە قىلعان حاليفا التايدىڭ، كەشەگى مۇستافا وزتۇرىكتەردىڭ ساعىنىشىنان كەم ەمەس. مەن دە وتاۋ قۇرا سالا بەسىگىمدى قازاق ەلىندە، اتا توپىراعىندا تەربەتەيىن، ۇرپاعىم ەلىمەن ارالاسسىن دەپ اڭساپ جەتكەن ەدىم، بۇل ءان سونداي ساعىنىشتاردىڭ، تەبىرەنىستەردىڭ تۋىندىسى»، - دەيدى.  ەرلان تولەۋبايدى حالىق اقىن رەتىندە، كومپوزيتور عانا ەمەس، قوعامدىق ماسەلەلەردى ءجيى جازىپ جۇرگەن جۋرناليست رەتىندە دە جاقسى تانيدى.