قازاقستاندىق مەكتەپ وقۋشىسى قازاقتىڭ ۇلتتىق ءبيى «قارا جورعا» بيلەيتىن تەمىر روبوت قۇراستىردى.  بۇل تۋرالى قازاقپارات حابارلايدى.

سەمەي قالاسىنداعى نازاربايەۆ زياتكەرلىك مەكتەبىنىڭ 11 سىنىپ وقۋشىسى ءادىل وردايەۆ ەرەكشە روبوت جاساپ شىعاردى.
ايتا كەتەرلىگى، ءارتۇرلى كۇردەلى قيمىلدار جاساۋعا بەيىمدەلگەن بۇل بيولويد  روبوتتار مەكتەپتەگى روبوتوتەحنيكا ساباعى بارىسىندا قۇراستىرىلعان.

بۇل جايىندا ءادىل وردايەۆتىڭ ءوزى بىلاي دەيدى: ءبىز اۋەلى روبوتتاردى جاساپ شىقتىق. ارتىنان ولارعا ارنايى باعدارلامالار جازدىق. بۇل جۇمىستارعا ءبىر ايعا جۋىق ۋاقىت جۇمسالدى. ناتيجەسىندە ءبيشى روبوتتار توبىن جاساقتادىق»

ءادىلدىڭ جەتەكشىسى، ينفورماتيكا جانە روبوتوتەحنيكا ءپانىنىڭ وقىتۋشىسى باقىتبەك ورىنبايەۆتىڭ ايتۋىنشا، الەمدە ءبيشى بيولويدتەر ءجيى كەزدەسەدى ەكەن.

جوبانى جاساۋ، ارينە، وڭايعا تۇسپەگەن. باعدارلاماسى تەز جاسالعانىمەن، 18 بولشەكتەن قۇرالعان موتوردى ۇلتتىق بيگە كوندىرۋ وڭاي بولماپتى. «الايدا تالماي ىزدەنىپ، تاباندىلىق كورسەتۋ ارقىلى ناتيجەگە جەتتىك دەيدى»، - ونەرتاپقىشتار.

- روبوتتى تەك قانا بيلەتكىزبەي وعان جان بەرۋ كەرەك دەپ ويلايمىن. سوندىقتان ءبىز روبوتتاردى بيلەتكىزۋ كەزىندە ءاربىر قوزعالىستى ساقتاۋ كەزىندە ءوزىمىزدىڭ جۇرەگىمىزدىڭ كىشكەنە بولىگىن بەردىك دەپ سانايمىز. بولاشاقتا ولار تەك قانا «قاراجورعا» عانا ەمەس، «قاماجاي» بيلەرىن دە بيلەيدى دەگەن ويدامىن، - دەيدى جاس ونەرتاپقىش ءادىل وردايەۆ.

ءادىلدىڭ روبوتوتەحنيكامەن اينالىسىپ جۇرگەنىنە 4 جىل بولعان. وسى ۋاقىت ارالىعىندا ول ءتۇرلى بايقاۋلارعا قاتىسىپ ۇلگەرىپتى. ءوزى جاساپ شىعارعان روبوتتاردى ول جاقىندا ەلورداداعى «استانا» كونسەرت زالىندا «ۇلى دالا مۇراگەرلەرى» اتتى كورمە-قويىلىمدا وتكەن نازاربايەۆ زياتكەرلىك مەكتەپتەرىنىڭ تالانتتى وقۋشىلارىنىڭ عىلىمي جوبالارى كورمەسىندە تانىستىردى.

ەستەرىڭىزگە سالا كەتەيىك، 2015 جىلى پاۆلودار بيزنەس-كوللەدجىنىڭ ستۋدەنتتەرى وزدەرى جاساپ شىعارعان روبوتقا "قارا جورعا" بيلەتكەن بولاتىن. 

جوبانىڭ اۆتورى ەگەر كوپتيكوۆ روبوتتى 2 اپتاداي ۋاقىت ىشىندە قۇراستىرعانىمەن، وعان بي باعدارلاماسىن جازۋعا 1 ايعا جۋىق ۋاقىت كەتكەنىن، سونداي-اق بۇل روبوتتىڭ باستاپقى نۇسقاسى عانا ەكەنىن جانە جوبانى ءارى قاراي دامىتاتىنىن حابارلاعان بولاتىن. 

دەگەنمەن، قالىڭ كوپشىلىك جاس ونەرتاپقىشتاردىڭ بۇل ارەكەتتەرىن جوعارى باعالاپ، جەلىدە جاريالانعان تومەندەگى ۆيدەونى كوپتەپ تاماشالاعان بولاتىن.