رەجيسسەر قانات بەيسەكيەۆ امەريكالىقتار اسىراپ الاتىن قازاقستان بالالارى جايىندا تۇسىرىلگەن «بالا» اتتى ءفيلمنىڭ تۇساۋىن كەستى. قانات بەيسەكەيەۆپەن tengrinews.kz ءتىلشىسى سۇحباتتاسىپ قايتتى. 40 مينۋتقا سوزىلاتىن ءفيلمدى ءتۇسىرۋ ءۇشىن اۆتور 5 مىڭ دوللار قارجى جۇمساعان.

ايتا كەتەرلىگى، فيلم ءبىر عانا كامەراعا تۇسىرىلگەن. 22 اقپان كۇنى Chaplin كينوتەاترىندا ءفيلمنىڭ العاشقى پرەمەراسى ءوتتى.

فيلم جەلىسى شەت ەلدىكتەر اسىراپ العان جەتىم بالالار جايىندا ءوربيدى. جوبا 8 ءتۇرلى وقيعاعا نەگىزدەلگەن.

«مەن نەگىزى 11 وقيعا تۇسىرگەنمىن، ءبىراق فيلمگە 8ء-ى عانا ەنگەن. ءتۇسىرىلىم بارىسىندا مەن ناعىز قازاقتاردى، ناعىز تالانتتى بالالاردى جولىقتىردىم. ءار ادامنىڭ باسىنان كەشكەن وقيعاسى ءار ءتۇرلى. ولار امەريكالىق وتباسىنىڭ ماحابباتىنا بولەنىپ وسكەن بالالار بولسا دا، وزدەرىنىڭ قازاق ەكەندەرىن ىشتەي سەزىپ جۇرەدى. مەنىڭ ماقساتىم ولاردىڭ امەريكاداعى ومىرلەرى جايىندا، سونداي-اق امەريكادا تاربيەلەنگەن قازاق بالالارىنىڭ بىرنەشە جىلداردان كەيىنگى كەلبەتى جايىندا ءتۇسىرۋ بولدى. كارتينا «جاناشىر» ادامداردىڭ قوسقان اقشالارىنا ءتۇسىرىلدى. ەڭ العاش قارجى جاعىنان كومەكتەسكەن الىشەر ەسىمدى ازامات بولدى. ول مەنىڭ مۇمكىندىكتەرىمە سەنىپ، قولىما 100 دوللار تاپسىردى. جالپىحالىقتىق كومەكتەن كەيىن 5 مىڭ دوللار جينالدى»، - دەدى قانات بەيسەكەيەۆ.

ءفيلمنىڭ العاشقى كەيىپكەرى 2015 جىلى فيلادەلفيادا ءتۇسىرىلدى. كوپ وتباسى ب ا ق وكىلدەرىمەن بايلانىسقىسى كەلمەي، فيلمگە تۇسۋگە قارسىلىق تانىتىپ جاتتى.

فيلمگە ءتۇسۋشى كەيىپكەرلەر وزدەرىنىڭ قازاقستاندىق ەكەندەرىن جاقسى بىلەدى. ءتىپتى، ءبىر اسىراندى قىز اقتوبەدە تۇراتىن تۋعان اناسىنا ءجيى بارىپ تۇرادى ەكەن. بەيسەكەيەۆتىڭ ايتۋىنشا، فيلم كەيىپكەرلەرى تۇسىرىلىمنەن كەيىن ءوز تۋعان اتا-انالارىمەن كەزدەسۋدى ارماندايدى.

فيلمدە بالالار وزدەرىن قالاي اسىراپ العاندارى جايىندا جانە بۇعان كوررۋپسيانىڭ دا قاتىسى بارىن ايتىپ بەرەتىن ساتتەرى بار.

ونىڭ ايتۋى بويىنشا، اسىراپ العاننان كەيىن قازاقستانعا قايتىپ كەلگەن بالالار جايىندا تاعى ءبىر فيلم تۇسىرمەكشى. رەجيسسەر ءارى قاراي دا دەرەكتى فيلمدەر تۇسىرۋمەن اينالىساتىنىن ايتتى.

ەسكە سالا كەتسەك، 1999 جىلدان بەرى شەت ەلدىكتەر ەلىمىزدەن 8805-دەن اسا جەتىم اسىراپ العان بولاتىن. ەلىمىزدە سول بالالاردىڭ ءارقايسىسىنىڭ تاعدىرىنا الاڭدايتىن ازاماتتاردىڭ بارى قۋانتادى.  

اۋدارعان: گۇلىم جاقان