قازاق ايتىسىنىڭ 2000 جىلدارداعى ايگىلى تارلاندارى ايتىستى ساعىنىپ قالعان سەكىلدى. ەندى فەيسبۋك جەلىسىندە ايتىسۋعا كوشىپتى، دەپ حابارلايدى «قامشى» پورتالى. ۇلتتىق قۇندالاقتارىمىزدى قاشان دا ناسيحاتتاپ جۇرەتىن ايتىسكەر اقىن مۇحامەدجان تازابەك ءوز پاراقشاسىندا «قازاقتىڭ ات ابزەلدەرى قادىم زاماننان قاجەتتىلىك پەن كومفورتتىڭ قۇرالى بولسا، بۇگىن ول الىس اۋىل مەن جاقىن مۋزەيدەن عانا كورەر ەتنوگرافيالىق ەتيۋد (ۇزىك) بولىپ بارادى. ايتپەسە، باسقاسى بىلاي تۇرسىن، شىلبىردىڭ ءيىسى-اق اتا-بابامىز اتتىڭ جالىندا ءجۇرىپ الەمنىڭ تەڭ جارتىسىنا ءامىرىن جۇرگىزگەن زامانانىڭ اروماتى عوي… تۇرمىسىمىز تۇبەگەيلى وزگەرسە دە، ۇلتتىق ءتۇپ-تامىرىمىز وسىلاردان ەكەنىن ۇمىتپايىق»، — دەپ جازعان ەدى. ايتىسكەردىڭ بۇل جازباسىنا داۋىلپاز اقىن داۋلەتكەرەي كاپ ۇلى ولەڭمەن بىلاي دەپ پىكىر ايتتى:
«جونجايلاۋدا وسكەسىن كەشىپ ايدىن،
تۇيەسى جوق قازاقتىڭ كوشى — قايعىم.
اراپتىڭ دالاسىنان قايتقان بولساڭ،
مۇحاجان، اتقا مىنسەڭ، وسىلاي ءمىن!»
اتالعان شۋماققا مۇحامەدجان تازابەكوۆ تە قاراپ قالماي، ولەڭمەن جاۋاپ بەرىپ سوڭى ايتىسقا ۇلاستى دا كەتتى:
«جوق مەندە قازاقيادان وزگە قۇندى وي،
قانىمنان، قاعىمنان دا بەزبەدىم عوي.
سىرتىمنان ارابيانىڭ دالاسىنا
اپارىپ، اكەپ جۇرگەن وزدەرىڭ عوي…»
داۋلەتكەرەي دە جاۋاپسىز قالمادى:
«مۇرتسىز ساقال جەلپىلدەپ تامام استا،
اراب بوپ اڭگىمە ايتىپ الاقاشپا.
استىڭا مىنگەنىڭ دە «ارابىدان»،
ات باسىن قاشان بۇردىڭ ماما اعاشقا؟!»
مۇحامەدجان:
«مىنگەنىم «ارابى» ەمەس، «جاپوندىق ات»،
باباڭنىڭ سيپاتى ەدى ساقال تىم-اق.
جولى ءتۇزۋ جان ايتسا جۇرت سەنبەيدى-اۋ،
اۋزى قيسىق پەندە ايتسا، زاكون ءبىراق…»، —
داۋلەتكەرەي:
«استىڭنان اقساماسىن «جاپوندىق ات»،
ال، «مۇرتسىز جاراسپايدى ساقال ءبىراق».
ارابى باس بىلمەيتىن اساۋ قۇساپ،
باسىڭدا الا قاشتىڭ، شو تام، برات؟!»
مۇحامەدجان:
«ەكەۋمىز نەعىلامىز ەندى الىسىپ،
باۋىر بوپ اياقتايىق، كەل، قاۋىشىپ!
نە مىنسە دە تۇسپەسىن قازاق اتتان،
جۇرەيىك ۇزەڭگىنى تەڭ قاعىسىپ!»
داۋلەتكەرەي:
مۇحاجان، بولا قالدىڭ قاي ناعاشى؟
جىگىتسىڭ اتتان تۇسپەس اينالاسى.
قاۋىشساق قاۋىشايىق وسىمەنەن،
مەن ەمەس، «اۋزى قيسىق باي بالاسى»!- دەپ ايتىستى اياقتادى. جەلىدەگى ەكى اقىننىڭ ايتىسىنا پىكىر ءبىلدىرىپ باعا بەرۋشىلەر دە بولدى.
