«اسىل ارنا» رۋحاني-اعارتۋشىلىق تەلەارناسىنىڭ ديرەكتورى، ايتىس اقىنى رەتىندە تانىلعان مۇحامەدجان تازابەك NUR.KZ پورتالىنا سۇحبات بەرگەن.
«اسىل ارنا» تەلەارناسىنىڭ يسلامي-اعارتۋشىلىق ارنا بولىپ اشىلىپ، دامي كەلە، كورەرمەندەرمەن قارىم-قاتىناس جاساي كەلە، ولاردان كوپتەگەن سۇرانىس، ۇسىنىستار ناتيجەسىندە وتباسىلىق ارناعا اينالعانىن ايتقان مۇحامەدجان تازابەك تەلەارنا جۇمىسى تۋرالى كەڭىرەك اڭگىمەلەگەن.
«ءبىرىنشى – ايتارى از ەمەس، ءسوزى مەن ءىسى سايكەسكەن قوعامدىق تۇلعالارعا قاشاندا ەسىگىمىز اشىق. ماسەلەن، ءبىز اپتاسىنا ەكى رەت تىكەلەي ەفيرگە شىعامىز. مەملەكەت جانە قوعام قايراتكەرلەرىنەن باستاپ، تاڭداۋلى تەولوگتار، بىلىكتى يمامدار، ءسالت-داستۇر بىلگىرلەرى، مەديسينا مايتالماندارى، كاسىپ باستاۋدى ۇيرەتەتىن ترەنەرلەر، مامان باۋلۋدىڭ مايتالماندارى، ۋنيۆەرسيتەت پروفەسسورلارى سەكىلدى سان-سالانىڭ قۇرمەتتى ازاماتتارى سول باعدارلامامىزدا قوناق بوپ، قازاقستاندىق كورەرمەندەردىڭ ساۋالدارىنا تىكەلەي ەفيردە جاۋاپ بەرىپ جاتىر»، - دەگەن ارنا باسشىسى قازاققا ءدال ءقازىر كەرەك ءسوزدى ايتۋعا لايىق قابىلەتتى تۇلعالارعا ارنا مىنبەرىنىڭ – ەفيرىنىڭ دايىن ەكەنىن جەتكىزدى.
سونداي-اق ارنا باسشىسى وزىنە جانە ارناعا باعىتتالىپ جاتاتىن ءتۇرلى سىندار تۋرالى دا ويىن ايتقان:
«وكىنىشكە قاراي، اينانىڭ الدىندا تۇرىپ ادەمىلىگىمىزگە قاراپ، ءوزىمىزدى تەكتى دەپ، بەتتى دەپ، باتىر دەپ ويلايتىن جاعدايعا كەلدىك. سوندىقتان، ءقازىر قوعامدا اقپاراتتىڭ راس-وتىرىگى ارالاسىپ تارقاپ، قياناتتاردىڭ ءجۇرىپ جاتقانى، ىنساپسىز پىكىرلەردىڭ ايتىلىپ جاتقانى - تۇلعانىڭ ازدىعىنان. جالپى «اسىل ارناعا» تۇگىلى، ەلباسىمىزعا دا، جۇرتقا ۇلگى بوپ جۇرگەن بەكبولات تىلەۋحان جانە باسقا دا قايراتكەرلەرىمىزگە بايلانىستى سوزدەر وڭاي ايتىلا سالادى عوي. كەيدە، راس، بالا سياقتىمىز. پايدا مەن زياندى، دوس پەن دۇشپاندى اجىرا الماي قالىپ جاتامىز. سونىڭ ءبارى ءبىزدىڭ شىن زيالىلارىنان ايرىلعان مەملەكەت قۇراۋشى ۇلتتىڭ مىقتى تۇلعالار تۋعىزا الماي، تولىق ءپىسىپ جەتىلمەگەندىگىنىڭ كورىنىسى. ءقازىر كەز كەلگەن باق-تى اشىپ قاراساڭىز، كەلەسى سوزدەردى وقيسىز.
«قازاق ءتىلىن دامىتۋ ءۇشىن مەملەكەتكە مىنانداي زاڭ شىعۋ كەرەك، قۇزىرلى مينيسترلىكتەر ونى بىلاي جۇزەگە اسىرۋ كەرەك، وسىلاي ماجبۇرلەۋ كەرەك، سول كەزدە بولادى» دەپ جاتادى. نەگىزى دۇرىس ايتىپ وتىر. ودان دا الدىن ءبىر ماڭىزدى نارسە بار.
ول اقىلدى كىم ورىندايدى؟ جانىڭدى جاي تاپقىزىپ كىم جۇزەگە اسىرادى؟ مىسالى، قوعامدىق تۇلعا جەمىس بەرەتىن اعاشقا ۇقسايدى دەپ ەلەستەتەيىكشى. ونى اكەپ كوشەتىن ورنالاستىرعاننان كەيىن ول جەمىس بەرە مە؟ جوق. ول اۋەلى تامىرىن جىبەرە باستايدى، جۋاندايدى، ودان جىڭىشكە تامىرلار پايدا بولادى. ءسويتىپ توپىراق قىرتىسىنا ورنالاسا باستايدى. سودان كەيىن ونىڭ ءدىڭى جۋانداپ، وعان ۇساق بۇتاقتار شىعا باستايدى. جاپىراعىن جايادى. تەك تورت-بەس جىل وتكەن سوڭ گۇلدەيدى. وندا دا ۇسىككە ۇشىراماسا، بىرتىندەپ جەمىس بەرە باستايدى. باعاناعى تامىر جايۋ، ءدىڭىنىڭ جۋانداۋ، بۇتاعىنىڭ تاراۋى سياقتى پروسەستەردەن وتپەگەن ادامدار بار. ولار ءومىرى جەمىس بەرمەيدى. ولار ۇيگە اسەمدىك ءۇشىن ورناتىپ قويعان گۇل سياقتى»، - دەيدى ارنا تۋرالى ءتۇرلى كوزقاراستارعا مۇحامەدجان تازابەك.
«بىرەۋ مەنى كۇستانالاپ، جامانداپ جازىپ جاتسا، مەن ونى ۋايىمدامايمىن. ونى تۇسىنۋگە تىرىسامىن. ويتكەنى، ونىمەن الىسىپ، وعان حات جازىپ، داۋلاسىپ جۇرەر بولسام، ۋاقىتىم شىعىن، ءارى ماسەلە دە شەشىلمەيدى. كەرىسىنشە، ءمان بەرگەنىم وعان ءبىر داڭق بولۋى مۇمكىن.
بەكەر ۋاقىت كەتەتىن شارۋالارعا نازار اۋدارعىم كەلمەيدى. سەبەبى، مەنىڭ ناقتى ىستەپ جاتقان شارۋام بار. كورەتىن ادام كورىپ وتىر. كورمەس تۇيەنى دە كورمەس. شارۋاسى رەتتەلمەگەن ادامدار عانا شارشاپ جۇرەدى. جانە سولار عايبات پەن وسەككە دايىن تۇرادى.
قۇمنان كەيىن سۋ قۇيساڭىز، وعان دا ورىن تابىلادى. سول سياقتى، جۇرەگىمىزدەگى يمان - بىزگە ومىردەگى اسا قاجەتتى نارسە مەن ماڭىزدى نارسەنىڭ نەمەسە قاجەتسىز نارسە مەن اسا قاجەتسىز نارسەلەردىڭ ورنىن ايقىنداپ بەرەدى. كوپ ادامداردىڭ ومىردە شاتاسىپ ءجۇرۋى، قاجەتسىز ىستەرمەن شۇعىلدانۋى، تىعىرىققا تىرەلۋى، اقىلدى دەگەن ادامداردىڭ ءومىرىنىڭ اقىرى سۋيسيدپەن اياقتالۋى، نەمەسە ۇلتقا اقىل ايتىپ جۇرگەن ادامداردىڭ بالا-شاعاسىنا ءسوزى وتپەۋى، ايەلىنىڭ الدىندا ابىرويى بولماۋى ونىڭ ءومىرىنىڭ رەتتەلمەگەنىن كورسەتەدى. ماڭىزدى مەن ماڭىزسىزدى اجىراتا الماي جۇرگەنىن اڭعارتادى.»، - دەيدى وزىنە قاتىستى سىن-پىكىرلەرگە.
