دجەيمس ديگەيل ءوزىنىڭ جەكپە-جەگىن لوندوندا وتكىزۋگە نيەتتى، دەپ حابارلايدى vesti.kz

ەكىنشى ورتا سالماقتاعى IBF تۇجىرىمى بويىنشا الەم چەمپيونى بريتاندىق دجەيمس ديگەيل (23-1-1، 14 كو) ورتا سالماقتاعى WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق گەنناديي گولوۆكيندى (37-0، 33 كو) جازدا وتەتىن جەكپە-جەگىندە قارسىلاس رەتىندە كورگىسى كەلەتىنىن ايتتى. 
ديگەيل ءوزىنىڭ كەزەكتى جەكپە-جەگىن ماۋسىم ايىندا لوندونداعى "ارسەنال" كلۋبىنىڭ ستاديونى - "ەميرەيتس ستەديۋمدا" وتكىزگىسى كەلەدى ەكەن. گولوۆكيننەن بولەك بۇل كەزدەسۋگە بريتاندىق بوكسشىنىڭ قارسىلاسى كاللۋم سميت (22-0، 17 كو)، اندرە ۋورد (31-0، 15 كو) جانە دجوردج گروۋۆز (25-3، 18 كو) سەكىلدى بوكسشىلارى بولۋى ىقتيمال. 
"گولوۆكين؟ مەن ەش قينالماستان بۇل كەزدەسۋ ءۇشىن، داڭقتى چەمپيونمەن جەكپە-جەك وتكىزۋ ءۇشىن سالماعىمدى وزگەرتە الامىن. 
سونىمەن قاتار مەن كاللۋم سميتپەن دە كەزدەسكىم كەلەدى. ويتكەنى، ول ءقازىر بابىندا. كەيبىرەۋلەردىڭ پىكىرى بويىنشا، ول مەنى جەڭە الادى ەكەن-مىس. مەن جۇرتتىڭ قاتەلەسىپ جاتقانىن دالەلدەگىم كەلەدى. 
ۋورد تا گولوۆكين سەكىلدى pound-for-pound بويىنشا الەمدەگى ەڭ كوپ سۇرانىسقا يە بوكسشى. ونىمەن دە كەزدەسۋ مەن ءۇشىن ۇلكەن مارتەبە بولاتىن ەدى. مەن گولوۆكيننىڭ سالماعىنا تۇسۋگە دە، ۋوردتىڭ سالماعىنا كوتەرىلۋگە دە دايىنمىن. مەن ماۋسىمدا لوندوندا جەكپە-جەك وتكىزگىم كەلەدى"، - دەيدى ديگەيل The Daily Mail پورتالىنا بەرگەن سۇحباتىندا. 
ايتا كەتەيىك، بۇعان دەيىن گولوۆكيننىڭ شارشى الاڭعا ماۋسىم ايىندا ورالاتىنى بەلگىلى بولعان ەدى. ونىڭ قارسىلاسى WBO تۇجىرىمى بويىنشا الەم چەمپيونى بيللي دجو سوندەرس (24-0، 12 كو) بولۋى ابدەن ىقتيمال. ەكى بوكسشىنىڭ كومانداسى ءقازىر جازدا EXPO-2017 كەزىندە استانادا جەكپە-جەك وتكىزۋى تۋرالى كەلىسسوز جۇرگىزۋدە.